YUSAK 21 - BALA LUK DO'

Bawang-Bawang Lun Liwi

¹ Idi lun rayeh inul pupu lun Liwi pana' iné' matun ni Eliasar luk imam idi Yusak Nun, idi amung lun rayeh pupu lun Israil.

² Kebaladeh nedeh déi' Silo bang bawang Kanaan, “Tuhan pangeh nepebala ni Musa. Ieh nengecuk maré bawang kuan kai inan tudo, idi laman kuan aya' kai pana'.”

³ Idi maya' kudeng bala Tuhan, lun Israil nemaré kuan lun Liwi ratnan babpatdeh sebuleng, ieh ineh bawang-bawang ini perapu ku laman.

⁴ Idi bawang-bawang pupu lun Kohat luk pun-pun litep. Idi lun Liwi luk inul Arun luk imam nengalap pulu' teluh bawang rat inul Yahuda, Simion, idi Beniamin.

⁵ Idi lun Kohat luk baken ineh nengalap pulu' bawang ratnan inul pupu Epraim, idi ratnan inul Dan, idi ratnan sebuang inul Manasé.

⁶ Idi lun Gerson nengalap pulu' teluh bawang ratnan inul Iskar, Aser, Naptali, idi ratnan sebuang inul Manasé déi' Basan.

⁷ Idi lun Merari, maya' tetek ruma'deh, nengalap pulu' dueh bawang ratnan inul Rubin, inul Gad, idi Sebulon.

⁸ Dengan nala' udi lun Israil nemaré bawang ini perapu ku laman kuan lun Liwi maya' kudeng bala Tuhan ni Musa.

⁹ Idi ini ngadan bawang ratnan inul Yahuda idi Simion luk biré

¹⁰ kuan inul Arun luk ratnan pupu Kohat, ieh ineh sebabpat lun Liwi. Idi babpat dideh luk biré pun-pun.

¹¹ Idi ideh nemaré nedeh ineh bawang Kiriat Arba (Arba ineh taman lun Enak), ieh ineh Hebron luun pegkung-pegkung Yahuda, do' bawangdeh, idi laman luk pekelibutneh.

¹² Iamo' tana' bawang ineh luk ku laman idi bawang-bawangneh luk isuut biré kuan Kaleb Yepuneh ku babpatneh.

¹³ Ideh nemaré bawang ini kuan pupu Arun luk imam: Hebron bawang luk inan sigapung lun luk ngaté, perapu ku laman, idi teh Libna,

¹⁴ Yatir, Esemua,

¹⁵ Holon, Debir,

¹⁶ Ain, Yuta, idi Bait Semes perapu ku laman, ieh ineh iwa' bawang ratnan dueh inul ineh.

¹⁷ Idi ratnan inul Beniamin ideh nemaré bawang Gibion, Giba,

¹⁸ Anatot, idi Almon perapu ku laman — amungdeh apat bawang.

¹⁹ Amung bawang inul Arun luk imam ineh, pulu' teluh perapu ku lamandeh.

²⁰ Idi teh inul pupu Kohat luk baken arang lun Liwi ineh nengalap babpatdeh rat inul Epraim.

²¹ Idi ideh nemaré kuandeh ineh Sikem perapu ku laman luun pegkung-pegkung Epraim bawang luk inan lun ngaté sigapung, idi Giser,

²² Kibsaim, idi Bait Horon perapu ku laman, ieh ineh apat bawang.

²³ Idi ratnan inul Dan, bawang Eltekeh, Gibeton,

²⁴ Aijalon, idi Gat Rimon perapu ku laman — ieh ineh apat bawang.

²⁵ Idi ratnan sebuang inul Manasé bawang Tanak idi Gat Rimon perapu ku laman — ieh ineh dueh bawang.

²⁶ Amung bawang babpat inul pupu Kohat luk baken ineh, ieh ineh pulu' bawang perapu ku laman.

²⁷ Idi lun Gerson, rat arang pupu lun Liwi, nengalap ratnan sebuang inul Manasé dueh bawang, ieh ineh Golan déi' Basan (su luk inan lun ngaté sigapung), idi Bestera, perapu ku laman.

²⁸ Idi ratnan inul Iskar ideh nengalap bawang Kision, Daberat,

²⁹ Yarmut, idi Engamin perapu ku laman — ieh ineh apat bawang.

³⁰ Idi ratnan inul Aser ideh nengalap bawang Misal, Abdon,

³¹ Helkat, idi Rehob perapu ku laman — ieh ineh apat bawang.

³² Idi ratnan inul Naptali, bawang Kedes déi' Galilia perapu ku laman (su luk inan lun ngaté sigapung), idi Hamot Dor, idi Kartan perapu ku laman — ieh ineh teluh bawang.

³³ Amung bawang lun Gerson maya' tetek ruma'deh, ieh ineh pulu' teluh bawang perapu ku laman.

³⁴ Idi pupu Merari, ieh ineh lun Liwi luk ketecan teh, nengalap ratnan inul Sebulon bawang Yokniam, Karta,

³⁵ Dimna, idi Nahalal perapu ku lamandeh — ieh ineh apat bawang.

³⁶ Idi ratnan inul Rubin, bawang Beser, Yahas,

³⁷ Kedemot, idi Mepaat perapu ku lamandeh — ieh ineh apat bawang.

³⁸ Idi ratnan inul Gad, bawang Ramot déi' Giliad perapu ku laman (su luk inan ngaté sigapung), Mahanaim,

³⁹ Hesbon, idi Yaser perapu ku lamandeh — ieh ineh apat bawang.

⁴⁰ Idi lun Merari, ieh ineh pupu lun Liwi luk ketecan teh maya' tetek ruma'deh, nengalap pulu' dueh bawang.

⁴¹ Idi amung bawang lun Liwi arang babpat lun Israil, ieh ineh apat ngepulu' ualuh bawang perapu ku lamandeh.

⁴² Idi anid-anid bawang ineh inan laman pekelibut.

Israil Ngalap Tana' Ineh

⁴³ Kudeng ineh ayu Tuhan maré kuan Israil amung tana' luk pangeh pijani'Neh kuan tepundeh ineh, idi ideh pana' nengalap ineh idi tebawang su ineh.

⁴⁴ Idi Tuhan nemaré pedo' kuandeh aput bawang ineh, maya' kudeng luk pijani'Neh kuan tepundeh ineh. Idi ratnan amung bunu'deh seburur pana' nateh miak metueh rat nedeh. Amung bunu' ineh pangeh biré Tuhan bang paladdeh.

⁴⁵ Idi sebila' bala pana' na netutu' ratnan amung bala luk do' luk pangeh bida' Tuhan kuan amung lun Israil.