Ахия 12 - Сыйлы Инжил бла Забур

Исса Бейтхиниде

¹ Къутхарылыу байрамдан алты кюн алгъа Исса Кеси ёлгенледен тиргизген Лазарь тургъан Бейтхини элге келди.

² Анда Анга ушхууур хазырладыла, Марта да шапалыкъ эте эди, Лазарь а Исса бла олтургъанладан бири эди.

³ Мариям а, нарддан этилген бир гёренке багъалы таза жауну алып, Иссаны аякъларына сюртюп, чачлары бла Аны аякъларын сыйпады; юй жауну ариу ийисинден толду.

⁴ Ол заманда Аны сохталарындан бири болгъан, Аны артда сатарыкъ, Шимон улу Искариот Иуда:

⁵ «Бу жауну юч жюз динаргъа сатып, ахчасын жарлылагъа юлешген иги тюйюлмю эди?» – деп айтды.

⁶ Муну уа ол, жарлылагъа жаны ауругъанындан айтмай эди, гудучу болгъаны себепли айта эди: ахча кюбюрчекни ол тута эди, ары салыннганны да жюрюте эди.

⁷ Исса уа: «Къоюгъуз аны, ол муну Мени асыралыр кюнюме сакълагъанды.

⁸ Жарлыла сизни арагъызда хар заманда да бардыла, Мен а сизни арагъызда хар заманда боллукъ тюйюлме», – деди.

⁹ Иудейлиледен кёбюсю, Иссаны анда болгъанын билип, жаланда Исса ючюн угъай, Ол ёлгенледен тиргизген Лазарьны да кёрюр ючюн келдиле.

¹⁰ Баш дин къуллукъчула уа Лазарьны да ёлтюрюрге бегим этген эдиле.

¹¹ Нек десегиз Лазарьны себебинден иудейлиледен кёпле, келип, Иссагъа ийнана эдиле.

Исса Иерусалимге киреди

¹² Экинчи кюн байрамгъа келген бек кёп халкъ, Исса Иерусалимге келеди деп эшитип,

¹³ Хурма терек бутакъла алып, Аны аллына чыгъып: «Хозана! Раббийни аты бла келген, Израильни Патчахы алгъышлыды!» – деп къычыра эдиле.

¹⁴ Исса уа, гылыу табып, анга минди, Китапда:

¹⁵ «Къоркъма, Сионну къызы, ма, сени Патчахынг, гылыугъа минип келеди», – деп жазылгъаны кибик.

¹⁶ Аны сохталары алгъа муну ангыламагъан эдиле; Исса махтаулу болгъан заманда уа, Аны юсюнден былай жазылгъанын эм муну Анга этгенлерин эслерине тюшюрген эдиле.

¹⁷ Иссаны биргесине болгъан халкъ Ол Лазарьны къабырдан чакъырып чыгъаргъанына эм аны ёлгенледен тиргизгенине шагъатлыкъ эте эди.

¹⁸ Халкъ Иссаны аллына ол себепден чыкъгъан эди, нек десегиз Ол бу илишанны этгенин халкъ эшитген эди.

¹⁹ Фарисейле уа кеси араларында: «Бир затха да жетишалмагъаныгъызны кёрмеймисиз? Битеу дуния Аны ызындан барады», – дей эдиле.

Исса ёллюгюн алгъадан билдиреди

²⁰ Байрамда табыныргъа келгенледе бир къауум греклиле бар эдиле.

²¹ Ала, Галилеядагъы Бейтсайда шахардан болгъан Филипни къатына барып, андан: «Жюйюсхан! Биз Иссаны кёрюрге сюебиз», – деп тиледиле.

²² Филип, барып, муну Эндрейге айтады; андан сора Эндрей бла Филип аны Иссагъа айтадыла.

²³ Исса уа алагъа жууапха: «Адам Улуну махтаулу болур сагъаты келди.

²⁴ Кертисин, кертисин айтама сизге: будай бюртюк, жерге тюшюп, ёлмесе, жангызлай къаллыкъды; ёлсе уа, кёп тирлик берликди.

²⁵ Кесини жанын сюйген аны жоярыкъды; бу дунияда кесини жанын кёрюп болмагъан а, аны ёмюрлюк жашаугъа сакъларыкъды.

²⁶ Манга жумуш этген адам Мени ызымдан келсин, Мен болгъан жерде Мени жумушчум да боллукъду; Манга жумуш этген адамгъа Мени Атам хурмет этерикди.

²⁷ Энди Мени жаным къайгъыдады; сора Мен не айтайым? Ата! Ол сагъатдан Мени къутхар депми айтайым? Алай а Мен ол сагъат ючюн келгенме.

²⁸ Ата! Атынгы махтаулу эт!» – деди. Ол заманда кёкден: «Махтаулу да этгенме эм энтда махтаулу этерикме», – деген ауаз келди.

²⁹ Алайда туруп, муну эшитген халкъ: «Бу кёк кюкюреудю», – дей эди. Башхалары уа: «Анга мёлек сёлешди», – дей эдиле.

³⁰ Исса алагъа: «Бу ауаз Мени ючюн тюйюл, сизни ючюн келди.

³¹ Энди бу дуниягъа сюд этиледи; энди бу дунияны бийи тышына къысталлыкъды;

³² Мен жерден ёрге кётюрюлген заманымда, барысын да Кесиме тартырыкъма», – деди.

³³ Муну Ол, Кесини къаллай ёлюм бла ёллюгюн билдирир ючюн айтхан эди.

³⁴ Халкъ а Анга: «Биз Тауратдан Масих ёмюрде да жашарыкъды деп эшитгенбиз; Адам Улу ёрге кётюрюлюрге керекди деп, Сен а къалай айтаса? Бу Адам Улу кимди?» – деп жууап этди.

³⁵ Ол заманда Исса алагъа: «Энтда бир аз заманнга сизни бла жарыкъ барды; сизни къарангылыкъ басмаз ючюн, жарыкъ болгъан заманда жюрюгюз, къарангыда жюрюген а къайры баргъанын билмейди.

³⁶ Жарыкъ сизни бла болгъан заманда жарыкъгъа ийнаныгъыз, алай бла жарыкъны уланлары болурсуз», – деди. Муну айтханлай, Исса, кетип, алагъа кёрюнмей къалды.

Иудейли таматаланы терсакъыллыкълары

³⁷ Ол аланы алларында аллай бир илишанла этгенлей да ала Анга ийнанмагъан эдиле.

³⁸ Битеу была Иешая файгъамбарны: «Раббий! Бизден эшитгенлерине ким ийнанды? Раббийни кючю кимге кёрюндю?» – деп айтхан сёзю къабыл болур ючюн болгъандыла.

³⁹ Ала аны себепли ийнанмагъан эдиле. Иешая башха жерде да:

⁴⁰ «Аллах аланы кёзлерин сокъур этгенди, жюреклерин таш этгенди, кёзлери бла кёрмейдиле, жюреклери бла да ангыламайдыла эм къайтышмайдыла, Мен Аллах а аланы сау этер эдим», – деп айтханы кибик.

⁴¹ Муну Иешая Раббийни аламатлыгъын кёрген эм Аны юсюнден сёлешген заманында айтханды.

⁴² Алай болгъанлыкъгъа оноучуладан да кёпле Иссагъа ийнаннган эдиле, алай а, синагогадан къысталмаз ючюн, фарисейле амалтын ийнаннганларын ачыкъламай эдиле.

⁴³ Нек десегиз Аллахны махтауундан эсе, адамны махтауун бек сюйген эдиле.

⁴⁴ Исса уа, уллу айтып: «Манга ийнаннган, Манга тюйюл, Мени Ийгеннге ийнанады.

⁴⁵ Мени кёрген да Мени Ийгенни кёреди.

⁴⁶ Манга ийнаннган бир адам да къарангылыкъда къалмаз ючюн, Мен дуниягъа келген жарыкъма.

⁴⁷ Мени сёзлерими эшитип ийнанмагъан адамгъа Мен сюд этмейме: нек десегиз Мен дуниягъа сюд этерге тюйюл, алай а дунияны къутхарыргъа келгенме.

⁴⁸ Мени къабыл этмегенни эм Мени сёзлерими алмагъанны кесини сюдюсю барды: Мен айтхан сёз ахыр кюн анга сюд этерикди.

⁴⁹ Нек десегиз Мен Кесим-Кесимден айтмагъанма, алай а Мени ийген Ата, не айтыргъа эм не сёлеширге, Кеси Манга фарыз бергенди.

⁵⁰ Аны фарызы ёмюрлюк жашау болгъанын Мен билеме. Алай бла, Мен не айта эсем да, Атаны Манга айтханы кибик айтама», – деди.