YUSAK 24 - BALA LUK DO'

Yusak Pebala Kuan Lun Israil Déi' Sikem

¹ Muci ratnan ineh idi Yusak nengamung amung inul pupu lun Israil déi' Sikem. Idi ieh nenawar amung lun Israil luk mengered, idi amung lun rayeh, idi lun luk mutut ukum, idi luk ngimet nedeh ineh. Idi ideh nacing tuped pa kiung Tuhan.

² Idi kebala Yusak nelun mula' ineh, “Kudeng ini bala Tuhan Allah lun Israil, ‘Rat mon tepun muyuh mudeng i dipar Abpa' Pirat, ieh ineh Tira, taman Ibrahim idi taman Nahor. Idi ideh teh pangeh nesembayang nan allah baken.

³ Idi taman muyuh Ibrahim ilapKu rat déi' dipar Abpa' Pirat, idi Ui nenguyut neneh nalan aput tana' Kanaan. Idi Ui namaré mula' inulneh, idi nemaré Isak kuanneh.

⁴ Idi kuan Isak Ui nemaré Yakub idi Esau. Idi kuan Esau Ui nemaré pegkung-pegkung Edom ku babpatneh. Iamo' Yakub perapu amung anak-anakneh netemurun iné' bawang Masir.

⁵ Pangeh ineh Ui nengecuk ni Musa idi Arun, idi Ui nenecat Masir mepad kudeng luk pangeh inau'Ku arangdeh. Idi Ui nenguyut nemuyuh remuat.

⁶ Kareb Ui pangeh nenated tepun muyuh neremuat rat bang bawang Masir, idi ideh nacing Abpa' Pisui. Idi lun Masir nengerada' tepun muyuh rat pa puet, maya' keréta idi maya' kuda macing abpa' ineh.

⁷ Idi kareb ideh nenawar Negku, idi Ui nenganau' aceh dacem arangdeh idi arang amung lun Masir ineh. Idi Ui nengelubed abpa' ineh pa luundeh, idi nengakeb nedeh amung. Mateh muyuh pana' nenier anun luk pangeh inau'Ku kuan Masir. “ ‘Pangeh ineh muyuh netudo déi' su luk ali-ali tuda'-tuda' lak kinioneh.

⁸ Idi Ui nenguit nemuyuh iné' bawang lun Amori, luk tudo pa busat aco Abpa' Yarden. Idi ideh nepebunu' nemuyuh. Iamo' Ui nemaré nedeh bang palad muyuh, pad muyuh nengalap tana'deh ku babpat muyuh. Idi Ui nengaté nedeh pa kiung muyuh.

⁹ Idi Balak Sipor, raca' Moab teh, iné' pebunu' nelun Israil. Idi ieh nengecuk nelun nawar ni Bilam Bior, pelé ieh ngediman nemuyuh.

¹⁰ Iamo' na Ui sikal ninger Bilam ineh, pad ieh ngeperuan nemuyuh teh. Idi Ui teh nemuit nemuyuh rat bang palad Balak.

¹¹ Pangeh ineh idi muyuh neguta Abpa' Yarden. Kareb pangeh macing déi' Yeriko idi lun bang bawang Yeriko nepebunu' nemuyuh, ieh ineh lun Amori, lun Prisi, lun Kanaani, lun Hiti, lun Gergasi, lun Hiwi, idi lun Yebusi. Idi amungdeh ineh biréKu bang palad muyuh.

¹² Idi Ui nengecuk surun ngedereh pa kiung muyuh, luk miak ngusu dueh raca' Amori rat pa atun muyuh, ieh ineh baken dengan pelapet muyuh idi gaman muyuh.

¹³ Ui nemaré nemuyuh aceh tana' luk na kikem muyuh, idi tuda'-tuda' bawang luk na pinudut muyuh. Idi nekini muyuh tudo bang ineh. Idi muyuh kuman uli' kabun anggur idi lawa saitun luk na tinibu muyuh.’ ”

¹⁴ Idi teh kebala Yusak, “Idi ngaceku ineh do' muyuh sembayang inan Tuhan idi nganau' kekamen kuanNeh dengan niat luk lutep idi matu. Idi necan amung allah luk inubur tepun-tepun muyuh luk dipar Abpa' Pirat idi déi' Masir pana'. Iamo' do' muyuh mepicet maya' Tuhan.

¹⁵ Idi kudeng muyuh na sikal mepicet maya' Tuhan, do' nekini muyuh mili' idé' luk pian bén muyuh, allah luk inubur tepun muyuh dipar Abpa' Pirat, kian allah lun Amori bang tana' luk inan muyuh tudo nekini. Iamo' ui idi lun bang tetek ruma'ku sikal maya' Tuhan.”

¹⁶ Idi kebala lun mula', “Na kai sikal necan Tuhan idi maya' allah baken.

¹⁷ Ngaceku Tuhan Allah kai, Ieh ineh luk pangeh nemuit nekai idi tepun kai ratnan kekamen demulun déi' bawang Masir, idi luk pangeh nenganau' tanu' luk do' luk meluun rayeh su siren kai, idi luk pangeh nengasa' nekai seruked dalan luk bén kai, idi arang amung pupu luk pangeh linaba kai.

¹⁸ Idi Tuhan teh pangeh nengusu amung pupu ineh rat pa atun kai. Kudeng ineh teh kuan amung lun Amori, ieh ineh lun bang bawang ini. Idi kai ini pana' sikal maya' Tuhan teh, ngaceku Ieh ineh Allah kai.”

¹⁹ Idi kebala Yusak nelun mula' ineh, “Muyuh na miak maya' Tuhan, ngaceku Ieh ineh Allah luk meligan, idi Allah luk temaruh. Idi na Ieh miak maré do' ku sala' muyuh idi kekamen muyuh luk dat.

²⁰ Kudeng muyuh necan Tuhan idi maya' allah luk baken, idi Ieh pana' miak teketed idi ngukum nemuyuh, nekini Ieh miak ngaté nemuyuh sagan tu pana' Ieh do' nemuyuh atun.”

²¹ Idi kebala lun mula' ineh ni Yusak, “Baken! Iamo' kai sikal maya' Tuhan teh.”

²² Idi kebala Yusak nedeh, “Muyuh mangun ku luk maré kali' kuan burur muyuh sebuleng ratnan muyuh pangeh nemili' Tuhan.” Idi kebaladeh, “Kai ini lun luk maré kali'.”

²³ Idi kebala Yusak nedeh, “Nekini teh talan muyuh amung akang lun pupu baken luk arang muyuh. Idi do' muyuh merapet inan Tuhan Allah lun Israil.”

²⁴ Idi kebala lun mula' ni Yusak, “Kai sikal maya' Tuhan Allah kai, idi maya' balaNeh.”

²⁵ Idi aco sineh teh Yusak nenganau' aceh pejani' kuan lun mula' ineh déi' Sikem. Idi ieh nemaré kuandeh tuda'-tuda' ukum idi bada'.

²⁶ Idi amung bala ineh inayud Yusak bang surat Ukum Allah. Idi ieh nengalap aceh batu luk rayeh. Idi tipedneh déi' liang lawa kayuh luk meraben luk muneng ku Su luk Meligan kuan Tuhan.

²⁷ Idi kebala Yusak nelun mula' ineh, “Siruh! Batu ini mangun ku luk maré kali' kuan tau. Ngaceku batu ini pangeh neninger amung bala Tuhan luk bilaNeh netau. Ieh ini pana' miak mangun ku luk maré kali' kuan muyuh, pad muyuh na teketed ratnan Allah muyuh.”

²⁸ Idi Yusak nengecuk nelun mula' ineh muli' amé' anid-anid su babpatdeh.

Até Yusak Idi Eliasar

²⁹ Idi muci ratnan ineh Yusak Nun, demulun Tuhan ineh naté kareb ulunneh meratu pulu' lak.

³⁰ Idi ideh nenanem neneh nan tana' babpatneh déi' Timnat Sera, luun pegkung-pegkung Epraim, pa tinueh busat aco Pegkung Gaas.

³¹ Idi lun Israil pana' nemaya' Tuhan seruked ulun Yusak, idi seruked ulun amung lun mengered muci rat ni Yusak, luk pangeh nekali' amung kekamen Tuhan luk inau'Neh kuan lun Israil ineh.

³² Idi teh tulang-tulang Yusup luk pangeh inuit lun Israil maya' nedeh rat Masir, tinanemdeh déi' Sikem bang tana' luk pangeh bilih Yakub rat nelun Hamor taman Sikem ku meratu balad pirak. Ngaceku ieh ineh pangeh nangun ku babpat inul Yusup.

³³ Idi teh Eliasar Arun naté. Idi ideh nenanem neneh luun surud luk pangeh biré kuan anakneh Pinihas déi' luun pegkung-pegkung Epraim.