YUSAK 3 - BALA LUK DO'

Lun Israil Guta Abpa' Yarden

¹ Idi pekak uka-uka Yusak netemui, idi nenalan rat Sitim dengan amung lun Israil, idi nacing déi' Abpa' Yarden. Idi ideh nelupo ieneh kareb nateh ideh neguta.

² Pangeh teluh aco idi lun rayeh pupu ineh lawé-lawé su luk inandeh nelupo,

³ idi nemada' nelun mula' ineh, kebaladeh, “Kareb muyuh nier Pati' Pejani' Tuhan Allah muyuh idi amung imam lun Liwi mirir ineh, do' muyuh nalan rat su inan muyuh idi pebaya' Pati' ineh,

⁴ pad muyuh miak kali' dalan luk miak bén muyuh, ngaceku muyuh na maya' dalan ini atun. Aleg muyuh muneng ku Pati' ineh, iamo' nima' setangal batu arang muyuh rat ku Pati' ineh.”

⁵ Kebala Yusak nelun mula' ineh, “Ngeligan burur muyuh, ngaceku pekak nebpa Tuhan pian nganau' kekamen luk rayeh arang muyuh.”

⁶ Idi kebala Yusak nelun imam, “Kedingen muyuh Pati' Pejani' ineh, idi nalan pa atun lun mula'.” Idi ideh nenganau' maya' kudeng luk bilaneh.

⁷ Idi kebala Tuhan ni Yusak, “Aco sini Ui pian ngimun ngerayeh namu pa kiung amung lun Israil, pelé ideh kali', mepad kudeng Ui nengedengan ni Musa atun, kudeng ineh teh Ui ngedengan namu.

⁸ Idi do' iko ngecuk nelun imam luk mirir Pati' Pejani' ineh, kebalamu, ‘Kareb muyuh macing Abpa' Yarden, do' muyuh tuped bang Abpa' Yarden ineh muneng ku tangeb.’ ”

⁹ Idi kebala Yusak nelun Israil, “Amé' amung muyuh ninger bala Tuhan, Allah muyuh.

¹⁰ Aco sini muyuh miak kali' Allah mulun arang muyuh. Idi Ieh miak ngusu amung lun Kanaani, lun Hiti, lun Hiwi, lun Prisi, lun Girgasi, lun Amori, idi lun Yebusi rat pa kiung muyuh.

¹¹ Pati' Pejani' Tuhan luk kuan amung tana' ini miak guta Abpa' Yarden pa atun muyuh.

¹² Do' muyuh mili' pulu' dueh burur, seburur ratnan anid inul lun Israil.

¹³ Idi kareb lengayen kukud amung imam luk mirir Pati' Pejani' Allah Tuhan luk kuan amung tana' ini ucu' bang Abpa' Yarden, idi abpa' Yarden ined mepatad, idi abpa' luk manud rat pa dayeh ineh miak ugka' mangun ku aceh leleng.”

¹⁴ Idi kareb ngeranih, amung tangeb Abpa' Yarden mereb. Idi lun mula' ineh nengusag lepo-lepodeh pian guta Abpa' Yarden. Idi imam-imam nemirir Pati' Pejani' pa atun lun mula' ineh.

¹⁵ Kareb ideh macing tangeb abpa' ineh, idi kukuddeh pun rureb bang abpa' ineh,

¹⁶ idi abpa' luk manud rat pa dayeh mepamung mado suet bawang Adam luk pa Saretan, idi abpa' luk manud luk amé' luun patar, ieh ineh Abpa' luk Mepaci' itad pad nacing melena' tu-tu. Idi lun mula' ineh guta tutup Yeriko.

¹⁷ Idi amung imam luk mirir Pati' Pejani' Tuhan ineh tuped su luk nekeket uned Abpa' Yarden, laba' amung lun Israil guta maya' su luk tekering ineh, pad amung lun mula' ineh nabud neguta.