YUSAK 8 - BALA LUK DO'

Lun Israil Ngalap Idi Ngusag Bawang Ai

¹ Kebala Tuhan ni Yusak, “Aleg iko matot, idi aleg megegker, lapenmu amung lun pebunu' idi nalan amé' bawang Ai. Ui maré raca' Ai idi amung anak itinneh, bawangneh, idi tana'neh kuanmu.

² Do' iko nganau' kuan bawang Ai idi kuan raca'neh mepad kudeng luk inau'mu kuan bawang Yeriko idi kuan raca'neh. Iamo' binaweh luk inaro idi amung aya'deh pana' miak iko ngaro kuan burur muyuh. Do' iko ngecuk tuda'-tuda' lun temina' ngabang pa keted bawang ineh.”

³ Idi Yusak netemina' amé' Ai dengan amung lun pebunu'. Idi Yusak nemili' 30,000 lun luk mesangit, luk icukneh kareb medacem.

⁴ Idi ieh nemada' lawédeh, kebalaneh, “Do' muyuh ngabang bawang ineh rat pa keted. Aleg muyuh pelaba ado rat ku bawang ineh. Do' amung muyuh temina' kidi-kidi.

⁵ Idi ui dengan amung lun luk maya' negku amé' ngerieng bawang ineh. Idi kareb ideh remuat amé' matun nekai, kai buro rat pa kiungdeh mepad kudeng luk atun.

⁶ Idi ideh miak ngerada' nekai, pad kai pangeh ngatad nedeh ratnan bawangdeh. Ngaceku ideh ngerawé nekai buro rat pa kiungdeh mepad kudeng luk atun.

⁷ Pangeh ineh do' muyuh remuat ratnan abang muyuh, idi semuet ngaro bawang ineh. Ngaceku Tuhan Allah muyuh miak maré bawang ineh kuan muyuh.

⁸ Idi kareb muyuh pangeh nengalap bawang ineh, do' muyuh nutung ineh maya' kudeng luk bila Tuhan.”

⁹ Idi Yusak nengecuk nedeh. Idi ideh iné' su luk inandeh ngabang. Idi ideh netudo arang Baitel dengan Ai pa acep aco bawang Ai. Iamo' Yusak netudo malem ineh su luk inan lun mula' nelupo.

¹⁰ Idi pekak uka-uka Yusak nekulat. Idi ieh nengamung amung baweh, idi Yusak idi amung lun rayeh Israil nenguyut nedeh iné' bawang Ai.

¹¹ Idi amung lun pebunu' luk denganneh ineh nenalan. Idi ideh iné' muneng ku bawang idi petutup nedeh. Idi ideh nugka' pa tinueh busat aco bawang Ai, pad inan aceh alung arangdeh dengan Ai.

¹² Idi teh ieh nengalap 5,000 lemulun idi nengecuk nedeh ngabang arang Baitel dengan Ai, pa acep aco bawang ineh.

¹³ Kudeng ineh lawéneh ngatur lun pebunu', pad amung baweh ineh iné' pa tinueh busat aco bawang ineh, idi luk ngabang pa acep aco bawang ineh. Idi bang alem sineh idi Yusak nenalan suet ku alung ineh.

¹⁴ Kareb raca' Ai nekali' nedeh, dengan tapapeh-tepapeh ideh temina', idi ieh neremuat dengan anak itinneh iné' munu' nelun Israil, su luk pangeh litepneh petutup ku Raked Yarden. Ngaceku na ieh kali' lun Israil ngabang pa keted bawang.

¹⁵ Yusak idi amung lun Israil pana' ayu-ayu melaya' pa kiungdeh. Idi ideh nupun maya' dalan iné' su luk ali-ali.

¹⁶ Idi kareb ineh raca' nenawar amung lun Ai amé' ngerada' nedeh ineh. Idi ideh nengerada' ni Yusak pad ideh nepetatang ratnan bawangdeh.

¹⁷ Seburur pana' nateh neketecan bang bawang Ai idi bang bawang Baitel, luk na nengerada' nelun Israil. Idi bawangdeh ticandeh laba' ideh ngerada' nelun Israil.

¹⁸ Idi kebala Tuhan ni Yusak, “Ngegenang gaman luk bang paladmu ineh pa bawang Ai. Ngaceku Ui maré bawang ineh kuanmu.” Idi Yusak nengegenang gaman luk bang paladneh ineh pa bawang Ai.

¹⁹ Idi kareb ieh pangeh nengegenang gaman ineh dengan saget-saget, idi lun luk ngabang ineh nudur rat su inandeh idi nupun iné' bang bawang ineh idi nengaro idi nenutung bawang ineh dengan saget-saget.

²⁰ Kareb amung lun Ai ineh nelumi nier pa puet, idi ideh nenier rabpun bawang ineh. Idi na luk idi dalandeh buro. Ngaceku lun mula' luk pangeh nupun iné' su luk ali-ali ineh nelemubed iné' ngaté nedeh.

²¹ Kareb Yusak idi lun denganneh nenier idi amung lun Israil luk ngabang ineh pangeh nesemuet bang bawang, idi teh ideh nenier rabpun bawang ineh, idi ideh nelemubed idi nengaté nelun bang bawang Ai.

²² Idi lun luk pangeh nesemuet bang bawang ineh pana' iné' matun nedeh, pad amung lun bang bawang Ai ineh arang uned lun Israil. Inan luk bal pa déi'. Inan luk pa tungé'. Idi lun Israil nengaté lun bang bawang Ai ineh, pad seburur pana' na luk miak buro idi mepuit.

²³ Idi ideh nengakem raca' Ai ineh, idi ideh nenguit neneh amé' matun ni Yusak.

²⁴ Idi lun Israil nengaté amung lun bang bawang Ai luk mado déi' su luk ali-ali su luk inandeh nengerada' nedeh ineh. Idi amung lun Israil nelemubed iné' bawang Ai, idi nengaté lun bang bawang ineh.

²⁵ Idi amung lun luk naté kareb aco ineh deléi idi decur, 12,000 burur, ieh ineh amung lun bang bawang Ai.

²⁶ Idi Yusak pana' nateh nengererep gamanneh luk pangeh tigenangneh, pad amung lun bang bawang Ai pinatédeh.

²⁷ Iamo' amung pung idi repapeh binaweh bawang ineh inaro lun Israil kuandeh, maya' kudeng luk bila Tuhan ni Yusak.

²⁸ Idi Yusak nenutung bawang Ai ineh, idi nengisu' ineh ku aceh perupun batu macing ruked-ruked idi aceh tabpa macing aco sini.

²⁹ Idi ieh nengekito raca' Ai ineh nan sepekatu kayuh macing kareb malem. Kareb aco macep Yusak nengecuk ngerurut butungneh ratnan kayuh ineh. Idi butung ineh pipetdeh pa atun tanga' bawang ineh. Idi ideh nenaped pa luunneh aceh perupun batu luk rayeh luk idi su ineh macing aco sini.

Yusak Maca Ukum Musa Déi' Surud Ibal

³⁰ Idi Yusak nenganau' aceh bubpun kuan Tuhan Allah lun Israil luun Surud Ibal,

³¹ maya' kudeng luk bida' Musa demulun Tuhan kuan lun Israil, petulu ku luk inayud bang Ukum Musa, ieh ineh aceh bubpun ratnan batu mekara, luk na inan nengerareng belawan. Idi pa luun bubpun ineh ieh nemaré baré luk sabpen kuan Tuhan, idi baréneh ineh luk nguit pedo'

³² Idi ieneh, pa kiung lun Israil Yusak nengayud luun batu aceh ukum luk inayud Musa.

³³ Idi amung lun Israil, amung lun rayehdeh, amung lun luk ngimet ukum, idi lun luk mutut besara'deh, tuped pa kabing idi pa tinueh Pati' Pejani' Tuhan, pa kiung amung imam lun Liwi luk mirir Pati' Pejani' Tuhan ineh, do' lun sakai idi lun kuan bawang. Sebuangdeh petutup ku Surud Gerisim. Idi sebuangdeh petutup ku Surud Ibal, maya' kudeng luk bila Musa demulun Tuhan atun, pelé lun Israil uen ngeperuan.

³⁴ Idi Yusak nemaca' amung bala Ukum peruan idi kediman petulu ku amung luk inayud bang surat Ukum ineh.

³⁵ Ratnan amung bala Musa sebila' bala pana' nateh luk na bica' Yusak kuan amung tebubpun Israil, dengan amung decur, anak-anak, idi lun sakai luk tudo arangdeh ineh.