YUSAK 6 - BALA LUK DO'

Tabpa Bawang Yeriko

¹ Idi tanga' bawang Yeriko pangeh pilin pa atun lun Israil. Seburur pana' na miak semuet idi remuat.

² Idi kebala Tuhan ni Yusak, “Kali' rungen Ui maré bawang Yeriko ini perapu ku raca'neh idi amung lun luk mesangit kuanmu.

³ Idi do' iko nalan ngelibut bawang ineh dengan amung lun pebunu', ieh ineh sekua' bang seaco. Do' iko nganau' kudeng ineh bang anem aco kinioneh.

⁴ Idi do' tudu' burur lun imam ngiup tudu' serupit ratnan unga dumba deléi, idi ualan pa atun Pati' Pejani'. Idi kareb aco luk ketudu' do'muyuh nalan tudu' kua' ngelibut bawang ineh, kareb lun imam ngiup serupitdeh.

⁵ Idi muci miak mangun, kareb serupit ineh muni peranga', idi kareb muyuh ninger uni serupit ineh, do' amung-amung muyuh ineh ngitang, pad libung bawang ineh miak metabpa. Idi anid-anid burur muyuh miak umak su tuludeh.”

⁶ Idi Yusak nenawar amung imam, kebalaneh nedeh, “Kedingen muyuh Pati' Pejani' ineh. Idi do' tudu' burur imam ngiup tudu' serupit luk ratnan unga dumba deléi, idi nalan pa atun Pati' Pejani' Tuhan.”

⁷ Idi kebalaneh nelun mula' ineh, “Do' muyuh nalan ngelibut bawang. Idi do' lun pebunu' nalan pa atun Pati Pejani' Tuhan.”

⁸ Idi maya' kudeng luk icuk Yusak, tudu' lun imam luk ngiup serupit luk ratnan unga dumba deléi nenalan pa atun Pati' Pejani' Tuhan.

⁹ Idi lun pebunu' nenalan pa atun imam luk ngiup serupitdeh. Idi lun pebunu' luk baken luk matar, maya' puetdeh kareb lun nengiup serupit ineh.

¹⁰ Idi Yusak nemebpeng nelun mula' na ngitang idi na meria', pad macing ieh ngecuk.

¹¹ Idi ieh nengecuk nelun imam nguit Pati' Pejani' Tuhan ngelibut bawang sekua' mo'. Idi ideh nelemubed iné' su luk inandeh nelupo idi nerudap ieneh.

¹² Idi pekak uka-uka Yusak nekulat, idi amung imam nengalap Pati' Pejani' Tuhan ineh.

¹³ Idi tudu' burur imam luk ngiup tudu' serupit luk ratnan unga dumba deléi ineh nenalan atun. Idi lun pebunu'nenalan pa atundeh, idi lun pebunu' luk baken luk matar, maya' puetdeh. Idi ideh nengiup serupitdeh kidi-kidi.

¹⁴ Idi kudeng ineh teh ideh nenalan ngelibut bawang ineh sekua' mo' bang aco luk kedueh. Idi ideh nelemubed iné' su luk inandeh nelupo. Idi kudeng ineh luk inau'deh bang anem aco kinioneh.

¹⁵ Idi kareb aco luk ketudu' idi ideh nekulat kareb aco masat. Idi ideh nenalan libut bawang ineh tudu' kua' dengan lawé luk mepad. Iamo' kareb aco ini mo' ideh nenalan ngelibut bawang ineh tudu' kua'.

¹⁶ Idi luk ketudu' kua', amung imam nengiup serupitdeh. Idi Yusak nepebala nelun mula', “Ngitang muyuh, ngaceku bawang ineh barén Tuhan nemuyuh.

¹⁷ Idi bawang ineh uen ngusag ngaceku Tuhan, do' bawangdeh idi amung luk bang ineh. Iamo' do' Rahab, decur luk mesawa' ineh dengan lun luk bang tetek ruma'neh uen ngulun. Ngaceku ieh nengapung lun luk iné' nier luk pangeh icuk tau.

¹⁸ Iamo' do' muyuh nginita burur muyuh ratnan binaweh luk uen ngusag ineh, pad na kediman macing nemuyuh ngaceku ngalap aceh binaweh luk miak sagen, pad muyuh na ngacing susa' idi dereh kuan baweh lun Israil.

¹⁹ Idi amung amas, pirak, idi amung binaweh ratnan tekaling idi belawan, ineh miak meligan kuan Tuhan. Do' ieh ineh uen nuet arang binaweh Tuhan.”

²⁰ Idi imam-imam nengiup serupit, Kareb lun mula' ineh nekali' uni serupit, idi amungdeh nengitang. Idi libung bawang ineh netabpa. Idi lun mula' nengalap bawang ineh, anid-anid nemaya' su tuludeh. Idi ideh nengaro bawang ineh.

²¹ Idi ideh nengaté amung-amung luk bang bawang ineh, do' deléi idi decur, do' anak baruh idi lun merar, amung sapi, dumba, idi keladai pana'.

²² Kebala Yusak nedidueh luk iné nier bawang ineh, “Amé' medueh déi' ruma decur luk mesawa' ineh, idi nguit decur ineh rat déi', idi amung lun luk bang tetek ruma'neh, maya' kudeng jani' medueh neneh atun.”

²³ Idi didueh nenguit Rahab neremuat dengan taman-tinanneh, kinanak-kinanakneh, idi amung-amung luk ieh kuan. Amungdeh ineh inuit didueh remuat, idi ideh nenganau' lepodeh setau'.

²⁴ Idi ideh nengesep bawang ineh dengan amung uangneh. Iamo' amas, pirak, idi amung binaweh tekaling idi belawan biré ku binaweh bang Ruma' Tuhan.

²⁵ Iamo' Yusak nengulun Rahab decur luk mesawa' ineh, idi amung lun bang tetek ruma'neh, idi amung-amung luk ieh kuan. Idi ideh tudo arang uned lun Israil macing aco sini, ngaceku ieh nengapung dueh lun luk pangeh icuk Yusak iné' nier bawang yeriko.

²⁶ Idi bang kareb ineh teh idi Yusak nepebulung, kebulungneh, “Kediman pa kiung Tuhan, idé luk amé' naped bawang Yeriko ini! Idé-idé luk ngimun mudut bawang ini, anak deléineh luk atun kali' rungen maté. Idi idé-idé luk mudut tanga'neh, anak deléineh luk isuut kali' rungen maté.”

²⁷ Idi Tuhan idi dengan Yusak. Idi ngadanneh nebala bang aput-aput bawang.