Ахия 3 - Сыйлы Инжил бла Забур

Исса бла Никодим

¹ Фарисейлени арасында иудейли таматаладан бирлери, Никодим атлы биреу бар эди.

² Ол, Иссагъа кече келип, Анга: «Устаз! Сен Аллахдан келген Устаз болгъанынгы биз билебиз; нек десенг бир киши да, Аллах аны бла бирге болмаса, Сен этген илишанланы эталлыкъ тюйюлдю», – дегенди.

³ Исса анга жууапха: «Кертисин, кертисин айтама санга: огъартындан туумагъан адам, Аллахны Патчахлыгъын кёраллыкъ тюйюлдю», – деди.

⁴ Никодим Анга: «Адам къарт болгъанлай, тууаргъа къалай болаллыкъды? Сора ол анасыны къарынына экинчи кере кирип, тууаргъамы болалыр?» – деди.

⁵ Исса анга: «Кертисин, кертисин айтама санга: суудан бла Сыйлы Нюрден туумагъан адам Аллахны Патчахлыгъына кираллыкъ тюйюлдю.

⁶ Чархдан туугъан чархды, Нюрден туугъан а нюрдю.

⁷ Мен санга: „Сиз огъартындан тууаргъа керексиз“ деп айтханыма сейирсинме.

⁸ Жел къайда сюйсе, анда урады, аны ауазын да эшитесе, къайдан келгенин бла къайры кетгенин а билмейсе. Нюрден туугъан хар адамгъа да алай болады», – деп жууап этди.

⁹ Никодим Анга жууапха: «Ол къалай болургъа боллукъду?» – деди.

¹⁰ Исса анга жууап берип: «Сен, Израильни устазы, быланыдамы билмейсе?

¹¹ Кертисин, кертисин айтама санга: Биз билгенибизни юсюнден айтабыз эм кёргенибизни юсюнден шагъатлыкъ этебиз, сиз а Бизни шагъатлыгъыбызны къабыл этмейсиз.

¹² Мен сизге жердегилени юсюнден айтханымда, сиз ийнанмай эсегиз, сора сизге кёкдегилени юсюнден айтсам а, къалай ийнанырыкъсыз?

¹³ Кёкде болуп тургъан, кёкден тюшген Адам Улудан башха бир киши да кёкге чыкъмагъанды.

¹⁴ Муса къум тюзде жилянны ёрге къалай кётюрген эсе, Адам Улу да,

¹⁵ Анга ийнаннган хар адам, жоюлмай, ёмюрлюк жашаулу болур ючюн, алай ёрге кётюрюлюрге керекди.

¹⁶ Нек десенг Аллах дунияны алай бек сюйгенинден, Кесини жангыз Уланын, Анга ийнаннган хар адам, жоюлмай, ёмюрлюк жашаулу болур ючюн бергенди.

¹⁷ Нек десенг дуниягъа Аллах Кесини Уланын дуниягъа сюд этер ючюн иймегенди, алай а дуния Аны юсю бла къутхарылыр ючюн ийгенди.

¹⁸ Анга ийнаннганнга сюд этилмейди, ийнанмагъаннга уа сюд этилип бошалгъанды, нек десенг Аллахны жангыз Уланыны атына ийнанмагъанды.

¹⁹ Сюд а муну ючюн болады: дуниягъа жарыкъ келгенди, алай а адамла, этген ишлери аман болгъанлары себепли, жарыкъдан эсе къарангыны бек сюйгендиле.

²⁰ Нек десенг аманлыкъ этген хар адам жарыкъны кёрюп болмайды эм, кесини ишлери ачыкъ болмаз ючюн, жарыкъгъа бармайды.

²¹ Кертиликни жашауда бардырыучу уа, ишлерин Аллахны болушлугъу бла этгени белгили болур ючюн, жарыкъгъа барады».

Ахия файгъамбарны шагъатлыгъы

²² Андан сора Исса, сохталары бла Иудеяны жерине келип, анда ала бла туруп, адамланы сууда кёмюлдюре эди.

²³ Аны кибик Ахия да Салимге жууукъ Эйнонда сууда кёмюлдюре эди; нек десенг анда суу кёп эди; адамла ары келип сууда кёмюлдюрюле эдиле.

²⁴ Ахия алыкъа тюрмеге салынмагъан эди.

²⁵ Ол заманда Ахияны сохталарыны бла иудейлилени араларында тазаланыуну юсюнден даулаш чыкъды.

²⁶ Ала, Ахиягъа келип, анга: «Устаз! Ол, Кеси сени бла Иорданны ары жанында болгъан эм Аны юсюнден сен шагъатлыкъ этген, ма, Ол адамланы сууда кёмюлдюреди эм бары да Анга барадыла», – дедиле.

²⁷ Ахия алагъа жууапха: «Адам, анга кёкден берилмесе, бир зат да алаллыкъ тюйюлдю.

²⁸ Мен Масих тюйюлме, алай а Аны аллына ийилгенме деп айтханыма сиз кесигиз манга шагъатсыз.

²⁹ Келин кимни эсе, киеу олду. Киеуню къатында туруп, анга тынгылагъан нёгери уа, киеуню ауазын эшитип, бек къууанады. Ма, мени къууанчым алай толду.

³⁰ Ол ёсерге керекди, мен а гитче болургъа керекме.

³¹ Огъартындан Келген, барындан да бийикди; жерден болгъан а – жерденди эм жердегини юсюнден айтады. Кёкден Келген барындан да бийикди.

³² Ол кёргенинден, эшитгенинден шагъатлыкъ этеди; Аны шагъатлыгъын а бир киши да къабыл этмейди.

³³ Аны шагъатлыгъын къабыл этген киши, Аллахны кертичи болгъанына мухур басханды.

³⁴ Аллах ийген Киши Аллахны сёзлерин айтады; нек десегиз Аллах Нюрюн ёлчелеп бермейди.

³⁵ Ата Уланын сюеди эм барын да Аны къолуна бергенди.

³⁶ Уланнга ийнаннганны ёмюрлюк жашауу барды; Уланнга бойсунмагъан а жашау кёрлюк тюйюлдю, Аллах ол адамгъа чамланнганлай турады».