Билим Ачханы 12 - Сыйлы Инжил бла Забур

Къатын эмда аждагъан (ибилис)

¹ Сора кёкде уллу илишан, кюнню юсюне кийген къатын кёрюндю; аны аякъларыны тюбюнде ай, аны башында да онеки жулдуздан таж бар эди.

² Къатын бууаз эди эм къозлау ауруудан къыйналып къычыра эди.

³ Сора кёкде башха илишан: жети башлы, он мюйюзлю, аны башларында да жети тажы болгъан уллу къызыл аждагъан кёрюндю.

⁴ Аны къуйругъу кёкден жулдузланы ючден бирин алып кетип, аланы жерге атханды. Бу аждагъан, ол къозларыкъ къатынны къозлагъан заманында аны сабийин жутуп къояр ючюн, аны аллында тохтады.

⁵ Сора ол къатын улан сабий тапды; ол сабий а битеу миллетлени темир таякъ бла кютерикди. Алай а сабий олсагъат окъуна Аллахха, Аны тахтасына алынды.

⁶ Къатын а къум тюзге къачды. Ол анда минг эки жюз алтмыш кюн асыралыр ючюн, анга Аллахдан хазырланнган жер барды.

⁷ Сора кёкде къазауат болду: Микайыл бла аны мёлеклери аждагъаннга къажау къазауат эте эдиле, аждагъан бла аны мёлеклери да алагъа къажау къазауат эте эдиле,

⁸ Алай а чыдаялмадыла, алагъа энди кёкде жер табылмады.

⁹ Сора ибилис эм шайтан аталгъан уллу аждагъан, битеу дунияны алдатыучу буруннгу жилян жер юсюне атылды, аны мёлеклери да аны бла бирге атылдыла.

¹⁰ Сора мен кёкде былай айтхан уллу ауаз эшитдим: «Энди бизни Аллахыбызны къутхарыуу да, кючю да, патчахлыгъы да эм аны Масихини оноуу да келди; нек десегиз къарындашларыбыздан тил этиучю, Аллахыбызны аллында аладан кече да, кюн да тил этиучю энишге атылгъанды.

¹¹ Ала Къозуну къаны бла эм кеслерини шагъатлыкъ сёзлери бла аны хорлагъандыла, ала жанларын аямагъандыла эмда ёлюмден артха турмагъандыла.

¹² Алай бла, кёкле эм алада жашагъанла къууанч этигиз! Жерде бла тенгизде жашагъанлагъа уа – палах; нек десегиз ибилис, анга заман аз къалгъанын билип, сизге уллу къутурууу бла тюшгенди!»

¹³ Аждагъан, жер юсюне атылгъанын кёргенинде уа, ол улан сабий тапхан къатынны ызындан болуп башлады.

¹⁴ Къатын жилянны аллындан къум тюзге, анда юч жыл бла жарым заманнга асыралыр жерине учуп кетер ючюн, анга уллу къушну эки къанаты берилди.

¹⁵ Сора жилян, къатынны суу бла алып кетер ючюн, кесини ауузундан сууну, баргъан сууча, къатынны ызындан жиберди.

¹⁶ Алай а къатыннга жер болушду, аждагъан ауузундан ийген сууну жер ауузун ачып жутуп къойду.

¹⁷ Сора аждагъан къатыннга къутуруп къалды эм Аллахны фарызларын сакълагъан эмда Масих Иссагъа шагъатлыкъ этиуню бардыргъан, ол къатынны урлугъундан болгъан башхала бла къазауат этерге кетди.