Билим Ачханы 1 - Сыйлы Инжил бла Забур

¹ Масих Иссаны билим ачханы. Аллах муну, къысха заманда боллукъ затланы, Кесини къулларына билдирир ючюн, Иссагъа бергенди. Ол да Кесини мёлегини юсю бла ийип, муну Кесини къулу Ахиягъа кёргюзтгенди.

² Ол да Аллахны сёзюне эм Масих Иссаны шагъатлыгъына эм не кёргенине шагъатлыкъ этгенди.

³ Бу файгъамбарлыкъны сёзлерин окъугъан эм тынгылагъанла эм мында жазылгъанланы тутханла насыплыдыла, нек десегиз заман жууукъду.

Жети жамауатха салам

⁴ Мен Ахиядан Асияда болгъан жети жамауатха салам! Бар Болуп Тургъандан, Бар Болгъандан эм Бар Болуп Турлукъдан, Аны тахтасыны аллында болгъан жети нюрден

⁵ Эм тюз шагъат болгъан, ёлгенледен биринчи болуп тиргизилген, дунияны патчахларыны Бийи Масих Иссадан сизге шафауат эм ырахатлыкъ болсун. Бизни сюйген, Кесини къаны бла гюняхларыбыздан бизни азат этген

⁶ Эм бизни Кесини Атасы Аллахха къуллукъ этиуде патчахла эм дин къуллукъчула этген Масиххе ёмюрледен ёмюрлеге махтау эм къудурет болсун! Амин.

⁷ Ма, булутла бла келеди! Аны хар кёз да, Аны чанчханла да кёрлюкдюле; Аны ючюн дунияны битеу миллетлери сарнап жилярыкъдыла. Алайды. Амин.

Биринчи да, Ахыргъы да Менме

⁸ «Альфа да, Омега да, ауалы да, ахыры да Менме», – дейди Бар Болгъан, Бар Болуп Тургъан эм Бар Болуп Турлукъ, битеу дунияны тутхан Раббий Аллах.

⁹ Масих Иссаны азап чегиуюне, патчахлыгъына эм тёзюмюне сизни бла къатышхан мен, Ахия къарындашыгъыз, Аллахны сёзю ючюн эм Масих Иссаны шагъатлыгъы ючюн Патмос атлы айрыкамда тутмакъ эдим.

¹⁰ Раббийни кюнюнде мен Сыйлы Нюрню оноуунда эдим эм артымдан сур быргъы ауазыча уллу ауаз: «Альфа да, Омега да, Биринчи да, Ахыргъы да Менме.

¹¹ Бу кёргенинги китапха жаз эм Асияда болгъан жети жамауатха: Эфесге, Измирге, Бергамагъа, Тиатирагъа, Сардисге, Филадельфиягъа эм Лаодикиягъа жибер», – деп айтханын эшитдим.

¹² Мени бла сёлешген кимни ауазы болгъанын кёрюр ючюн, айланып къарадым; къарагъанымлай, жети алтын чырахтан кёрдюм

¹³ Эм жети чырахтанны араларында жерге дери жетген узун кийим кийген эм кёкюрегине дери белине алтын белибау къысылгъан Адам Улуна ушагъан Биреуню кёрдюм.

¹⁴ Аны башы эм чачлары акъ жюн кибик эм къар кибик акъ эди; Аны кёзлери да отну жилтини кибик эди;

¹⁵ Аны аякълары да печьде къыздырылгъан сыйдам жезге ушай эдиле, Аны ауазы да кёп сууланы тауушу кибик эди;

¹⁶ Онг къолунда жети жулдузну тута эди; Аны ауузундан эки жаны да жютю къылыч чыгъа эди; Аны бети да битеу кючю бла жарыгъан кюн кибик эди.

¹⁷ Аны кёргенимде, ёлгенча болуп, Аны аякъларына аудум. Ол, онг къолун мени юсюме салып, манга былай айтды: «Къоркъма! Биринчи да, Ахыргъы да Менме.

¹⁸ Сау Менме. Ёлген да болгъанма; ма къара, ёмюрледен ёмюрлеге да саума. Амин. Ахыратны эм ёлюмню ачхычлары Мендедиле.

¹⁹ Алай бла кёргенлеринги, энди болгъан затланы эм мындан сора боллукъланы жаз.

²⁰ Сен Мени онг къолумда кёрген жети жулдузну эм жети алтын чырахтанны тасхасы буду: жети жулдуз жети жамауатны мёлеклеридиле; ол сен кёрген жети чырахтан а жети жамауатды».