YUSAK 7 - BALA LUK DO'

Sala' Akan

¹ Israil nengelaba bala Tuhan ratnan na ngalap binaweh luk uen ngusag. Ngaceku Akan Karmi, luk mupun Sabdi, ratnan inul Sera, ratnan pupu Yahuda ineh nengalap binaweh luk bibpeng na miak lapen. Idi ngaceku ineh Tuhan mebura' useh kuan amung lun Israil.

² Idi Yusak nengecuk lun rat Yeriko amé' déi' Ai, luk muneng ku Bait Awen pa busat aco Baitel, pelé ideh nier bawang ineh. Idi ideh iné' nier bawang Ai.

³ Kareb ideh nelemubed iné' ni Yusak, kebaladeh, “Aleg mula' tu amé' déi'. Iamo' do' ngecuk dueh kian teluh ngeribu burur amé' ngaro bawang Ai. Aleg ngecuk nedeh amé' amung, ngaceku ideh masi' burur.”

⁴ Idi 3,000 burur lun Israil iné' déi'. Iamo' ideh pinasut lun Ai pad ideh lemubed.

⁵ Idi lun bang bawang Ai nengaté 36 burur rat arangdeh. Idi ideh nengerada' nedeh rat tanga' bawangdeh macing su luk inan ngalap batu. Idi ideh nengaté nedeh kareb ideh musul irang. Idi lun Israil megegker niat, pad ideh matot.

⁶ Idi Yusak narak-narak ayungneh ngaceku ieh mesusa' niat, idi netekunal pa atun Pati' Pejani' Tuhan macing aco malem, dengan amung lun rayeh Israil, idi ideh nemubpur uluhdeh ku abuh.

⁷ Idi kesembayang Yusak, “O Tuhan Allah, kudeng apeh Iko ngecuk lun mula' ini guta Abpa' Yarden, pad kai biré bang palad lun Amoriké, pad kai uen ngederehké? Adui, do' teh kai neketecan déi' dipar Abpa' Yarden!

⁸ O Tuhan, anunké luk miak balénku, ngaceku lun Israil lumuut rat pa kiungdeh?

⁹ Idi lun Kanaani idi amung lun bang bawang ini miak kali' ratnan ini, idi ideh miak ngelibut nekai idi ngaté nekai! Idi anunké miak ruenMu ratnan ngadanMu luk rayeh ineh?”

¹⁰ Idi kebala Tuhan ni Yusak, “Mudur iko, anun ulekneh iko tekunal kudeng ini?

¹¹ Lun Israil pangeh nenganau' sala'. Idi teh pejani'Ku luk bida'Ku nedeh, ineh pangeh linabadeh. Idi ideh nengalap binaweh luk bibpeng na lapen, idi pinodeh. Idi ideh pana' mebalih. Idi ideh nenganau' binaweh ineh puar dengan binaweh bang lepodeh.

¹² Ngaceku ineh lun Israil na miak tuman pa kiung bunu'deh. Idi ideh lumuut rat nedeh, ngaceku ideh pana' mangun ku babpat luk uen ngusag. Kudeng na muyuh nala' luk bibpeng na lapen ineh rat arang muyuh, Ui na miak ngedengan nemuyuh.

¹³ Mudur iko! Ngeligan pupu ini, pad ideh temina' papu' Negku. Ngecuk nedeh temina' papu' Negku nebpa. Ngaceku Ui ini Allah lun Israil pebala, ‘Inan aceh luk bibpeng na lapen arang muyuh, O Israil. Idi na muyuh miak tuman tuped pa kiung bunu' muyuh kudeng muyuh na nala' luk bibpeng na lapen ineh rat arang muyuh!’

¹⁴ Idi pekak nebpa muyuh miak iten amé' muneng maya' inul muyuh. Idi do' inul luk tidulen Tuhan amé' muneng dengan uang ruma'deh. Idi ruma' luk tinicul Tuhan, do' amungdeh luk deléi' amé' muneng tesebuleng-sebuleng.

¹⁵ Idi lun luk tinicul luk nengalap luk uen ngusag ineh, do' ieh sabpen dengan amung-amung luk ieh kuan. Ngaceku ieh nengelaba pejani' Tuhan, idi nenganau' luk ku gateh arang lun Israil.”

¹⁶ Idi pekak uka-uka Yusak netumui, idi ieh nengecuk nelun Israil amé' muneng dengan inuldeh. Idi inul Yahuda luk tinicul.

¹⁷ Idi Yusak nengecuk pupu Yahuda amé' muneng, idi pupu Sera luk tinicul. Idi ieh nengecuk pupu Sera ineh amé' muneng dengan uang ruma'neh. Idi pupu Sabdi luk tinicul.

¹⁸ Idi ieh nengecuk uang ruma' Sabdi amé' muneng tesebuleng-sebuleng lun deléi. Idi Akan Karmi, luk mupun Sabdi luk tinicul.

¹⁹ Idi kebala Yusak ni Akan, “O anakku, ngerayeh Tuhan Allah lun Israil, do' iko ngamo sala'mu Neneh, idi maré kali' negku anun luk pangeh inau'mu ineh. Aleg iko ngapung ineh negku.”

²⁰ Idi kebala Akan, “Matu ui pangeh nenganau' sala' inan Tuhan Allah lun Israil. Idi kudeng ineh kudeng ini kekamenku.

²¹ Ngaceku ui nenier bang binaweh luk inaro ineh seputut kibung rat bawang Babil luk do' ayu, idi anem kati pirak, idi dueh kati amas. Idi ui melili ku ineh. Idi ui nengalap ineh idi nengapung ineh bang tana' uned lepoku. Idi pirak ineh pana' idi teh pa liang ineh.”

²² Idi Yusak nengecuk nelun amé' nan lepo ineh. Idi matu binaweh ineh inapungneh bang leponeh. Idi amung pirak ineh idi pa liangneh.

²³ Idi ideh nengalap ineh rat bang leponeh idi inuitdeh iné' matun Yusak idi amung lun Israil, idi rirengdeh pa kiung Tuhan.

²⁴ Idi Yusak idi amung lun Israil nengalap ni Akan, idi amung pirak, idi kibung luk do' ayu, idi amas, dengan amung anak deléi idi anak decur, amung sapi'deh, keladaideh, dombadeh, lepodeh, idi amung-amung luk ideh kuan. Idi amung ineh inuitdeh amé' Ruan Susa'.

²⁵ Idi kebala Yusak, “Ngudehké iko ngacing dat kuan kai? Idi Tuhan ngedereh namu aco sini.” Idi amung lun Israil nemitung ni Akan ku batu, idi nengeseb amung uang tetek ruma'neh, kareb ideh pangeh nemitung nedeh ku batu.

²⁶ Idi ideh nenaped pa luundeh aceh perupun batu luk rayeh luk idi macing aco sini. Idi ngaceku ineh ideh neten su ineh Ruan Susa' macing aco sini. Idi Tuhan nugka' ratnan usehNeh.