YUSAK 2 - BALA LUK DO'

Yusak Ngecuk Dueh Burur Amé' Nier Bawang Yeriko

¹ Idi Yusak nelulem ngecuk dueh burur rat Sitim amé' nier, kebalaneh, “Amé' medueh ngikak tana' ineh, idi bawang Yeriko.” Idi didueh nesemuet bang ruma' seburur decur luk mesawa', ngadanneh Rahab, idi didueh netudo déi'.

² Idi lun nemada' ni raca' Yeriko, kebaladeh, “Malem ini lun Israil nacing tungé' pian nier bawang ini.”

³ Idi raca' Yeriko nengacing bala ini ni Rahab, “Iten remuet lun luk pangeh nacing namu. Ngaceku ideh luk amé' tungé' ineh pian nier amung bawang.”

⁴ Iamo' decur ineh pangeh nengapung dueh deléi ineh. Idi kebalaneh, “Kali' rungen lun ineh pangeh nacing negku. Iamo' na ui kali' rat iapeh didueh.

⁵ Idi kareb nateh lun nemalin tanga' bawang idi aco pana' medacem idi didueh neremuat. Na ui kali' iné' iapeh didueh. Do' muyuh mesaget ngerada' nedidueh pelé muyuh ngigket nedidueh.”

⁶ (Iamo' decur ineh pangeh nengecuk nedidueh umak amé' luun apo ruma'neh, idi ieh pangeh nengapung nedidueh pa liang nuper pu luk pangeh rirengneh pa luun apo ineh.)

⁷ Kareb ideh luk ngerada' ineh neremuat, idi ideh nemalin tanga' bawang ineh. Idi ideh iné' ngerada' nedidueh maya' dalan luk guta Abpa' Yarden.

⁸ Idi Kareb nateh didueh nerudap, idi decur ineh numak iné' luun apo.

⁹ Idi kebalaneh nedidueh ineh, “Ui kali' tana' ini pangeh biré Tuhan nemuyuh, idi kali' rungen amung kai matot nemuyuh.

¹⁰ Ngaceku kai pangeh neninger ratnan kudeng apeh Tuhan nengeket Abpa' Pisui pa kiung muyuh, kareb muyuh neremuat rat bang bawang Masir. Idi teh kai neninger ratnan kudeng apeh muyuh nengaté raca' Amori, ieh ineh Sihon idi Og dengan bawehdeh pa busat aco Abpa' Yarden.

¹¹ Kareb kai neninger amung ineh, idi kai matot. Seburur pana' nateh luk mekuu' ngaceku muyuh. Tuhan Allah muyuh, Ieh ineh Allah bang langit idi bang tana' pana'.

¹² Idi nekini do' medueh pejani' negku ku bulung ku ngadan Tuhan. Ngaceku ui pangeh nenganau' do' kuan medueh. Idi medueh pana' miak nganau' do' kuan tetek ruma'ku. Idi teh maré kuanku aceh tanu'.

¹³ Do' ngulun taman-tinanku, idi kinanak-kinanakku, idi amung uang tetek ruma'deh! Aleg nima' nekai pitayen!”

¹⁴ Idi kebala didueh neneh, “Kai temina' maté kuanmu! Kudeng iko na mada' lawé kai dueh ini, kali' rungen kai maya' jani' kai kareb Tuhan maré bawang ini kuan kai.”

¹⁵ Idi ieh nengurur nedidueh ku kalat rat bang gisumen ruma'neh, ngaceku ruma' Rahab bang libung ar bawang.

¹⁶ Idi kebalaneh nedidueh, “Nalan medueh amé' nan pegkung, pelé medueh na mepapu' nelun luk ngerada' nemedueh. Idi do' sigapung déi' teluh aco kinioneh, pad lun luk iné' ngerada' ineh lemubed. Pangeh ineh miak medueh maya' dalan medueh pun di.”

¹⁷ Kebala didueh ni Rahab, “Kai miak maya' jani' kai luk icukmu di.

¹⁸ Ninger do'-do'! Kareb kai samuet bang bawangmu, do' iko ngabet nuper ini luk mesia' nan gisumen luk dalan kai dueh inururmu ineh. Idi do' iko ngamung taman-tinanmu, kinanak-kinanakmu, idi amung lun bang tetek ruma'mu bang ruma' ini.

¹⁹ Kudeng idé-idé remuat rat bang ruma'mu idi pitayen, kali' rungen ieh kuan sala', idi kai na mesala'. Iamo kudeng idé luk bang ruma'mu murat, kai mesala'.

²⁰ Iamo' kudeng iko ngegala' lawé kai dueh ini idi na kai dueh miak maya' jani' kai.”

²¹ Kebala decur ineh, “Matu bala medueh ini. Do' kudeng ineh.” Idi ieh nenima' nedidueh nalan, idi nuper luk mesia' ineh pana' inabetneh nan gisumenneh.

²² Idi didueh nenalan macing nan pegkung idi sigapung déi teluh aco kinioneh. Idi lun luk icuk raca' ngerada' ineh nenakap nedidueh ineh bang anid dalan idi nateh luk kali'deh. Idi ideh nelemubed iné' Yeriko.

²³ Idi didueh nelemubed ratnan pegkung ineh idi neguta Abpa' Yarden, idi nacing ni Yusak. Idi didueh nemada' amung luk pangeh nangun.

²⁴ Kebala didueh ni Yusak, “Kali' rungen Tuhan pangeh nemaré amung tana' ini bang palad tau. Ngaceku niat amung lun bang bawang ineh megagau, ngaceku matot netau.”