Ахия 13 - Сыйлы Инжил бла Забур

Жууашлыкъны юлгюсю

¹ Къутхарылыу байрамны аллында Исса, Аны бу дуниядан Атасына кетер сагъаты жетгенин билип, Кесини дунияда болгъанларын сюйюп, аланы ахырына дери сюйгенин иш бла кёргюзтдю.

² Ушхууурну заманында, Шимон улу Иуда Искариотну жюрегине ибилис, Иссаны сатар фикирни салгъан эди.

³ Исса, барын да Ата Аны къолуна бергенин эмда Ол Аллахдан чыгъып келгенин эм Аллахха къайтырыгъын билип,

⁴ Ушхууурдан туруп, юсюнден тыш кийимин тешип, жан жаулукъ алып, белине къысды.

⁵ Андан сора, къумгъаннга суу къуюп, сохталарыны аякъларын жуууп эм белине къысхан жан жаулукъ бла сюртюп башлады.

⁶ Исса Шимон Петерге жетгенде, Петер Анга: «Раббий! Сен мени аякъларымы къалай жууарса?» – деди.

⁷ Исса анга жууапха: «Мени не этгеними энди сен билмейсе, артда ангыларыкъса», – деди.

⁸ Петер Анга: «Мени аякъларымы ёмюрде да жуумазса!» – деди. Исса анга: «Сени жуумасам, Мени бла юлюшюнг жокъду», – деп жууап этди.

⁹ Шимон Петер Анга: «Раббий! Жангыз аякъларымы угъай, къолларымы да, башымы да жуу!» – деди.

¹⁰ Исса анга: «Чархы жууулгъанны жаланда аякъларын жууаргъа керекди, нек десенг битеу тазады. Сиз да тазасыз, барыгъыз тюйюлсюз ансы», – деди.

¹¹ Нек десегиз Ол Аны ким сатарыгъын биле эди, аны себепли айтхан эди: «Сиз барыгъыз таза тюйюлсюз», – деп.

¹² Аланы аякъларын жуууп, тыш кийимин кийгенден сора, дагъыда столну къатына олтуруп, алагъа: «Мен сизге не этгеними билемисиз?

¹³ Сиз Манга Устаз эм Раббий деп айтасыз эмда тюз айтасыз, нек десегиз Мен туура олма.

¹⁴ Алай бла Мен, Раббий эм Устаз, сизни аякъларыгъызны жуугъан эсем, сиз да бирбиригизни аякъларын жууаргъа керексиз.

¹⁵ Нек десегиз Мен сизге этгенни сиз да этер ючюн, Мен сизге юлгю бергенме.

¹⁶ Кертисин, кертисин айтама сизге: къул кесини бийинден уллу тюйюлдю, ийилген да аны ийгенден уллу тюйюлдю.

¹⁷ Быланы биле эсегиз, толтурсагъыз, сиз насыплысыз».

Исса сатылады

¹⁸ «Сизни барыгъызны юсюнден айтмайма: Мен билеме къайсыланы сайлагъанымы. Алай а Китапда: „Мени биргеме ётмек ашагъан Манга табанын кётюрдю“ деп жазылгъан толур ючюн былай болады.

¹⁹ Ол зат болгъан заманда, ол Мен болгъаныма, сиз ийнаныр ючюн, ол болурдан алгъа, энди сизге айтама.

²⁰ Кертисин, кертисин айтама сизге: Мен кимни ийсем, аны къабыл этген Мени къабыл этеди, Мени къабыл этген а Мени Ийгенни къабыл этеди», – деди.

²¹ Муну айтханлай, Иссаны жюреги жунчуп: «Кертисин, кертисин айтама сизге: сизден биригиз Мени сатарыкъды», – деп шагъатлыкъ этди.

²² Ол заманда сохтала, Ол кимни юсюнден айтханын ангыламай, сейирсинип, бирбирлерине къарадыла.

²³ Иссаны сохталарындан бири уа Аны кёкюрегине таянып олтура эди. Исса аны бек сюйюучю эди.

²⁴ Анга Шимон Петер, Исса кимни юсюнден айтханын сорургъа белги берди.

²⁵ Ол, Иссаны кёкюрегине къысылып, Анга: «Раббий! Кимди ол?» – деди.

²⁶ Исса уа: «Мен ётмек кесекни булгъап кимге берсем, олду», – деп жууап этди. Эм, ётмек кесекни булгъап, Шимон улу Иуда Искариотха берди.

²⁷ Иуда ётмек кесекни алгъанлай, анга шайтан кирди. Ол заманда Исса анга: «Не этерик эсенг да, терк эт», – деди.

²⁸ Алай а Исса муну анга неге айтханын олтургъанладан бири да ангыламады.

²⁹ Иудада ахча кюбюрчек болгъаны себепли уа, бир къауумла Исса анга: «Байрамгъа бизге керекли затны сатып ал» неда «Жарлылагъа бир зат бер», – деп айтхан суна эдиле.

³⁰ Иуда, ётмек кесекни алгъанлай, олсагъатдан чыкъды; кече уа болгъан эди.

Бир-биригизни сюйюгюз

³¹ Иуда чыкъгъан заманда, Исса: «Энди Адам Улу махтаулу болду, Аллах да Анда махтаулу болду.

³² Аллах Анда махтаулу болгъан эсе, Аллах да Кесинде Аны махтаулу этерикди эмда къысха заманда Аны махтаулу этерикди.

³³ Сабийле! Энди Мен сизни бла кёп турлукъ тюйюлме. Мени излериксиз эмда Мен иудейлилеге, „Мен баргъан жерге сиз келаллыкъ тюйюлсюз“ деп айтханым кибик, энди уа сизге да алай айтама.

³⁴ Сизге жангы фарыз береме: бир-биригизни сюйюгюз. Мен сизни сюйгеним кибик, сиз да бир-биригизни сюйюгюз.

³⁵ Сизни кеси арагъызда сюймеклигигиз болса, сиз Мени сохталарым болгъаныгъызны барысы да андан билликдиле», – деди.

Исса Петер Аны инкяр этеригин билдиреди

³⁶ Шимон Петер Анга: «Раббий! Сен къайры бараса?» – деди. Исса анга: «Мен барлыкъ жерге сен энди Мени ызымдан келаллыкъ тюйюлсе, артда уа келликсе Мени ызымдан», – деп жууап берди.

³⁷ Петер Анга: «Раббий! Мен Сени ызынгдан энди нек бараллыкъ тюйюлме? Мен Сени ючюн жанымы берликме!» – деди.

³⁸ Исса анга былай жууап этди: «Мени ючюн жанынгымы берликсе? Кертисин, кертисин айтама санга: хораз къычыргъынчы, Мени юч кере инкяр этериксе».