Ахия 2 - Сыйлы Инжил бла Забур

Иссаны биринчи илишаны

¹ Ючюнчю кюн Галилеяны Къана элинде некях той бар эди, Иссаны анасы да анда эди.

² Ол тойгъа Исса да, Аны сохталары да чакъырылгъан эдиле.

³ Анда чагъыр жетмегенде, Иссаны анасы уа: «Аланы чагъырлары жокъду», – деди.

⁴ Исса Анга: «Тиширыу, Манга бла санга не? Алыкъа Мени заманым келмегенди», – деди.

⁵ Аны анасы шапалагъа: «Ол сизге не айтса, аны этигиз», – деди.

⁶ Алайда уа, иудейлилени тазаланыу адетлерине кёре тургъан, экишер неда ючюшер ёлчеу сыйыннган, ташдан ишленнген алты суу сауут бар эди.

⁷ Исса алагъа: «Сауутланы суудан толтуругъуз», – деди. Ала сауутланы башына дери толтурдула.

⁸ Исса алагъа: «Энди къуюгъуз да, тойну таматасына элтигиз», – деди. Ала элтгендиле.

⁹ Тамата чагъыр болуп къалгъан сууну уртлап кёргенди. Ол а бу чагъыр къайдан болгъанын билмей эди, жаланда сууну къуйгъан шапала биле эдиле. Тойну таматасы, киеуню чакъырып,

¹⁰ Анга: «Хар адам алгъа иги чагъырны, кёп ичгенлеринден сора уа осалын береди; сен а иги чагъырны эндиге дери сакълагъанса!» – деди.

¹¹ Исса, бу биринчи илишанын Галилеяны Къана элинде этип, Кесини аламатлыгъын кёргюзтдю, сора Аны сохталары Анга ийнандыла.

Исса сатыу-алыу этгенлени табыныучу юйден къыстайды

¹² Андан сора Ол Кеси, анасы бла, къарындашлары эм сохталары бла бирге Кафарнахумгъа келди; сора анда бир бёлек кюн турдула.

¹³ Иудейлилени Къутхарылыу байрамлары жууукълаша эди, Исса да Иерусалимге келди.

¹⁴ Анда, табыныучу юйню арбазларында, ёгюзле, къойла эм кёгюрчюнле сатханланы бла алайда олтургъан ахча алышыучуланы кёрдю.

¹⁵ Сора, жыжымладан къамичи этип, барын да къойла эм ёгюзле бла бирге, табыныучу юйню арбазларындан къыстады, алышыучуланы ахчаларын да чачды, аланы столларын да аудурду.

¹⁶ Кёгюрчюнлени сатханлагъа да: «Быланы мындан кетеригиз, Мени Атамы юйюн сатыу-алыу юй этмегиз», – деди.

¹⁷ Ол заманда Аны сохталары: «Сени юйюнг ючюн эришлигим Мени ашап къояды», – деп жазылгъанны эслерине тюшюрдюле.

¹⁸ Ол заманда иудейлиле Иссагъа: «Былай этерге эркинлигинг болгъанын Сен бизге къаллай илишан бла кёргюзтюрюксе?» – деп сордула.

¹⁹ Исса алагъа жууапха: «Бу табыныучу юйню бузугъуз, Мен аны юч кюннге къурарма», – деди.

²⁰ Ол затха иудейлиле: «Бу табыныучу юй къыркъ алты жыл ишленнгенди, Сен а аны юч кюндеми ишлериксе?» – дедиле.

²¹ Исса айтхан «табыныучу юй» а Кесини чархы эди.

²² Исса ёлгенледен тиргизилген заманда уа, Ол алай айтханын, Аны сохталары эслерине тюшюрген эдиле эм Китаплагъа да, Иссаны ол айтхан сёзюне да ийнаннган эдиле.

²³ Исса Иерусалимде Къутхарылыу байрамда болгъан заманда, кёпле, Ол этген илишанланы кёрюп, Аны атына ийман салдыла.

²⁴ Алай болгъанлыкъгъа Исса Кеси алагъа ышанып Кесин бермеди, нек десегиз барысын да биле эди.

²⁵ Эм биреу адамны юсюнден Анга шагъатлыкъ этерге кереклиси жокъ эди, нек десегиз адамны ичиндегин Кеси биле эди.