YUSAK 23 - BALA LUK DO'

Yusak Pebala Nelun Mula'

¹ Mio pangeh ineh, kareb Tuhan Allah pangeh nemaré kuan lun Israil pedo' ratnan amung bunu'deh pekelibut, idi Yusak pana' mengered.

² Idi Yusak nenawar amung lun Israil, dengan amung lun mengered, idi lun rayeh, idi luk mutut ukum idi luk ngimet nedeh ineh. Idi kebalaneh nedeh, “Ui pangeh mengered.

³ Idi muyuh pangeh nenier amung-amung luk pangeh inau' Tuhan Allah muyuh kuan amung pupu ni ngaceku muyuh. Idi Tuhan Allah muyuh teh luk pangeh nepebunu' ngaceku muyuh.

⁴ Idi ui pangeh nemabpat pupu-pupu luk ketecan ini kuan muyuh maya' babpat inul muyuh, mepad kudeng amung pupu luk pangeh ilap rat Abpa' Yarden, pa busat aco suet Abpa' Rayeh luk pa acep aco.

⁵ Idi Tuhan Allah muyuh teh miak ngusu nedeh ineh muci rat pa kiung muyuh. Idi muyuh teh miak ngalap tana'deh ineh ku babpat muyuh, maya' kudeng bala Tuhan Allah muyuh nemuyuh.

⁶ Ngaceku ineh do' muyuh maya' idi nganau' anun-anun luk inayud bang surat Ukum Musa, idi aleg ngelaba ineh,

⁷ pad muyuh na perurum nan pupu luk tudo arang muyuh. Idi aleg muyuh neten ngadan allahdeh. Idi aleg pebulung ku ngadandeh. Idi aleg ngakem kuandeh idi tekeradung sembayang nedeh.

⁸ Iamo' do' muyuh merapet inan Tuhan Allah muyuh, mepad kudeng luk pangeh inau' muyuh macing aco sini.

⁹ Tuhan pangeh nengusu tuda'-tuda' pupu luk rayeh idi luk metueh ratnan babpatdeh rat pa kiung muyuh.

¹⁰ Idi seburur muyuh miak ngerada' meribu bururdeh, ngaceku Tuhan Allah muyuh luk pebunu' kuan muyuh, maya' kudeng luk pangeh pijani'Neh kuan muyuh.

¹¹ Idi ngaceku ineh nginita do'-do', pelé muyuh mawa inan Tuhan Allah muyuh.

¹² Kudeng muyuh lemubed idi maya' pupu-pupu luk na tabpen ini, luk mudeng arang muyuh, idi muyuh paweh nedeh,

¹³ kali rungen Tuhan Allah muyuh na ngusu pupu-pupu ini rat pa kiung muyuh. Iamo' muci ideh miak mangun ku aceh dereh kuan muyuh idi ku abpung idi lubang idi kudeng ét bebpet luun keted muyuh idi kudeng tabpa' bang mateh muyuh, pad muyuh maté bang bawang luk do' luk pangeh biré Tuhan Allah muyuh kuan muyuh ineh.

¹⁴ “Idi nekini ui malé maté. Idi muyuh kali' dengan amung niat muyuh idi amung terawé muyuh, idi sebila' bala pana' na metutu' ratnan amung bala luk do' luk pangeh bida' Tuhan Allah muyuh ratnan lawé muyuh. Idi amungneh pangeh nangun kuan muyuh. Idi sebila' bala pana' na netutu' ratnan amung ineh.

¹⁵ Iamo' miak mangun muci mepad kudeng luk pangeh nangun kuan muyuh amung-amung luk do' luk bida' Tuhan Allah muyuh ratnan lawé muyuh. Kudeng ineh teh miak Tuhan ngukum nemuyuh, pad Ieh ngaté nemuyuh idi pad seburur pana' nateh luk ketecan bang bawang luk do' luk pangeh biré Tuhan Allah kuan muyuh.

¹⁶ Kudeng muyuh ngelaba pejani' Tuhan Allah muyuh luk pangeh inau'Neh kuan muyuh, idi muyuh teh amé' nganau' kekamen kuan allah baken, idi tekeradung sembayang nedeh, kali' rungen useh Tuhan miak mebura' kuan muyuh.”