YUSAK 4 - BALA LUK DO'

Pulu' Dueh Batu Tiped Mangan Ku Aceh Terawé

¹ Idi kareb lun mula' ineh pangeh neguta Abpa' Yarden, idi kebala Tuhan ni Yusak,

² “Mili' pulu' dueh burur, seburur ratnan anid inul lun Israil,

³ idi ngecuk nedeh, kebalamu, ‘Ngalap muyuh rat uned Abpa' Yarden, su luk ridu' amung imam ineh, pulu' dueh batu, iten muyuh amé' déi' dipar, idi ngerareng ineh su luk inan muyuh lupo malem ini.’ ”

⁴ Idi Yusak nenawar pulu' dueh burur luk pinili'neh ineh.

⁵ Kebalaneh nedeh, “Nalan muyuh pa atun Pati' Pejani' Tuhan Allah muyuh suet uned Abpa' Yarden. Idi do' anid-anid burur muyuh maan sebuleng batu maya' kinula' amung inul lun Israil.

⁶ Idi batu ineh mangun ku aceh terawé arang muyuh, kareb anak muyuh ngitun, kebaladeh, ‘Anunké ilung amung batu ini kuan muyuh?’

⁷ do' muyuh mada' nedeh ratnan kudeng apeh Abpa' Yarden ineh pangeh nepatad pa atun Pati' Pejani' Tuhan kareb Pati' ineh nepegata Abpa' Yarden idi abpa' ineh nepatad, idi batu-batu ini mangun ku aceh terawé ratnan dalan ineh kuan amung lun Israil macing idan-idan pana'.”

⁸ Idi lun Israil nenganau' maya' kudeng luk bida' Yusak nedeh, idi ideh nenguit pulu' dueh batu rat uned Abpa' Yarden maya' kudeng bala Tuhan ni Yusak, sebuleng kuan anid inul lun Israil. Idi inuitdeh iné' su luk inandeh nelupo. Idi ideh nenaped ineh su ineh.

⁹ Idi Yusak nenaped pulu' dueh batu luk baken teh uned Abpa' Yarden, ieh ineh su luk ridu' amung imam luk mirir Pati' Pejani' ineh, idi batu ineh idi teh su ineh macing aco sini.

¹⁰ Idi amung imam ineh tuped uned Abpa' Yarden pad pangeh mangun amung-amung luk pangeh icuk Tuhan ni Yusak badén kuan lun mula' ineh, maya' kudeng amung luk inan Musa neperiteteng ni Yusak. Idi lun mula' ineh pana' neguta saget-saget.

¹¹ Kareb lun mula' ineh pangeh neguta, idi Pati' Pejani' pana' idi amung imam nenalan pa atun lun mula' ineh.

¹² Idi inul Rubin, inul Gad, idi sebuang inul Manasé nenalan pa atun amung lun Israil. Idi ideh temina' pebunu' maya' kudeng luk bida' Musa nedeh.

¹³ Idi 40,000 lun luk temina' pebunu' neguta abpa' pa kiung Tuhan amé' nan patar muneng ku Yeriko.

¹⁴ Idi kareb aco sineh teh Tuhan nengerayeh ni Yusak pa kiung amung lun Israil. Idi ideh matot neneh, mepad kudeng ideh matot ni Musa atun.

¹⁵ Idi kebala Tuhan ni Yusak,

¹⁶ “Ngecuk amung imam luk mirir Pati' Pejani' ineh umak rat bang Abpa' Yarden.”

¹⁷ Idi Yusak nenganau' kudeng ineh.

¹⁸ Idi kareb amung imam ineh numak rat bang Abpa' Yarden, idi kareb kukud amung imam pun nengeradu' tana' luun, idi Abpa' Yarden ineh nepetuneb idi manud mepad kudeng atun ngereb amung tangebneh.

¹⁹ Idi kareb lun mula' inul numak rat bang Abpa' Yarden, ieh ineh pulu' aco bulan apat, ieh ineh bulan luk pun, idi ideh nemudut lepodeh déi' Gilgal, ieh ineh lakan Yeriko pa busat aco.

²⁰ Idi pulu' dueh batu luk inuit rat bang Abpa' Yarden ineh tiped Yusak déi' Gilgal.

²¹ Idi kebalaneh nelun Israil, “Kareb anak muyuh ngitun tamandeh muci aco, ‘Anunké ilungneh amung batu ini?’

²² do' muyuh mada' nedeh ratnan kudeng apeh lun Israil pangeh neguta Abpa' Yarden nenalan maya' luun.

²³ Tuhan Allah muyuh pangeh nengeket Abpa' Yarden ini pa atun muyuh, pad muyuh pangeh neguta, mepad kudeng luk inau' Tuhan Allah muyuh atun déi' Abpa' Pisui, luk kiketNeh pa atun kai, pad kai pangeh neguta ineh;

²⁴ pelé amung pupu aput tana' miak kali' lalud Tuhan, idi pad muyuh pana' matot inan Tuhan, Allah muyuh macing ruked-ruked.”