YUSAK 22 - BALA LUK DO'

Bubpun Tangeb Abpa' Yarden

¹ Idi Yusak nenawar nelun Rubin idi lun Gad, idi sebuang inul Manasé,

² kebalaneh nedeh, “Muyuh pangeh nenganau' amung luk bida' Musa demulun Tuhan ineh kuan muyuh. Idi muyuh pangeh nemaya' amung balaku.

³ Idi na muyuh nenecan kinanak muyuh tuda'-tuda' lak kinioneh macing aco sini. Idi muyuh pangeh nemaya' amung bala Tuhan Allah muyuh.

⁴ Idi nekini Tuhan Allah muyuh pangeh nemaré pedo' kuan amung kinanak muyuh, maya' kudeng amung bala Tuhan nedeh. Ngaceku ineh do' muyuh muli' nekini amé' lepo muyuh idi babpat muyuh luk pangeh biré Musa lun duken Tuhan ineh kuan muyuh dipar Abpa' Yarden.

⁵ Iamo' nginita muyuh do'-do' bala idi ukum luk bida' Musa demulun Tuhan ineh kuan muyuh. Do' muyuh mawa inan Tuhan Allah muyuh, idi maya' pianNeh, idi nginita amung balaNeh, idi merapet inan Tuhan, idi ngakem kuanNeh dengan amung niat muyuh idi amung terawé muyuh.”

⁶ Idi Yusak nemaré peruan nedeh, idi ieh nenima' nedeh nalan. Idi ideh nuli' peh.

⁷ Idi Musa pangeh nemaré babpat kuan sebuang inul Manasé déi' Basan, iamo' Yusak pangeh nemaré tana' pa acep aco Abpa' Yarden kuan inul Manasé luk baken, perapu pupu Israil luk baken. Idi kareb Yusak nengecuk nedeh muli', ieh nemaré peruan nedeh,

⁸ kebalaneh nedeh, “Muyuh muli' dengan mula' binaweh idi mula' aya', dengan amas, pirak, tekaling, idi belawan, idi dengan mula' ayung. Mabpat amung binaweh luk ilap ratnan bunu' muyuh ineh kuan kinanak-kinanak muyuh.”

⁹ Idi amung inul Rubin nuli' idi inul Gad idi sebuang inul Manasé. Idi ideh nenecan nelun Israil déi' Silo luk tana' Kanaan idi nuli' tana' Giliad, ieh ineh tana' luk pangeh biré nedeh, maya' kudeng bala Tuhan ni Musa.

¹⁰ Kareb ideh macing Gelilot, bang bawang Kanaan déi' dipar Abpa' Yarden, idi ideh nemudut aceh bubpun luk rayeh su ineh tangeb Abpa' Yarden.

¹¹ Idi lun Israil luk baken neninger bala, “Siruh! Lun inul Rubin, inul Gad, idi sebuang inul Manasé pangeh nemudut aceh bubpun déi' Gelilot muneng ku lakan tana Kanaan tangeb Abpa' Yarden, bang babpat tau.”

¹² Kareb lun Israil neninger bala ineh, idi amungdeh nepamung déi' Silo, pian amé' munu' nedeh.

¹³ Idi lun Israil nengecuk Pinihas anak Eliasar luk imam, amé' matun inul Rubin, inul Gad, idi sebuang inul Manasé.

¹⁴ Idi teh pulu' lun rayeh maya' neneh, seburur rat anid-anid pupu lun Israil. Amungdeh ineh lun rayeh ruma' pupudeh.

¹⁵ Idi ideh nacing nan inul Rubin, inul Gad, idi sebuang inul Manasé déi' tana' Giliad. Idi kebaladeh nedeh,

¹⁶ “Kudeng ini bala amung pupu Tuhan, ‘Ngudehké muyuh nenganau' kekamen luk dat ini idi nengedat Allah lun Israil. Idi nekini muyuh pangeh nelemubed ratnan Tuhan, idi nemudut aceh bubpun kuan muyuh, pad aco sini pana' muyuh pangeh mangun, ku bunu' Tuhan?

¹⁷ Ngerawé sala' déi' Pior kareb Tuhan nengukum pupuNeh. Macing aco sini, tau medereh ngaceku ineh. Naké sala' ineh petap?

¹⁸ Pianké muyuh lemubed ratnan Tuhan? Kudeng muyuh nekini mangun ku bunu' Tuhan, kali' rungen pekak nebpa usehNeh mebura' kuan amung lun Israil.

¹⁹ Idi nekini kudeng babpat tana' muyuh ineh dat, do' amé' matun babpat tana' Tuhan su luk inan Lepo Tuhan idi ngalap babpat rat arang kai. Iamo' aleg muyuh ngedat Tuhan. Idi aleg nguyo nekai idi nganau' kuan muyuh aceh bubpun baken ratnan bubpun Tuhan Allah tau.

²⁰ Kareb Akan Sera nenganau' sala' dengan rungen ku binaweh luk bibpeng na lapen, bakenké useh ineh mangun pa luun amung lun Israil? Idi baken ieh sebuleng luk naté ngaceku sala'neh?’ ”

²¹ Idi inul Rubin, inul Gad, idi sebuang inul Manasé nengor bala lun rayeh Israil kudeng ini,

²² “Idi Allah luk Melalud. Ieh ineh Tuhan! Idi Allah luk Melalud. Ieh ineh Tuhan! Ieh meluun kali'. Idi do' Israil pana' kali' teh. Kudeng kai ini bunu' Tuhan idi ngelaba ukumNeh, do' muyuh na méi' nekai.

²³ Kudeng ayuneh kai nenganau' bubpun kuan kai, pian lemubed ratnan Tuhan, kian kudeng ayu kai maré baré luk sabpen kian maré baré luk nguit pedo' pa luunneh, do' Tuhan ngua' kuan kai.

²⁴ Na, iamo' kai nenganau' ineh ngaceku matot anak muyuh pebala kuan kai muci aco, ‘Kapeh rurum muyuh ku Tuhan Allah lun Israil?

²⁵ Bakenké Tuhan nenganau' Abpa' Yarden ini ku lakan arang kai nemuyuh? O inul Rubin idi inul Gad, muyuh na kuan babpat dengan Tuhan,’ pad anak muyuh ngesaad anak-anak kai muci ugka' ratnan nganau' sembayang nan Tuhan.

²⁶ Ngaceku ineh kai nepebala, ‘Do' kai nganau' anun luk pian kai, idi nganau' bubpun ini. Baken ieh ku baré sabpen kian baré kereten,

²⁷ iamo' pelé bubpun ineh ku aceh luk maré kali' arang kai nemuyuh idi arang anak mupun tau luk muci rat netau luk dueh babpat, idi kai teh miak sembayang nan Tuhan pa kiungNeh dengan baré luk sabpen kai, idi baré luk kereten kai, idi baré luk nguit pedo' kuan kai, pad anak muyuh na pebala kuan anak kai muci, “Muyuh na inan babpat dengan Tuhan.” ’

²⁸ Idi kudeng ini terawé kai, kudeng ayuneh bala ineh kuan kai muci, idi kuan anak mupun kai, idi kai miak ngor, ‘Nier muyuh ayu bubpun Tuhan ini, luk pangeh inau’ tepun kai. Baken ieh ku baré sabpen. Baken ieh ku baré kereten, iamo' ku aceh tanu' arang kai nemuyuh.’

²⁹ Na tu-tu kai ngedat Tuhan, idi na kai lemubed ratnan Tuhan dengan nenganau' aceh bubpun ku baré sabpen, baré akan, idi baré kereten baken ratnan bubpun Tuhan Allah kai luk pa atun LepoNeh!”

³⁰ Pinihas luk imam idi amung lun rayeh, ieh ineh lun rayeh ruma' pupu Israil neninger amung bala ini luk bida' lun Rubin, lun Gad, idi lun Manasé, idi ideh mawang niat.

³¹ Idi kebala Pinihas Eliasar luk imam kuan lun Rubin, lun Gad, idi lun Manasé, “Nekini kai kali' ratnan Tuhan idi arang tau, ngaceku na muyuh mesala' idi na mangun ku bunu' Tuhan. Idi nekini pana' muyuh pangeh nemuit nelun Israil ratnan useh Tuhan.”

³² Idi Pinihas idi lun rayeh ruma' pupu Israil nelemubed rat tana' Giliad iné' tana' Kanaan, kuan amung lun Israil, idi nemaré kali' nedeh.

³³ Idi lun Israil mawang niat ku bala ineh. Idi lun Israil pana' nengubur Allah. Idi na ideh pegayam pian amé' munu' nelun Rubin, lun Gad, idi ngusag bawang luk inandeh mudeng.

³⁴ Idi lun Rubin idi lun Gad neneten bubpun ineh “Luk Maré Kali'”, ngaceku kebaladeh, “Ieh ineh aceh luk maré kali' arang tau ratnan Tuhan ineh, Allah.