Ахия 18 - Сыйлы Инжил бла Забур

Исса тутулады

¹ Исса, бу сёзлени айтхандан сора, сохталары бла чыгъып, Кедрон сууну ары жанына ётдю, анда уа терек бахча бар эди. Кеси да, Аны сохталары да ары кирдиле.

² Ол жерни уа Иссаны сатхан Иуда да биле эди, нек десегиз Исса анда Кесини сохталары бла кёп кере жыйыла тургъан эди.

³ Алай бла Иуда, аскерчиледен бир жыйын да, баш дин къуллукъчуладан бла фарисейледен къалауурла да алып, фанарла бла, чыракъла бла, сауутла бла ары келди.

⁴ Исса уа, Анга не боллугъун барын да билип, алгъа чыгъып алагъа: «Кимни излейсиз?» – деди.

⁵ Анга жууапха: «Назаретли Иссаны», – дедиле. Исса алагъа: «Ол Менме», – деди. Аны сатхан Иуда да ала бла тура эди.

⁶ Исса алагъа: «Ол Менме», – деген заманда, ала артха туруп жерге аудула.

⁷ Дагъыда алагъа: «Кимни излейсиз?» – деп сорду. Ала да: «Назаретли Иссаны», – дедиле.

⁸ Исса алагъа: «Ол Менме деп айтдым Мен сизге. Мени излей эсегиз, къоюгъуз быланы, кетсинле», – деп жууап этди.

⁹ Исса: «Сен Манга бергенледен, Мен бир кишини да жоймагъанма», – деп айтхан сёзю къабыл болур ючюн алай айтды.

¹⁰ Шимон Петер а, жанындагъы къылычын чыгъарып, баш дин къуллукъчуну къулун уруп, аны онг къулагъын кесип тюшюрдю; ол къулну аты Малх эди.

¹¹ Исса уа Петерге «Къылычынгы къынына сал, Манга Ата буюргъан аякъны Мен ичмей къалай къалырма?» – деди.

¹² Ол заманда аскерчиле, аскер башчысы эмда иудейли къалауурла Иссаны тутуп байладыла.

¹³ Сора Аны бек алгъа Хананнга элтдиле, нек десегиз ол, ол жыл баш дин къуллукъчу болгъан Къаяфаны къайын атасы эди:

¹⁴ Халкъ ючюн бир адамны ёлгени игиди деп, иудейлилеге оноу этген Къаяфа уа ол эди.

Петер Иссаны биринчи кере инкяр этеди

¹⁵ Иссаны ызындан Шимон Петер бла бир башха сохта бара эдиле; бу сохта уа баш дин къуллукъчугъа таныш эди, кеси да Исса бла баш дин къуллукъчуну арбазына кирди.

¹⁶ Петер а тышында, къабакъны артында тохтагъан эди. Сора баш дин къуллукъчугъа таныш болгъан сохта чыгъып, эшик сакълаучу тиширыугъа айтып, Петерни ары кийирди.

¹⁷ Былайда эшик сакълаучу къарауаш, Петерге: «Сен да бу Адамны сохталарындан тюйюлмюсе?» – деди. Ол а: «Угъай», – деди.

¹⁸ Ол заманда къулла бла къалауурла, сууукъ болгъаны себепли, от этип, сюелип жылына эдиле; Петер да ала бла сюелип жылына эди.

Баш дин къуллукъчуну тинтиую

¹⁹ Баш дин къуллукъчу уа Иссагъа Аны сохталарыны эм Аны юйретиуюню юсюнден сорду.

²⁰ Исса анга: «Мен дуниягъа ачыкъ айтханма; Мен иудейлиле дайым жыйылыучу синагогалада бла табыныучу юйде хар заманда да юйретип тургъанма, жашыртын бир зат да айтмагъанма.

²¹ Манга не сораса? Мен не айтханымы эшитгенлеге сор; ма ала биледиле Мени не айтханымы», – деп жууап берди.

²² Ол муну айтхан заманда, къаршыда тургъан къалауурладан бирлери: «Сен баш дин къуллукъчугъа алай жууапмы этесе?» – деп, Иссаны жаягъына урду.

²³ Исса анга: «Мен терс айтхан эсем, кёргюзт терслигими; ахшы айтхан эсем а, Мени нек ураса?» – деп жууап этди.

²⁴ Ханан Иссаны, байланнганлай, баш дин къуллукъчу Къаяфагъа ийди.

Петер Иссаны экинчи эм ючюнчю кере инкяр этеди

²⁵ Шимон Петер а сюелип жылына эди. Былайда анга: «Сен да Аны сохталарындан тюйюлмюсе?» – дедиле. Ол инкяр этип: «Угъай», – деди.

²⁶ Баш дин къуллукъчуну къулларындан бирлери Петер къулагъын кесген адамны жууугъу эди. Ол Петерге: «Мен сени Аны бла терек бахчада кёрмегенмеми?» – деди.

²⁷ Петер дагъыда инкяр этди эмда олсагъатдан хораз къычырды.

Исса Иудеяны римли оноучусу Пилатны аллында

²⁸ Иссаны Къаяфадан преториягъа элтдиле. Танг атхан эди. Харам болмай, Къутхарылыу байрамны ашын ашаргъа тийишли турур ючюн, ала преториягъа кирмедиле.

²⁹ Пилат алагъа чыгъып: «Бу Адамны сиз не бла терслейсиз?» – деди.

³⁰ Ала анга жууапха: «Ол аманлыкъчы болмаса эди, биз Аны тутуп санга бермез эдик», – дедиле.

³¹ Пилат алагъа: «Аны кесигиз алыгъыз, кесигизни законугъуз бла Анга сюд этигиз», – деди. Иудейлиле анга: «Бир киши ни да ёлтюрюрге сюд этерге бизни эркинлигибиз жокъду», – дедиле.

³² Бу затла Исса Кесини къаллай ёлюм бла ёллюгюн ангылатып айтхан сёзю къабыл болур ючюн болдула.

³³ Ол заманда Пилат, дагъыда преториягъа кирип, Иссаны чакъырып, Анга: «Сен Иудей Патчахмыса?» – деди.

³⁴ Исса анга: «Муну сен кесингденми айтаса, огъесе санга Мени юсюмден башхаламы айтхандыла?» – деп жууап этди.

³⁵ Пилат Иссагъа: «Мен иудейлимеми да? Сени халкъынг бла баш дин къуллукъчула бергендиле Сени манга. Сен не этгенсе?» – деп жууап берди.

³⁶ Исса анга: «Мени Патчахлыгъым бу дуниядан тюйюлдю; Мени Патчахлыгъым бу дуниядан болса эди, Манга къуллукъ этгенле Мен иудейлилени къолларына берилмез ючюн кюрешир эдиле; алай а Мени Патчахлыгъым мындан тюйюлдю», – деп жууап берди.

³⁷ Пилат Анга: «Сора Сен Патчахмыса?» – деди. Исса анга: «Манга Патчах деп айтхан сенсе; Мен хакъ кертини юсюнден шагъатлыкъ этер ючюн туугъанма эм аны ючюн дуниягъа келгенме. Хакъ керти жанлы болгъан хар адам Мени ауазыма тынгылайды», – деп жууап берди.

³⁸ Пилат Анга: «Неди хакъ керти?» – деди. Муну айтханлай, дагъыда иудейлилеге чыгъып, алагъа: «Мен Анда бир тюрлю терслик тапмайма.

³⁹ Къутхарылыу байрамда мен сизге биреуню эркин этген адетигиз барды: сизге Иудей Патчахны эркин этсем сюемисиз?» – деди.

⁴⁰ Ол заманда жангыдан бары да: «Аны угъай, Бараббаны!» – деп къычырдыла. Барабба уа аманлыкъчы эди.