YUSAK 20 - BALA LUK DO'

Bawang-Bawang Luk Inan Sigapung

¹ Idi kebala Tuhan ni Yusak,

² “Mada' kuan lun Israil kudeng ini, “Ngeletep tuda'-tuda' bawang luk inan sigapung kuan muyuh, luk pangeh icukKu ni Musa mada' nemuyuh.

³ Kudeng seburur lemulun ngaté nelun dengan na inau' rungen, iamo' nekasipalanneh, do' bawang ineh mangun ku luk inan sigapung kuanneh ratnan lemulun luk ngua' aténeh.

⁴ Idi kudeng lun ineh buro amé' inan aceh bawang ineh, do' ieh tuped munung tanga' bawang ineh atun, idi maré kali' anun pun lawéneh kuan lun rayeh bawang ineh. Idi do' ideh nganak lemulun ineh, idi maré su luk inanneh tudo bang bawang ineh.

⁵ Kudeng lun luk ngua' até ngerada' neneh idi aleg ideh maré lun luk nengaté ineh bang paladneh, iamo' ngapung neneh ngaceku na ieh nengaté lun denganneh ngaceku ieh megateh neneh, iamo' nekasipalanneh.

⁶ Idi ieh miak tudo bang bawang ineh peh, pad ieh pangeh papu' nelun rayeh luk miak mangeh ukumneh. Kareb Imam Rayeh luk ngimet bang kareb ineh maté, idi teh ieh miak muli' amé' bang bawangneh luk iratneh neburo.’ ”

⁷ Idi ideh nengatad bawang Kedes déi' Galilia luun pegkung-pegkung Naptali, Sikem luk luun pegkung-pegkung Epraim, idi Kiriat Arba (ieh ineh Hebron) luk luun pegkung-pegkung Yahuda.

⁸ Idi déi' dipar Abpa' Yarden pa busat aco bawang Yeriko litepdeh bawang Beser déi' su luk ali-ali luun tana' raked inul Rubin, Ramot déi' Giliad, tana' inul Gad, idi Golan déi' Basan, tana' inul Manasé.

⁹ Idi amung bawang ini litep kuan amung lun Israil idi kuan lun sakai luk tudo arangdeh teh, pelé ideh miak buro amé' déi', ieh ineh lemulun luk pangeh nengaté lemulun dengan na inau'neh rungen, pad ieh na pitayen lun luk ngua' até, idi ieh miak papu' nelun rayeh luk miak mangeh ukumneh.