YUSAK 9 - BALA LUK DO'

Lun Gibion Naluk Ni Yusak

¹ Idi bala ini nekali' amung raca' luk tudo pa acep aco Abpa' Yarden, luun pegkung idi luun tana' raked, idi nan amung ducur Abpa' Rayeh suet pa Lebanon, ieh ineh lun Hiti, lun Amori, lun Kanaani, lun Prisi, lun Hiwi, idi lun Yebusi.

² Idi ideh nepamung, idi perurum pian munu' ni Yusak idi lun Israil.

³ Kareb lun bawang Gibion kali' ratnan luk inau' Yusak déi' Yeriko idi bawang Ai,

⁴ idi ideh sikal naluk ni Yusak, idi ideh netemina' ku balu'. Idi ideh nengerareng tebpung luk mon-mon luun keladaideh idi seréi' kubil luk inan nganau' abpa' anggur luk rapuk-rapuk luk mesong idi binubpul,

⁵ idi kasut luk medarak luk pangeh binubpul luun kukuddeh. Idi ideh nengayung ku ayung luk medarak. Idi amung ruti balu'deh ineh temueh idi meluping.

⁶ Idi ideh iné' papu' ni Yusak su luk inandeh nelupo déi' Gilgal. Kebaladeh neneh, idi nelun Israil teh, “Kai ini pangeh nacing rat bawang luk mado. Idi nekini do' muyuh nganau' jani' kuan kai.”

⁷ Idi kebala lun Israil, “Kian, muyuh tudo arang kai lek. Kudeng apeh kai nganau' jani' kuan muyuh?”

⁸ Idi kebaladeh ni Yusak, “Amung kai ini lun dukenmu.” Idi kebala Yusak nedeh, “Idéké muyuh ini? Idi rat iapehké muyuh?”

⁹ Idi kebaladeh neneh, “Kai ini pangeh nacing rat bawang luk pelaba ado ngaceku kai pangeh neninger ratnan Tuhan Allah muyuh. Idi kai pangeh neninger bala ratnan amung luk pangeh inau'Neh bang bawang Masir,

¹⁰ idi amung luk inau'Neh kuan didueh raca' lun Amori luk tudo pa busat aco Abpa' Yarden, idi kuan Sihon, raca' Hesbon, idi Og, raca' Basan, luk déi' Astarot.

¹¹ Kebala amung lun rayeh kai idi amung lun bang bawang kai nekai, ‘Ngalap balu' muyuh idi nalan. Amé' matun nedeh idi mada' nedeh, “Amung kai ini lun dukenmu. Ngaceku ineh nganau' kuan kai aceh pejani'.” ’

¹² Idi ruti kai ini melau' kareb kai nenguit ineh rat ruma' kai, kareb kai nalan sikal amé' matun namu. Idi nekini siruh, ieh netemueh idi meluping peh.

¹³ Idi seréi kubil luk pinuang kai ku abpa' anggur ini pana' mebaruh teh. Siruh, tuda' teh songdeh. Idi ayung kai ini, idi kasut kai ini nedarak ngaceku ratnan lawé luk pelaba ado.”

¹⁴ Idi lun Israil nengalap sesuut balu'deh, iamo' na ideh nengitun pinian Tuhan.

¹⁵ Idi Yusak nepedo' nedeh. Idi ieh nepejani' ngulun nedeh. Kudeng ineh teh amung lun rayeh tebubpun ineh nepebulung nedeh.

¹⁶ Idi teluh aco rat pangeh ideh nepejani' nedeh, idi lun Israil neninger bala idi ideh tudo muneng nedeh.

¹⁷ Idi lun Israil nenalan, idi kareb aco luk keteluh ideh nacing bang bawangdeh, ieh ineh Gibion, Kepira, Bairut, idi Kiriat Yarim.

¹⁸ Iamo' na ideh pinaté lun Israil, ngaceku lun rayehdeh pangeh nepejani' nedeh dengan bulung ku ngadan Tuhan Allah lun Israil. Idi amung lun Israil ineh dureng-dureng inan amung lun rayeh ineh.

¹⁹ Iamo' kebala lun rayeh ineh, “Tau pangeh nepejani' ku bulung dengan ngadan Tuhan Allah lun Israil. Ngaceku ineh nekini na tau miak mekuel nedeh.

²⁰ Idi do' tau ngulun nedeh pad Tuhan na ngukum netau, ngaceku tau pangeh nepejani' nedeh.”

²¹ Nima' nedeh mulun, pad ideh ngapak kayuh idi ngereb abpa' kuan tau.” Idi kudeng ineh bala lun rayeh kuandeh.

²² Idi Yusak nenawar nelun Gibion, kebalaneh, “Anun punneh muyuh nenaluk nekai, kebala muyuh, ‘Kai nacing rat mado,’ iamo' muyuh idi arang kai?

²³ Ngaceku ineh muyuh kumin Allah. Idi rat pad sini sebuang muyuh megéi mangun ku lun duken ngapak kayuh idi ngereb abpa' kuan Ruma' Allahku.”

²⁴ Idi kebala lun Gibion ineh ni Yusak, “O tuan, kai nenganau' kudeng ineh ngaceku kai nesibada' ratnan bala Tuhan Allah muyuh ni Musa, ratnan Ieh pian maré aput tana' ini nemuyuh, idi pian ngaté amung lun luk mudeng bang bawang ini pa kiung muyuh, pad kai pelaba tot pitayen muyuh.

²⁵ Idi nekini amung kai ini bang imetmu. Do' iko nganau' kuan kai anun luk do' pa kiungmu.”

²⁶ Idi Yusak nemuit nedeh ratnan useh Israil, pad ideh na ngaté nedeh.

²⁷ Idi kareb aco sineh teh Yusak nenganau' nedeh mangun ku lun duken ngapak kayuh, idi ngereb abpa' kuan lun mula' ineh idi kuan bubpun Tuhan, su luk pinili' Tuhan macing aco sini pana'.