Ахия 7 - Сыйлы Инжил бла Забур

Исса Иерусалимге барады

¹ Андан сора Исса Галилеяда айланып башлады; иудейлиле Аны ёлтюрюрге излегенлери себепли, Иудеяда айланыргъа сюймей эди.

² Иудейлилени чатырла салыучу байрамлары жууукълаша эди.

³ Ол заманда Иссаны къарындашлары Анга: «Мындан чыкъ да Иудеягъа бар, Сени этген ишлеринги Сени сохталарынг да кёрсюнле.

⁴ Нек десенг кесин белгили этерге излеген бир киши да ишин жашыртын этмейди. Сен аллай ишле эте эсенг, сора Кесинги дуниягъа ачыкъ эт», – дедиле.

⁵ Аны къарындашлары да Анга ийнанмай эдиле.

⁶ Исса алагъа: «Мени заманым алыкъа келмегенди, сизге уа къачан да тап заманды.

⁷ Дуния сизни кёрюп болмай къояргъа болаллыкъ тюйюлдю, Мени уа кёрюп болмайды; нек десегиз Мен аны этген ишлери аман болгъанына шагъатлыкъ этеме.

⁸ Бу байрамгъа сиз барыгъыз. Мен а бу байрамгъа алыкъа бармайма, нек десегиз Мени заманым алыкъа жетмегенди», – деди.

⁹ Алагъа муну айтып, Галилеяда къалды.

¹⁰ Алай а, Аны къарындашлары байрамгъа кетгенден сора, Кеси да барды; ачыкъ болмай, жашыртын.

¹¹ Иудейлиле уа Аны байрамда излеп: «Ол къайдады?» – дей эдиле.

¹² Аны юсюнден халкъда кёп хапарла жюрюй эдиле. Бир къауумла: «Ол иги адамды», – дей эдиле, башхалары уа: «Угъай, халкъны терилтеди», – дей эдиле.

¹³ Алай болсада, иудейлиледен къоркъгъандан, бир киши да Аны юсюнден ачыкъ айтмады.

¹⁴ Байрамны жартысы озгъандан сора уа, Исса табыныучу юйге келип юйрете эди.

¹⁵ Сора иудейлиле: «Окъумагъанлай, Ол, Сыйлы Китапланы къалай биледи?» – деп, сейирсине эдиле.

¹⁶ Исса, алагъа жууап эте: «Мени юйретиуюм Мени тюйюлдю, Мени Ийгенниди.

¹⁷ Аны буйругъун этерге сюйген адам бу юйретиуню Аллахдан болгъанын, неда Мен Кесим-Кесимден айтханымы, билликди.

¹⁸ Кеси-кесинден айтхан кесине махтау излейди; Аны Ийгеннге махтау излеген а тюз ниетлиди, Анда ётюрюк жокъду.

¹⁹ Муса сизге Тауратны Законун бермегенмиди? Сизден биригиз да Тауратны жашауда бардырмайды. Мени ёлтюрюрге уа не ючюн излейсиз?» – деди.

²⁰ Халкъ Анга жууапха: «Сенде жинми барды? Ким излейди Сени ёлтюрюрге?» – деди.

²¹ Исса алагъа жууапха: «Мен бир иш этгенме, анга сиз барыгъыз да сейирсинесиз.

²² Муса сизге сюннетни бергенди, – кертиси да бу Мусадан тюйюл, аталаданды, – алай бла сиз шабат кюнде да адамгъа сюннет этесиз.

²³ Мусаны Закону бузулмаз ючюн, шабат кюн адам сюннет этдире эсе, Мен шабат кюн бир адамны чархын тамам сау этгеним ючюн, Манга нек ачыуланасыз?

²⁴ Тыш къарамына кёре хукму этмегиз, тюзлюк бла хукму этигиз», – деди.

Исса Масихмиди?

²⁵ Былайда Иерусалимлиледен бир къауумлары: «Ёлтюрюрге излегенлери Бу тюйюлмюдю?

²⁶ Ма, Ол ачыкъ сёлешеди, Анга бир зат да айтмайдыла. Ол керти Масихди деп, таматала къабылмы этген болурла?

²⁷ Алай а бу Адамны къайдан болгъанын билебиз; Масих келген заманда уа, Аны къайдан болгъанын бир киши да биллик тюйюлдю», – дей эдиле.

²⁸ Ол заманда табыныучу юйде юйрете Исса уллу ауаз бла: «Мени таныгъан да этесиз, Мен къайдан болгъанымы да билесиз! Мен Кесим-Кесимден келмегенме. Мени Ийген а хакъ кертиди, Аны уа сиз танымайсыз.

²⁹ Мен Аны таныйма, нек десегиз Мен Анданма, Мени Ол ийгенди», – деп айтды.

³⁰ Сора Аны тутаргъа излей эдиле, алай а Анга бир киши да къолун тийирмеди; нек десегиз алыкъа Аны заманы жетмеген эди.

³¹ Халкъдан кёпле уа Анга ийнаннган эдиле эм: «Масих келсе, Бу этген илишанладан кёп этерми?» – дей эдиле.

³² Фарисейле халкъда Аны юсюнден ол хапарланы эшитген эдиле. Сора фарисейле бла баш дин къуллукъчула Аны тутаргъа къалауурланы ийген эдиле.

³³ Исса уа алагъа: «Мен энди сизни бла кёп турлукъ тюйюлме, Мени Ийгеннге къайтырыкъма.

³⁴ Мени излериксиз, табарыгъ’а тюйюлсюз; Мен болгъан жерге сиз келаллыкъ тюйюлсюз», – деди.

³⁵ Ол заманда иудейлиле кеси араларында: «Биз Аны тапмазча, къайры барлыкъды Ол? Огъесе Ол, греклиле арасында чачылгъан иудейлиле тургъан жерлеге барып, греклиленими юйретирик болур?

³⁶ Ол: „Мени излериксиз, табарыгъ’а тюйюлсюз; Мен болгъан жерге сиз келаллыкъ тюйюлсюз“ деп айтхан сёзлени магъанасы неди?» – дей эдиле.

³⁷ Байрамны ахыргъы, уллу кюнюнде уа Исса, ёрге туруп, уллу ауаз бла: «Суусап болгъан адам, Манга келсин да ичсин!

³⁸ Китапда айтылгъаны кибик, Манга ийнаннган адамны ичинден, жашау бериучю суу черекле агъарыкъдыла», – деп сёлешди.

³⁹ Муну уа Ол, Анга ийнаннганла аллыкъ Нюрню юсюнден айтхан эди. Алагъа алыкъа Сыйлы Нюр берилмеген эди, нек десегиз Исса алыкъа махтаулу болмагъан эди.

⁴⁰ Халкъдан кёбюсю, ол сёзлени эшитип: «Кертиси да ол Файгъамбар Буду», – дей эдиле.

⁴¹ Башхалары: «Ол Масихди», – дей эдиле. Дагъыда башхала уа: «Масих Галилеяданмы келликди да?

⁴² Китапда, Масих Дауутну урлугъундан эм Дауут жашагъан жерден, Бейтлехем шахардан келликди, – деп айтылмагъанмыды?» – дей эдиле.

⁴³ Алай бла Иссаны юсюнден халкъда даулаш болду.

⁴⁴ Аладан бир къауумлары Аны тутаргъа излей эдиле; болсада Анга бир киши къолун тийирмеди.

Иудейли таматаланы ийнаныусузлукълары

⁴⁵ Алай бла къалауурла баш дин къуллукъчулагъа бла фарисейлеге къайтдыла; была да алагъа: «Сиз Аны нек келтирмедигиз?» – дедиле.

⁴⁶ Къалауурла: «Бир заманда да бир адам, ол Адам сёлешгенча сёлешмегенди», – деп жууап бердиле.

⁴⁷ Фарисейле уа алагъа: «Сиздамы терилгенсиз?

⁴⁸ Оноучуладан неда фарисейледен Анга биреу ийнаннганмыды?

⁴⁹ Тауратны билмеген бу халкъ а налатды», – дедиле.

⁵⁰ Иссагъа кече келген Никодим, аладан бири болуп, алагъа:

⁵¹ «Бизни Законубуз, алгъа адамгъа тынгыламай эм аны не этгенин билмей аны терслеймиди?» – деди.

⁵² Ала да анга жууапха: «Огъесе сендамы Галилеяданса? Сюзюп къара, сора Галилеядан файгъамбар келмеучюсюн кёрюрсе», – дедиле.

⁵³ [Сора барысы да юйлерине чачылып кетдиле.