Ахия 16 - Сыйлы Инжил бла Забур

¹ Муну Мен сизге сиз иймандан таймаз ючюн айтханма.

² Сизни синагогаладан къыстарыкъдыла, сизни ёлтюрген хар адам аны бла Аллахха къуллукъ этген сунарыкъ заман окъуна келеди.

³ Алай этерикдиле, нек десегиз не Атаны, не Мени танымагъандыла.

⁴ Алай а Мен муну сизге, сиз, ол заман келгенде, Мен сизге муну юсюнден айтханны эсигизге келтирир ючюн айтханма; алгъындан а муну сизге, сизни бла болгъаным себепли айтмагъанма».

Сыйлы Нюрню иши

⁵ «Энди уа Мени Ийгеннге барама, сизден биригиз да Манга: „Къайры бараса?“ деп сормайды.

⁶ Алай а, Мен сизге муну айтханым себепли, жюрегигиз къайгъыдан толгъанды.

⁷ Алай болсада, Мен сизге тюзюн айтама, сизге Мени кетгеним игиди. Нек десегиз Мен кетмесем, Жюрек Жапсарыучу сизге келлик тюйюлдю; кетсем а, Аны сизге иерикме.

⁸ Ол, келип, гюняхны, тюзлюклюлюкню эм сюдню юсюнден дунияны терслигин айгъакъларыкъды дуниягъа:

⁹ Гюняхны юсюнден – нек десегиз Манга ийнанмайдыла;

¹⁰ Тюзлюклюлюгюмю юсюнден – нек десегиз Мен Атама барама эм сиз энди Мени кёрмезсиз;

¹¹ Сюдню юсюнден да – нек десегиз бу дунияны бийине сюд этилгенди.

¹² Энтда сизге кёп айтырыгъым барды, алай а сиз энди сыйындыраллыкъ тюйюлсюз.

¹³ Ол, Хакъ Кертини Нюрю келген заманда уа, сизни хар тюрлю кертиликге тюзетирикди; нек десегиз Ол Кесинден айтырыкъ тюйюлдю, алай а не эшитсе да, аны айтырыкъды эмда боллукъну сизге билдирликди.

¹⁴ Ол Мени махтаулу этерикди, нек десегиз Меникинден алып, сизге билдирликди.

¹⁵ Атамы неси бар эсе да, бары да Меникиди. Меникинден алып, сизге билдирликди деп айтханым аны ючюндю.

¹⁶ Бираздан сиз Мени кёрлюк тюйюлсюз, сора дагъыда бираздан Мени кёрлюксюз, нек десегиз Мен Атагъа барама», – деди.

Бушууугъуз къууанчха буруллукъду

¹⁷ Былайда Аны сохталарындан бир къауумла бири-бирине: «Ол бизге: „Бираздан Мени кёрлюк тюйюлсюз, сора дагъыда бираздан Мени кёрлюксюз“ эм „Мен Атагъа барама“ деп не айтады?» – дедиле.

¹⁸ Алай бла, ала: «Ол „бираздан“ деп не айтады? Билмейбиз не айтханын», – дей эдиле.

¹⁹ Исса, Анга сорургъа излегенлерин ангылап, алагъа: «Мен: „Бираздан Мени кёрлюк тюйюлсюз, сора дагъыда бираздан Мени кёрлюксюз“ деп айтханымы юсюнденми сорасыз сиз бир-биригизге?

²⁰ Кертисин, кертисин айтама сизге, сиз жилярыкъсыз эм сарнарыкъсыз, дуния уа къууанч этерикди; сиз бушуулу боллукъсуз, алай а сизни бушууугъуз къууанчха буруллукъду.

²¹ Тиширыу, къозлай туруп, азап чегеди; нек десегиз аны сагъаты жетгенди. Сабий тапханынлай а, дуниягъа бир адам туугъанына къууаннганындан, ол къыйналгъанын унутады.

²² Энди сизни да алай бушууугъуз барды; алай а Мен сизни энтда кёрлюкме, сора сизни жюрегигиз къууанырыкъды, сизни къууанчыгъызны сизден бир киши да сыйырлыкъ тюйюлдю.

²³ Ол кюн сиз Манга бир затны юсюнден да сорлукъ тюйюлсюз. Кертисин, кертисин айтама сизге: Мени атым бла Атадан не тилесегиз да, берликди сизге.

²⁴ Эндиге дери сиз Мени атым бла бир зат да тилемегенсиз; тилегиз, алырсыз, сизни къууанчыгъыз тамамлы болсун.

²⁵ Эндиге дери Мен сизге оюм берген таурухла бла айтып тургъанма; алай а Мен сизге энди оюм берген таурухла бла айтмай, Атаны юсюнден туура билдирир заман келеди.

²⁶ Ол кюн Мени атым бла тилериксиз, сизни ючюн Атадан Мен тилерикме демейме сизге.

²⁷ Нек десегиз Ата Кеси сизни сюеди; сиз Мени сюйгенигиз эм Мен Аллахдан чыгъып келгениме ийнаннганыгъыз себепли сюеди сизни.

²⁸ Мен, Атадан чыгъып, дуниягъа келгенме эм дагъыда дунияны къоюп, Атагъа барама», – деди.

²⁹ Аны сохталары Анга: «Ма энди Сен туура айтаса эм бир тюрлю таурух айтмайса;

³⁰ Сен барын да билгенинги эм Санга киши сорур керекли болмагъанынгы, энди кёребиз; аны себепли Сен Аллахдан чыгъып келгенинге ийнанабыз», – дедиле.

³¹ Исса алагъа жууапха: «Эндими ийнанасыз?

³² Ма, сагъат жетеди, энди жетген да этгенди, сиз хар биригиз да кеси юйлеригизге чачылып кетериксиз эм Мени жангызлай къоярыкъсыз. Алай а Мен жангыз тюйюлме, нек десегиз Ата Мени биргемеди.

³³ Муну Мен сизге, сизни Менде жюрек ырахатлыгъыгъыз болсун деп айтханма. Бу дунияда азап чегериксиз; алай а таукел этигиз: Мен дунияны хорлагъанма!» – деди.