Ахия 15 - Сыйлы Инжил бла Забур

Жюзюм терек бла бутакъла

¹ «Мен керти Жюзюм Терекме, Мени Атам а Жюзюмчюдю.

² Менде болуп кёгет бермеген хар бутакъны Ол кесип атады; кёгет берген хар бутакъны да дагъыда кёп кёгет берир ючюн тазалайды.

³ Сиз энди Мен сизге билдирген сёз бла тазаланнгансыз.

⁴ Менде болуп туругъуз, Мен да сизде турайым. Бутакъ, терекде турмаса, кесикесинден кёгет бералмагъаны кибик, Менде болуп турмасагъыз, сиз да битимли болмазсыз.

⁵ Мен Жюзюм Терекме, сиз а бутакъласыз; кеси Менде болуп тургъан, Мен да анда тургъан адам кёп битимли болады; нек десегиз Менсиз бир зат да эталлыкъ тюйюлсюз.

⁶ Менде болуп турмагъан адам, бутакъ кибик, тышына атыллыкъды эмда къурурукъду; аллай бутакъланы уа, жыйып, отха атадыла, ала да кюедиле.

⁷ Менде болуп турсагъыз эм Мени сёзлерим да сизде болуп турсала, не сюйсегиз да тилегиз, сизге берилликди.

⁸ Сиз кёп битим келтирсегиз эм Мени сохталарым болсагъыз, аны бла Мени Атам махтаулу боллукъду.

⁹ Ата Мени сюйгени кибик, Мен да сизни сюйгенме; Мени сюймеклигимде болуп туругъуз.

¹⁰ Мен Атамы фарызларын тутуп, Аны сюймеклигинде болуп тургъаным кибик, сиз да Мени фарызларымы тутсагъыз, Мени сюймеклигимде болуп турлукъсуз.

¹¹ Муну Мен сизге Мени къууанчым сизде болуп турсун эм сизни къууанчыгъыз тамам болсун деп айтдым.

¹² Мен сизни сюйгеним кибик, бир-биригизни сюйюгюз; Мени фарызым буду.

¹³ Кесини шуёхлары ючюн кесини жанын бергенден уллу сюймеклик жокъду.

¹⁴ Мен сизге фарыз этгенни толтура эсегиз, сиз Мени шуёхларымсыз.

¹⁵ Мен энди сизге къулла деп айтмайма: нек десегиз къул аны бийи не этгенин билмейди, Мен а сизге шуёхларым деп атагъанма; нек десегиз Атамдан эшитгенлерими барын да сизге айтханма.

¹⁶ Мени сиз сайламагъансыз, Мен сайлагъанма сизни, сиз барыр ючюн эм битим келтирир ючюн эмда сизни битимигиз болуп турур ючюн салгъанма сизни; Атадан Мени атым бла не тилесегиз да, Ол сизге берир ючюн алай этгенме.

¹⁷ Муну сизге фарыз этеме: бир-биригизни сюйюгюз».

Дунияны кёрюп болмау

¹⁸ «Сизни дуния кёрюп болмай эсе, Мени уа сизден алгъа кёрюп болмагъанын билигиз.

¹⁹ Сиз дуниядан болсагъыз эди, дуния кесиникин сюер эди; сиз а дуниядан тюйюлсюз, Мен сизни дуниядан сайлагъанма; дуния сизни аны ючюн кёрюп болмайды.

²⁰ Мен сизге: „Къул кесини бийинден уллу тюйюлдю“ деп айтхан сёзню эсигизде тутугъуз. Манга зулму этген эселе, сизге да зулму этерикдиле; Мени сёзюмю тутхан эселе, сизни сёзюгюзню да тутарыкъдыла.

²¹ Алай а быланы барын да Мени атым ючюн сизге этерикдиле, нек десегиз Мени Ийгенни танымайдыла.

²² Мен, келип, алагъа айтмагъан болсам эди, алагъа гюнях болмаз эди; энди уа аланы гюняхларына кечгинлик жокъду.

²³ Мени кёрюп болмагъан Мени Атамы да кёрюп болмайды.

²⁴ Мен аланы араларында, аллай ишлени бир киши да этмеген ишле этмесем эди, алагъа гюнях болмаз эди; энди уа кёрген да этгендиле эм Мени да, Мени Атамы да кёрюп болмай къалгъандыла.

²⁵ Бу уа аланы Законларында: „Мени керексизге кёрюп болмадыла“ деп жазылгъан сёз къабыл болур ючюн болгъанды.

²⁶ Мен сизге Атадан иерик Жюрек Жапсарыучу – Кеси Атадан чыгъа тургъан Хакъ Кертини Нюрю – келген заманда уа, Ол Мени юсюмден шагъатлыкъ этерикди.

²⁷ Аны кибик сиз да шагъатлыкъ этериксиз, нек десегиз сиз алгъындан башлап Мени биргемесиз.