Ахия 5 - Сыйлы Инжил бла Забур

Жууунуучу жердеги акъсакъ адам сау этиледи

¹ Андан сора бир иудей байрам болду, Исса да Иерусалимге келди.

² Иерусалимде уа Къой Къабакъны къатында жууунуучу жер барды; аны аты чюйютча Бейтхасдады, анда башы жабылгъан беш бёлюм барды.

³ Ол бёлюмледе бек кёп ауругъанла, сокъурла, акъсакъла, санлары къурушханла сууну къымылдарын сакълап жата эдиле.

⁴ Нек десегиз бир-бир заманлада Раббийни бир мёлеги жууунуучу жерге тюшюп, сууну булгъай эди; суу булгъаннганлай, ары бек алгъа ким кирсе, ол, не аурууу бар эсе да, сау бола эди.

⁵ Мында отуз сегиз жыл ауруп тургъан бир адам бар эди.

⁶ Исса, аны жатып тургъанын кёрюп эм аны кёпден бери жатханын да билип, анга: «Сау болургъа сюемисе?» – деди.

⁷ Ауругъан Анга: «Жюйюсхан, суу булгъаннган заманда, мени жууунуучу жерге тюшюрюрге адамым жокъду; мен кирлик заманда уа, менден алгъа башха адам тюшеди», – деп жууап этди.

⁸ Исса анга: «Тур, тёшегинги ал да, жюрю!» – деди.

⁹ Ол киши олсагъатдан сау болду эм тёшегин алып жюрюп башлады. Ол а шабат кюн эди.

¹⁰ Ол себепден иудейлиле сау болгъаннга: «Бюгюн шабат кюндю; санга тёшегинги алыргъа тийишли тюйюлдю», – дедиле.

¹¹ Ол алагъа: «Мени сау этген Адам, манга: „Тёшегинги ал да, жюрю“ деп айтханды», – деп жууап этди.

¹² Анга уа: «Санга: „Тёшегинги ал да жюрю“ деп айтхан адам кимди?» – деп сордула.

¹³ Сау болгъан а, Ол ким болгъанын билмей эди; нек десегиз Исса ол жерде болгъан халкъны арасында кёрюнмей къалгъан эди.

¹⁴ Андан сора Исса, анга табыныучу юйде тюбеп, анга: «Ма, сен сау болдунг; энди гюнях этме, санга андан да аман болмаз ючюн», – деди.

¹⁵ Ол адам барды да, аны сау этген Исса болгъанын иудейлилеге билдирди.

¹⁶ Исса шабат кюн аллай ишле этгени ючюн, иудейлиле Анга зулму этип башладыла эмда Аны ёлтюрюрге излей эдиле.

¹⁷ Исса уа алагъа: «Мени Атам эндиге дери аллай ишле этеди, Мен да этеме», – деди.

¹⁸ Исса шабат кюнню бузгъан бла да къалмай, алай а Аллахха Атам деп айтып, Кесин Аллахха тенг этгени ючюн иудейлиле Аны ёлтюрюрге дагъыда бек излей эдиле.

Жашау бериучю Исса

¹⁹ Бу затха Исса: «Кертисин, кертисин айтама сизге: Улан Атасыны эте тургъанын кёрмесе, Кеси-Кесинден бир зат да эталлыкъ тюйюлдю; Ол не эте эсе да, Улан да алай этеди.

²⁰ Нек десегиз Ата Уланын сюеди эм Кеси этгенни барын да Анга кёргюзтеди эмда, сиз сейирсинир ючюн, Анга быладан да уллу ишле кёргюзтюрюкдю.

²¹ Ата ёлгенлени къалай тиргизе эсе эм сау эте эсе да, Улан да кимни сюйсе да алай сау этеди.

²² Ата бир кишиге да сюд этмейди, алай а битеу сюдню Уланына бергенди;

²³ Атагъа хурмет этгенлери кибик, бары да Уланына хурмет этер ючюн алай этгенди. Уланнга хурмет этмеген адам Аны ийген Атагъа да хурмет этмейди.

²⁴ Кертисин, кертисин айтама сизге: Мени сёзюме тынгылагъанны эм Мени Ийгеннге ийнаннганны ёмюрлюк жашауу барды; ол сюдге да тюшмейди, алай а ёлюмден жашаугъа ётгенди.

²⁵ Кертисин, кертисин айтама сизге: ёлгенле Аллахны Уланыны ауазын эшитирик эм эшитгенде сау боллукъ заман келеди, энди келген да этгенди.

²⁶ Нек десегиз Атаны Кеси-Кесинде жашауу болгъаны кибик, Уланына да Кеси-Кесинде жашауу болургъа кюч бергенди;

²⁷ Эм Ол Адам Улу болгъаны себепли, сюд этерге эркинликни да Анга бергенди.

²⁸ Мынга сейирсинмегиз: нек десегиз битеу къабырладагъыла Аллахны Уланыны ауазын эшитирик заман келеди.

²⁹ Сора ахшылыкъ этгенле жашаргъа тиргизилиуде, аманлыкъ этгенле уа сюд этилирге тиргизилиуде чыгъарыкъдыла».

Иссагъа шагъатлыкъ

³⁰ «Мен Кеси-Кесимден бир зат да эталлыкъ тюйюлме. Къалай эшите эсем да, алай хукму этеме, Мени хукмум да тюзлюклюдю; нек десегиз Кесим сюйгенни тюйюл, алай а Мени ийген Атаны буйругъун толтурургъа излейме.

³¹ Мен Кесим-Кесими юсюмден шагъатлыкъ эте эсем, сора Мени шагъатлыгъым тюз тюйюлдю:

³² Мени юсюмден шагъатлыкъ этген башха барды; Мени юсюмден аны этген шагъатлыгъы тюз болгъанын Мен да билеме;

³³ Сиз Ахиягъа адамла ийген эдигиз, ол да хакъ кертини юсюнден шагъатлыкъ этген эди.

³⁴ Алай болгъанлыкъгъа Мен адамладан шагъатлыкъ алмайма, алай а быланы сиз къутхарылыр ючюн айтама.

³⁵ Ахия жаннган эм жарытхан чыракъ эди; сиз а аз заманнга аны жарыгъында къууаныргъа сюе эдигиз.

³⁶ Мени уа Ахияны шагъатлыгъындан эсе уллу шагъатлыгъым барды: нек десегиз Ата Манга этерге берген ишле, Мен эте тургъан ишле кеслери Мени Ата ийгенине шагъатлыкъ этедиле.

³⁷ Мени ийген Ата Кеси да Мени юсюмден шагъатлыкъ этгенди. Сиз а бир заманда да не Аны ауазын эшитмегенсиз, не Аны бетин кёрмегенсиз.

³⁸ Аны сёзю да сизде турмайды; нек десегиз сиз Ол Ийгеннге ийнанмайсыз.

³⁹ Сыйлы Китапланы тинтип къарайсыз, нек десегиз сиз аланы юслери бла ёмюрлюк жашау алыргъа умут этесиз; ала уа Мени юсюмден шагъатлыкъ этедиле.

⁴⁰ Алай а сиз, жашауугъуз болур ючюн, Манга келирге сюймейсиз.

⁴¹ Адамладан махтау алмайма.

⁴² Алай а сизни билеме; сизде Аллахны сюймеклик жокъду.

⁴³ Мен Атамы аты бла келгенме, сиз а Мени къабыл этмейсиз; башхасы кесини аты бла келсе уа, аны къабыл этериксиз.

⁴⁴ Сиз бир-биригизден махтау аласыз, бир Аллахдан болгъан махтауну уа излемейсиз, сора сиз Манга къалай ийнаналлыкъсыз?

⁴⁵ Мен Атаны аллында сизни терслерик сунмагъыз; сизни терслерик сиз ышанып тургъан Мусады.

⁴⁶ Сиз Мусагъа ийнансагъыз эди, Манга да ийнаныр эдигиз; нек десегиз ол Мени юсюмден жазгъанды.

⁴⁷ Аны жазгъанларына ийнанмай эсегиз а, Мени сёзлериме къалай ийнанырсыз?» – деди.