Ахия 4 - Сыйлы Инжил бла Забур

Исса бла самариялы тиширыу

¹ Ахиядан эсе, Исса кёп сохтала табады эм сууда кёмюлдюреди деген хапарны фарисейлеге жетгенин Исса биле эди.

² Болсада сууда кёмюлдюрген Исса Кеси тюйюл, Аны сохталары эдиле.

³ Исса ол заманда, Иудеяны къоюп, Галилеягъа кетди.

⁴ Ары уа Самарияны юсю бла барыргъа керек болгъан эди.

⁵ Алай бла Исса, Якъуп кесини жашы Юсюпге берген жер юлюшню къаршысында болгъан, Самарияны Сихар атлы шахарына келди.

⁶ Анда Якъупну къуюсу бар эди. Исса, жолдан арып келип, къуюну къатында олтурду; кюнортадан сора сагъат алтыгъа жууукъ бола эди.

⁷ Самариядан бир тиширыу суу алыргъа келеди. Исса анга: «Манга бир суу ичирчи», – деди.

⁸ Нек десегиз Аны сохталары ашарыкъ сатып алыргъа шахаргъа кетген эдиле.

⁹ Самариялы тиширыу Анга: «Сен иудейли болгъанлай, менден, самариялы тиширыудан, суу ичерге къалай тилейсе? Нек десенг иудейлилени самариялыла бла келишиулери жокъду», – деди.

¹⁰ Исса анга жууапха: «Сен Аллахны саугъасын билсенг эди эмда санга: „Манга бир суу ичирчи“ деген ким болгъанын билсенг эди, сен кесинг Андан тилер эдинг, Ол да санга жашау бериучю суу берир эди», – деди.

¹¹ Тиширыу Анга: «Жюйюсхан! Сени суу алыр затынг да жокъду, къую уа теренди. Сен жашау бериучю сууну къайдан аллыкъса?

¹² Сен бизни атабыз Якъупдан уллумуса да? Бу къуюну уа бизге ол бергенди, кеси да, аны сабийлери да, аны маллары да мындан ичгендиле», – деди.

¹³ Исса анга жууапха: «Бу суудан ичген хар адам дагъыда суусап боллукъду.

¹⁴ Мен берлик суудан ичген адам а ёмюрге да суусап боллукъ тюйюлдю; алай а, Мен анга берлик суу, аны ичинде, ёмюрлюк жашаугъа акъгъан шаудан суу боллукъду», – деди.

¹⁵ Тиширыу Анга: «Жюйюсхан! Манга ол сууну бер, мен суусап болмайым эм суу алыргъа бери келмейим», – деди.

¹⁶ Исса анга: «Бар, эринги чакъыр да, бери кел», – деди.

¹⁷ Тиширыу Анга жууапха: «Мени эрим жокъду», – деди. Исса анга: «„Мени эрим жокъду“ деп сен керти айтдынг;

¹⁸ Сени беш эринг болгъанды, сен энди биргесине жашагъан адам да сени эринг тюйюлдю; аны тюз айтханса», – деди.

¹⁹ Тиширыу Анга: «Жюйюсхан! Сен файгъамбар кёреме.

²⁰ Бизни аталарыбыз Аллахха бу тауда табыннгандыла; сиз а табыныргъа тийишли жер Иерусалимдеди дейсиз», – деди.

²¹ Исса анга: «Манга ийнан, тиширыу, аллай заман келеди, Атагъа, ол заманда не бу тауда эм не Иерусалимде табынып къаллыкъ тюйюлсюз.

²² Сиз билмегенигизге табынасыз, биз а билгенибизге табынабыз; нек десенг къутхарыу иудейлиледенди.

²³ Алай а заман келликди, энди келген да этгенди, ол заманда уа керти табыныучула Атагъа нюрде бла кертиликде табынырыкъдыла; нек десенг Ата Кесине аллай табыныучула излейди.

²⁴ Аллах нюрдю, Анга табыннганла да нюрде бла кертиликде табыныргъа керекдиле», – деди.

²⁵ Тиширыу Анга: «Христос атлы Масих келлигин билеме. Ол келсе, бизге барын да билдирир», – деди.

²⁶ Исса анга: «Сени бла сёлеше тургъан, Ол Менме», – деди.

²⁷ Ол заманда Аны сохталары келдиле, Аны тиширыу бла сёлешгенине сейирсиндиле; алай болгъанлыкъгъа: «Сен не сурайса?» неда «Нени юсюнден сёлешесе ол тиширыу бла?» – деп, бири да айтмады.

²⁸ Сора тиширыу, суу ташыучу сауутун къоюп, шахаргъа къайтып, адамлагъа:

²⁹ «Барыгъыз, мени битеу этгенлерими айтхан Адамгъа къарагъыз: Ол Масих болурму экен?» – деди.

³⁰ Ала, шахардан чыгъып, Исса таба тебиредиле.

³¹ Ол заманда сохтала Андан: «Устаз! Бир зат аша», – деп тиледиле.

³² Ол а алагъа: «Мени ашым барды, аны уа сиз билмейсиз», – деди.

³³ Сохтала бир-бирлерине: «Анга биреу ашарыкъмы келтирген болур?» – дей эдиле.

³⁴ Исса алагъа: «Мени ашым Мени Ийгенни буйругъун толтурмакълыкъды эм Аны ишин битдирмекликди.

³⁵ „Энтда тёрт айдан сора оракъла заман жетер“ демеймисиз сиз? Мен а сизге айтама: кёзлеригизни кётюрюгюз да, сабанлагъа къарагъыз, ала къалай агъаргъандыла эм орургъа жетгендиле.

³⁶ Оруучу хакъын алады эм ёмюрлюк жашаугъа тирлик жыяды; алай бла себиучю да, оруучу да бирге къууанч этерикдиле.

³⁷ Нек десегиз бу ишни юсюнде: „Биреу себеди, башхасы уа орады“ деген сёз тюздю.

³⁸ Мен сизни сиз урунмагъанны орургъа ийгенме. Башхала уруннгандыла, сиз а аланы урунууларындан хайырланнгансыз», – деди.

³⁹ Сора ол шахардан кёп самариялыла: «Ол мени битеу этгенлерими айтханды», – деп шагъатлыкъ этген тиширыуну сёзю бла Иссагъа ийнандыла.

⁴⁰ Ол себепден, самариялыла Иссагъа келген заманда, Андан алада бир аз турурун тиледиле; Ол да анда эки кюн турду.

⁴¹ Иссаны Кеси сёзюн эшитгенде, Анга андан да кёп адамла ийнандыла.

⁴² Ол тиширыугъа уа: «Бизни ийнаныуубуз энди сени сёзлеринге кёре тюйюлдю; нек десенг Аны айтханын кесибиз эшитдик эм Ол хакъ керти, дунияны Къутхарыучусу Масих болгъанын билдик», – дей эдиле.

Патчахны ёзюрюню жашы сау этиледи

⁴³ Эки кюн озгъандан сора уа Ол, андан чыгъып, Галилеягъа кетди;

⁴⁴ Нек десегиз файгъамбаргъа кеси ата журтунда хурмет этилмейди деп, Исса Кеси шагъатлыкъ этген эди.

⁴⁵ Ол Галилеягъа келген заманда, Галилеялыла Аны къабыл этдиле; нек десегиз ала да байрамгъа баргъан эдиле эмда байрам заманда Аны Иерусалимде битеу этген ишлерин кёрген эдиле.

⁴⁶ Алай бла Исса дагъыда, анда Кеси сууну чагъыргъа бургъан, Галилеяны Къана элине келди. Кафарнахумда патчахны бир ёзюрю бар эди, аны уа жашы ауруп эди.

⁴⁷ Ол, Иссаны Иудеядан Галилеягъа келгенин эшитип, Анга барды эм келип аны жашын сау этерин Андан тиледи. Ол жаш а ёлюрге жетип тура эди.

⁴⁸ Исса анга: «Сиз, илишанла бла сейирликле кёрмесегиз, ийнанырыкъ тюйюлсюз», – деди.

⁴⁹ Патчахны ёзюрю Анга: «Раббий! Сабийим ёлюп къалгъынчы кел», – деди.

⁵⁰ Исса анга: «Бар, жашынг жашарыкъды», – деди. Ол, Исса анга айтхан сёзге ийнанып, къайтып кетди.

⁵¹ Жолда анга аны къуллары жолугъуп: «Жашынг сау болгъанды», – дедиле.

⁵² Ол алагъа: «Ол къайсы сагъатда иги болгъанды?» – деп сорду. Анга: «Тюнене сагъат жетиде аны къызыуу кетген эди», – дедиле.

⁵³ Исса анга: «Сени жашынг сау болгъанды», – деп айтхан, ол сагъат болгъанын, жашны атасы андан билди. Сора кеси да, битеу юйюрю да Иссагъа ийнандыла.

⁵⁴ Бу экинчи илишанны Исса Иудеядан Галилеягъа къайтханында этген эди.