YUSAK 18 - BALA LUK DO'

Ratnan Mabpat Tana' Luk Ketecan

¹ Kareb ideh pangeh nengelaya' amung bawang luk pa atundeh, amung lun Israil nepamung déi' Silo, idi ideh nemudut Lepo su luk inan papu' Tuhan.

² Idi teh ketecan arang lun Israil tudu' pupu luk nateh nengalap babpatdeh.

³ Idi kebala Yusak nelun Israil, “Tuda' ioké muyuh na iné' ngalap tana' ineh ku babpat muyuh luk pangeh biré Tuhan Allah tepun muyuh nemuyuh?

⁴ Maré teluh burur rat anid-anid pupu. Idi ui ngecuk nedeh nalan amé' aput-aput tana' ineh idi ngayud ayuneh maya' anid-anid babpat. Idi ideh miak lemubed amé' negku.

⁵ Idi ideh miak mabpat tana' ineh tudu' babpat. Idi Yahuda miak ketecan na tana' ineh luk pa kabing busat aco. Idi amung lun bang ruma' Yusup miak ketecan nan tana' ineh luk pa tinueh busat aco.

⁶ Idi do' muyuh ngayud ayu tudu' babpat tana' ineh, idi nguit luk inayud muyuh ineh amé' negku. Idi ui miak nala' udi ngaceku muyuh pa kiung Tuhan Allah tau.

⁷ Lun Liwi ineh na ngalap babpat arang muyuh, ngaceku babpatdeh ineh kekamen imam kuan Tuhan. Idi inul Gad idi Rubin idi sebuang inul Manasé ineh pana' pangeh nengalap babpatdeh pa busat aco Abpa' Yarden, luk pangeh biré Musa lun duken Tuhan ineh kuandeh.”

⁸ Idi ideh iné' ngayud ayu tana' ineh, idi kebala Yusak nedeh, “Amé' muyuh nalan aput-aput tana' ineh idi ngayud ayuneh, idi lemubed amé' negku, pelé ui nala' udi ngaceku muyuh pa kiung Tuhan déi' Silo.”

⁹ Idi ideh nenalan aput-aput tana' ineh, idi nengayud ayu tudu' babpat bawang ineh bang aceh surat. Idi ideh nelemubed iné' ni Yusak su luk inandeh nelupo déi' Silo.

¹⁰ Idi Yusak nenala' udi ngaceku ideh déi' Silo pa kiung Tuhan. Idi tana' ineh teh bibpat Yusak kuan anid-anid pupu lun Israil.

Tana' Luk Biré Kuan Beniamin

¹¹ Idi inul Beniamin maya' tetek ruma'deh, nengalap tana' arang pupu Yahuda dengan inul Yusup.

¹² Idi lakandeh pa tinueh busat aco, ieh ineh Abpa' Yarden. Idi lakan ineh mudik pa Yeriko amé' pa tinueh busat aco, lemaba pegkung pa acep aco, idi maki' amé' su luk ali-ali déi' Bait Awin.

¹³ Idi lakan ineh lemaba pa kabing busat aco amé' surud Lus, su inan Baitel nekini. Idi lakan ineh musul amé' Atarot Adar, macing luun pegkung luk pa kabing busat aco déi' Bait Horon pa lod.

¹⁴ Idi lakan ineh kemilu' amé' iring pa acep aco amé' pa kabing busat aco pegkung luk petutup ku Bait Horon pa kabing busat aco, idi umai amé' Kiriat Baal (ieh ineh Kiriat Yarim), aceh bawang lun Yahuda, ieh ineh lakanneh pa acep aco.

¹⁵ Idi lakanneh pa kabing busat aco ngimun rat iring Kiriat Yarim idi amé' pa acep aco, idi umai amé' Bued Abpa' Neptua.

¹⁶ Idi lakan ineh musul paped pegkung luk petutup ku Ruan Hinom, ieh ineh bang Ruan Repaim, pa tinueh busat aco, idi musul teh lemaba Ruan Hinom, pa kabing busat aco Surud Yebusi, idi musul amé' Enrugel.

¹⁷ Idi pa tinueh busat aco lakan ineh umai amé' Ensemes, idi pangeh ineh amé' Gelilot, luk petutup ku dalan Pegkung Adumim, idi musul macing Batu Bohan (Bohan, ieh ineh anak Rubin),

¹⁸ idi lemaba pa tinueh busat aco Surud Araba, idi musul amé' Raked Yarden.

¹⁹ Idi lakan ineh petacu amé' pa tinueh busat aco surud Bait Hogla. Abpa' luk Mepaci' ieh ineh paped lakan pa kabing busat aco Abpa' Yarden, ieh ineh lakan tana'deh luk pa kabing busat aco.

²⁰ Idi Abpa' Yarden, ieh ineh lakandeh pa busat aco. Amung ini lakan tana' inul beniamin maya' tetek ruma'deh.

²¹ Idi bawang-bawang inul Beniamin maya' tetek ruma'deh, ieh ineh Yeriko, Bait Hogla, Emek Kasis,

²² Bait Araba, Semaraim, Baitel,

²³ Hawin, Para, Opra,

²⁴ Keparamoni, Opni, idi Giba — amung bawang ineh pulu' dueh perapu ku babpatdeh.

²⁵ Idi teh Gibion, Rama, Berot,

²⁶ Mispa, Kepira, Mosa,

²⁷ Rekem, Iripil, Tarala,

²⁸ Sela, Hailep, Yebusi (ieh ineh Yerusalim), Gibia idi Kiriat Yarim — amung bawang ineh pulu' apat perapu ku babpatdeh. Idi ini babpat inul Beniamin maya' tetek ruma'deh.