Эфеслилеге 3 - Сыйлы Инжил бла Забур

Пауулгъа ачылгъан сыр

¹ Ол себепден а мен, Пауул, сиз башха миллетлиле ючюн Масих Иссагъа жесир болгъанма.

² Аллах шафауатын сизге билдирирге мени боюнума салгъанын сиз эшитген болурсуз:

³ Мен башында къысха жазгъаным кибик, Аллах сырын туура манга ачыкъ этип билдиргенди.

⁴ Сиз, муну окъуп, Масихни сырын ангылагъанымы сезерге боллукъсуз.

⁵ Адам улуланы алгъыннгы туудукъларына билдирилмеген, энди уа Масихни сыйлы абустолларына бла файгъамбарларына Сыйлы Нюрню юсю бла ачыкъ этилген сыр а ма буду:

⁶ Башха миллетлиле да, Хайыр Хапарны жайылыуу бла, Израиль бла бирча игиликге ие боладыла, бир чархны санлары болуп, Аллахны Масих Иссада ант сёз бла бергенинден юлюшлю боладыла.

⁷ Аллахны менде жюрюген кючю бла манга берген шафауатыны саугъасы бла мен ол Хайыр Хапарны жайыучу жумушчу болгъанма.

⁸ Сыйлыланы битеу барындан да эм гитче болгъанымлай, Масихни акъылгъа сыйынмагъан байлыгъыны юсюнден башха миллетлеге хайыр хапар берирге

⁹ Эм хар нени да Масих Иссаны юсю бла жаратхан Аллахда, ёмюрлюкден жашырылып болгъан сыр къалай къуралгъанын барына да ачыкъларгъа манга шафауат берилгенди.

¹⁰ Аллах, Кесини кёп тюрлю акъылманлыгъы энди Жамауатыны юсю бла кёкледеги башчылагъа бла властьлагъа белгили болур ючюн, алай этгенди.

¹¹ Бу, Аллахны ёмюрледен да алгъа этген эм бизни Раббийибиз Масих Иссада толтургъан планыды.

¹² Масихде уа, бизни Анга ийнаныуубуз бла, Аллахха таукеллик бла эм ышаныу бла жууукълашыргъа амалыбыз барды.

¹³ Мынга кёре сизден тилейме, мен сизни ючюн сынагъан къайгъыларым ючюн мудах болмагъыз, ала уа сизге махтау тапдырадыла.

Масихни сюймеклигин билиу

¹⁴ Ол себепден, кёкледе да, жерде да хар тюрлю аталыкъ да Андан аталгъан,

¹⁵ Бизни Раббийибиз Масих Иссаны Атасыны аллында тобукъланама.

¹⁶ Ол, Кесини аламатлыгъыны байлыгъындан, Кесини Нюрю бла ич адамыгъызда кюч берип, сизни бегитсин,

¹⁷ Ийманыгъыз бла Масих жюреклеригизде жашасын деп тилейме.

¹⁸ Сиз сюймекликде тамырланып эм мурдорлу болуп, битеу сыйлыла бла бирге, Масихни сюймеклиги къалай кенг, узун, терен эмда бийик болгъанын ангыларыгъызны,

¹⁹ Ангылаудан озгъан бу сюймекликни билиригизни эм алай бла Аллахны битеу толулугъу бла толуругъузну тилейме.

²⁰ Бизде жюрюген кючю бла, бизни тилегенибизден да неда ойлашыуубуздан да бек аламат кёп эталлыкъ Аллахха,

²¹ Жамауатында эм Масих Иссада битеу туудукълада, ёмюрден ёмюрге ыспас-махтау болсун! Амин.