YUSAK 5 - BALA LUK DO'

¹ Amung raca' lun Amori luk pa acep aco déi' Abpa' Yarden, idi amung raca' lun Kanaan luk tangeb Abpa' Rayeh nekali' bala Tuhan pangeh nengeket Abpa' Yarden pa kiung amung lun Israil, pad lun Israil neguta. Idi ideh matot idi na mekuu' ngaceku lun Israil.

Lun Israil Sinunat Déi' Gilgal

² Idi kebala Tuhan ni Yusak, “Nganau' tuda'-tuda' iyu ratnan batu luk metueh idi nunat nelun Israil sekedueh kua'.”

³ Idi Yusak nenganau' iyu ineh, idi ieh nenunat nedeh déi' luun Surud Nunat.

⁴ Ieh nenganau' kudeng ineh, ngaceku amung deléi luk mileh pebunu' kareb ideh nenalan rat bawang Masir pangeh naté déi' su luk ali-ali bang lawédeh.

⁵ Sagan pana' amung deléi luk nenalan rat Masir pangeh sinunat, amung deléi luk tinganak déi' su luk ali-ali nateh sinunat.

⁶ Ngaceku apat ngepulu' lak kinioneh, amung lun Israil nalan déi' su luk ali-ali, pad lun luk pebunu' luk nenalan rat Masir nabud naté ngaceku ideh na sikal ninger bala Tuhan. Idi Tuhan nemada' nedeh, ratnan kudeng apeh ideh na miak nier tana' luk mebaleng luk pangeh pijani' Tuhan kuan tepundeh.

⁷ Iamo' anakdeh luk nengelibal nedeh nateh sinunat déi' su luk ali-ali. Idi inul luk mebaruh ini luk sinunat Yusak.

⁸ Kareb ideh pangeh sinunat, idi amung lun Israil mudeng su luk inan nelupo pad amungdeh do'.

⁹ Idi kebala Tuhan ni Yusak, ‘Idi aco sini teh Ui nala' rat nemuyuh igu' ngaceku muyuh titen lun Masir ‘demulun’.” Idi ngaceku ineh su ineh pana' tetanen Gilgal macing aco sini.

¹⁰ Idi kareb lun Israil nelupo déi' Gilgal, idi ideh nenganau' Irau Paska bang pulu' apat aco bulan ineh kareb aco malem déi' patar muneng ku Yeriko.

¹¹ Idi kenebpa, ideh nekuman uli' ratnan tana' Kanaan, idi ruti luk na linamud, idi dalé luk iseb.

¹² Muci ratnan ineh, manna kuan lun Israil na luk idi peh. Iamo' ideh nekuman uli' ratnan tana' Kanaan bang lak ineh peh.

Yusak Idi Seburur Lemulun Luk Ngimet Pelapet

¹³ Idi kareb Yusak muneng ku Yeriko, idi ieh nenier aceh Burur luk ngimet aceh pelapet pa atunNeh. Idi Yusak iné' matun Neneh, kebalaneh, “Iko lun dengan kaiké, kian lun munu' lek?”

¹⁴ Idi kebalaNeh, “Baken; iamo' Ui ini Lun Rayeh Baweh Tuhan. Idi nekini Ui pangeh nacing.” Idi Yusak pana' netekeradung idi sembayang Neneh, kesembayangneh, “Anunké bala Tuhan kuan lun dukenNeh?”

¹⁵ Idi kebala Lun Rayeh Baweh Tuhan ni Yusak, “Neka kasut ratnan kukudmu. Ngaceku su luk inanmu tuped ineh meligan.” Idi Yusak nenganau' kudeng ineh.