Ахия 1 - Сыйлы Инжил бла Забур

Эм алгъа Сёз бар эди

¹ Эм алгъа Сёз бар эди, Сёз Аллахда эди эм Сёз Аллах эди.

² Ол эм алгъа Аллахда эди.

³ Хар зат да Аны юсю бла жаратылгъанды, бар болгъан затладан Олсуз бир зат да болмагъанды.

⁴ Жашау Анда эди, жашау да адамланы жарыгъы эди;

⁵ Жарыкъ къарангыда жарытады, къарангы аны хорламагъанды.

⁶ Аллахдан ийилген бир адам болгъанды; аны аты Ахия эди.

⁷ Ол шагъатлыкъ этерге келгенди; Жарыкъны юсюнден шагъатлыкъ этер ючюн, аны юсю бла бары да ийман салыр ючюн келгенди.

⁸ Ол кеси Жарыкъ тюйюл эди, алай а Жарыкъны юсюнден шагъатлыкъ этер ючюн келгенди.

⁹ Дуниягъа келген хар адамны жарыкъландыргъан керти Жарыкъ бар эди.

¹⁰ Ол дунияда болгъанды, дуния Аны юсю бла болуп башлагъанды, алай а дуния Аны танымагъанды.

¹¹ Кесиникилеге келгенди, кесиникиле да Аны къабыл этмегендиле.

¹² Аны къабыл этгенлеге, Аны атына ийман салгъанлагъа уа Аллахны сабийлери болургъа эркинлик бергенди.

¹³ Ала уа не къандан, не чархны сюйгенинден, не эрни сюйгенинден тюйюл, алай а Аллахдан туугъандыла.

¹⁴ Сёз адам болуп толу шафауаты эм хакъ кертилиги бла, бизни бла жашагъанды; биз да Аны аламатлыгъын кёргенбиз, Атадан жангыз туугъанны аламатлыгъын.

¹⁵ Ахия, Аны юсюнден шагъатлыкъ эте, уллу ауаз бла: «Мен Аны юсюнден, мени ызымдан Келген мени аллыма ётдю деп айтханым, ма Бу эди; нек десегиз Ол менден алгъа бар эди», – деди.

¹⁶ Аны толулугъундан биз барыбыз да шафауат юсюне шафауат алгъанбыз;

¹⁷ Нек десегиз Таурат Мусаны юсю бла берилгенди, шафауат бла хакъ керти уа Масих Иссаны юсю бла чыкъгъандыла.

¹⁸ Аллахны бир киши бир заманда да кёрмегенди; Атаны къучагъында болгъан жангыз Уланыды Аны танытхан.

Ахия файгъамбарны келиую

¹⁹ Иудейлиле Ахиягъа: «Сен кимсе?» – деп сорургъа Иерусалимден дин къуллукъчуланы бла левийлилени ийген заманда, ма Ахияны шагъатлыгъы –

²⁰ Ол ачыкъ айтханды, инкяр этмегенди: «Мен Масих тюйюлме», – деп ачыкъ айтханды.

²¹ Ала анга: «Сора не? Сен Илиясмыса?» – деп соргъандыла. Ол: «Тюйюлме», – дегенди. «Ол файгъамбармыса?» – дегендиле. Ол: «Угъай», – деп жууап бергенди.

²² Анга: «Сора сен кимсе? Бизни ийгенлеге биз жууап берир ючюн сен кесинг-кесинги юсюнгден не айтырыкъса?» – дегендиле.

²³ Ол а: «Иешая файгъамбарны айтханы кибик, „Раббийге жолну тюзетигиз“ деп къум тюзде къычыргъанны ауазыма мен», – деди.

²⁴ Ийилгенле уа фарисейледен эдиле.

²⁵ Ала да анга: «Сен не Масих, не Илияс, не ол файгъамбар тюйюл эсенг, сора адамланы сууда нек кёмюлдюресе?» – деп сордула.

²⁶ Ахия алагъа жууапха: «Мен сууда кёмюлдюреме: алай а сизни арагъызда Биреу турады, Аны уа сиз танымайсыз.

²⁷ Мени ызымдан Келген, Кеси уа мени аллыма ётген Олду; Аны аякъ кийимини бауун тешер кибик тийишлилигим да жокъду мени», – деди.

²⁸ Бу ишле, Иордан сууну ары жанындагъы Бейтабарада, Ахия адамланы сууда кёмюлдюрген жерде болгъан эдиле.

Аллахны Къозусу

²⁹ Экинчи кюн Ахия Иссаны анга келе тургъанын кёрюп: «Ма Аллахны Къозусу, Ол, дунияны гюняхын Кесини боюнуна алады.

³⁰ Мен Аны юсюнден: „Мени ызымдан бир Киши келеди, Ол а мени аллыма ётгенди, нек десегиз Ол менден алгъа бар эди“ деп айтханым Олду.

³¹ Мен Аны танымай эдим; алай а, Аны Израильге кёргюзтюр ючюн, адамланы сууда кёмюлдюрюрге келгенме», – деди.

³² Дагъыда Ахия, шагъатлыкъ этип: «Мен Сыйлы Нюрню, кёгюрчюн кибик, кёкден тюшгенин эм Аны юсюнде тургъанын кёргенме.

³³ Мен Аны танымай эдим; алай а мени адамланы сууда кёмюлдюртюрге Ийген, манга: „Нюр Кимни юсюне тюшгенин эм Аны юсюнде тургъанын кёрсенг, Олду – Сыйлы Нюр бла кёмюлдюрюучю“ деп айтханды;

³⁴ Мен да кёргенме эм Ол Аллахны Уланы болгъанына шагъатлыкъ этгенме», – деди.

Иссаны биринчи сохталары

³⁵ Экинчи кюн дагъыда Ахия бла аны сохталарындан экиси сюелип тура эдиле.

³⁶ Ол, Иссаны келе тургъанын кёрюп: «Ма Аллахны Къозусу!» – деди.

³⁷ Андан ол сёзлени эшитгенлей, эки сохта да Иссаны ызындан тебиредиле.

³⁸ Исса уа, артха айланып, аланы келгенлерин кёрюп, алагъа: «Не излейсиз?» – деди. Ала да Анга: «Равви, къайда жашайса?» – дедиле. Равви дегенни магъанасы «устаз» деген сёздю.

³⁹ Ол да алагъа: «Келигиз, кёрюрсюз», – деди. Ала барып, Аны къайда жашагъанын кёрдюле эм ол кюн Аны бла турдула. Сагъат оннга жууукъ болгъан эди.

⁴⁰ Иссаны юсюнден Ахияны айтханларын эшитген эм Иссаны ызындан баргъан экеуленден бирлери Шимон Петерни къарындашы Эндрей эди.

⁴¹ Ол, биринчи болуп, кесини къарындашы Шимонну табып, анга: «Биз Масихни тапханбыз», – деди, аны магъанасы уа «Майланнган» деген сёздю.

⁴² Сора аны Иссагъа келтирди. Исса уа, анга къарап: «Сен Жюнюс улу Шимонса; санга Кефа аталлыкъды», – деди, аны магъанасы уа: «Таш».

⁴³ Экинчи кюн Исса Галилеягъа барыргъа сюйдю эм, Филипни табып, анга: «Мени ызымдан кел», – деди.

⁴⁴ Филип а Бейтсайдадан, Эндрей бла эм Петер бла бир шахардан эди.

⁴⁵ Филип, Натанелни табып, анга: «Биз, Аны юсюнден Муса Тауратда жазгъан, файгъамбарла да айтхан, Юсюпню уланы Назаретли Иссаны тапханбыз», – деди.

⁴⁶ Алай а Натанел анга: «Назаретден иги зат болурму?» – деди. Филип да анга: «Бар да къара», – деди.

⁴⁷ Исса, Натанелни Анга келе тургъанын кёрюп, аны юсюнден: «Ма, аны хыйлалыгъы болмагъан, керти израильчи!» – деди.

⁴⁸ Натанел Анга: «Сен мени къайдан таныйса?» – деди. Исса Анга жууапха: «Филип сени чакъырырдан алгъа, сен инжир терекни тюбюнде болгъан заманда, Мен сени кёргенме», – деди.

⁴⁹ Натанел Анга: «Устаз! Сен Аллахны Уланыса, Сен Израильни Патчахыса!» – деп жууап этди.

⁵⁰ Исса анга жууапха: «Мен санга: „Мен сени инжир терекни тюбюнде кёргенме“ деп айтханым себепли ийнанаса сен; андан да уллусун кёрюрсе», – деди.

⁵¹ Дагъыда анга: «Кертисин, кертисин айтама сизге: мындан арысында, кёк ачылып, Аллахны мёлеклери, Адам Улуна ёрге чыгъып, энишге тюшгенлерин кёрлюксюз», – деди.