Билим Ачханы 5 - Сыйлы Инжил бла Забур

Мухур салыннган китап бла Къозу

¹ Сора мен тахтада Олтургъанны онг къолунда, ичинде да тышында да жазылгъан, анга жети мухур салыннган китапны кёрдюм.

² Сора мен кючлю мёлекни уллу ауазы бла: «Бу китапны ачаргъа эм аны мухурларын алыргъа тийишли кимди?» – деп билдиргенин кёрдюм.

³ Алай а не кёкде, не жер башында, не жер тюбюнде биреу да ол китапны ачаргъа не анга къараргъа болалмады.

⁴ Ол китапны ачаргъа эм окъургъа эм анга къараргъа окъуна тийишли бир киши да табылмагъанына мен кёп жилядым.

⁵ Сора таматаладан бирлери манга: «Жиляма! Ма, Дауутну Тамыры, Яхуданы тукъумундан болгъан Аслан хорлагъанды, Ол бу китапны ачаргъа эм аны жети мухурун алыргъа болаллыкъды», – деди.

⁶ Сора мен, къарап, тахтаны эм тёрт хайыуанны арасында эмда таматаланы арасында тургъан, боюну кесилгеннге ушаш Къозуну кёрдюм; Аны жети мюйюзю эм жети кёзю бар эди; была да, Аллахны битеу дуниягъа ийген жети Нюрюдю.

⁷ Сора Къозу, келип, тахтада Олтургъанны онг къолундан китапны алды.

⁸ Ол китапны алгъан заманда, тёрт хайыуан бла жыйырма тёрт тамата Къозуну аллында жерге къапландыла; хар бирини да къолунда арфа эм ариу ийисли фимиамдан толу алтын аякъ бар эди, была уа сыйлыланы тилеклеридиле.

⁹ Эмда жангы зикир айтадыла: «Сен тийишлисе китапны алыргъа эм аны юсюнден мухурларын ачаргъа; нек десенг Сен союлгъанса эм Кесинги къанынг бла хар тукъумдан эм хар тилден, хар халкъдан эм хар миллетден бизни Аллахха жулугъанса

¹⁰ Эмда Аллахыбыз ючюн бизни патчахла эм дин къуллукъчула этгенсе; биз жер башында патчахлыкъ этерикбиз», – дейдиле.

¹¹ Сора тахтаны бла хайыуанланы эм таматаланы тёгерегинде, мен кёп мёлеклени кёрдюм эм ауазларын эшитдим. Аланы саны тул-тубан эм минг-мингле эдиле.

¹² Ала уллу ауаз бла: «Союлгъан Къозу къудуретни да, байлыкъны да, акъылманлыкъны да, кючню да, хурметни да, махтауну да, алгъышны да алыргъа тийишлиди!» – дей эдиле.

¹³ Эм кёкде эм жер башында, жерни тюбюнде эм тенгизде хар жаратылгъан, битеу алада болгъанла: «Тахтада Олтургъаннга эм Къозугъа алгъыш да, хурмет да, махтау да, бийлик да ёмюрледен ёмюрлеге да болсун!» – деп айтханларын мен эшитдим.

¹⁴ Эм тёрт хайыуан да: «Амин», – дедиле. Жыйырма тёрт тамата да жерге къапланып, ёмюрледен ёмюрлеге Жашагъаннга сежда этдиле.