YUSAK 17 - BALA LUK DO'

Babpat Tana' Manasé' Luk Pa Acep Aco

¹ Idi inul Manasé teh nengalap babpat luk litep, ngaceku ieh ineh anak Yusup luk atun. Makir, ieh ineh taman Giliad anak Manasé lu atun, nengalap bawang Giliad idi Basan mangun ku babpatneh, ngaceku ieh seburur lun luk pebunu'.

² Idi tana' luk pa acep aco Abpa' Yarden pangeh biré kuan amung anak Manasé luk baken, maya' tetek ruma'deh: Abiser, Helek, Asriel, Sikem, Heper, idi Semida. Amung ini anak deléi Manasé Yusup luk lun rayeh tetek ruma'deh.

³ Iamo' Selopehad, anak Heper, anak Giliad, anak Makir, anak Manase ineh, na anak deléi, aimo' decur petala. Idi ini ngadan anak-anakneh: Makla, Noa, Hogila, Milka, idi Tirsa.

⁴ Idi deh iné' matun Eliasar luk imam idi papu' ni Yusak Nun pa kiung amung lun rayeh, kebaladeh, “Tuhan pangeh nengecuk ni Musa maré kuan kai aceh babpat arang kinanak kai.” Ngaceku ineh idi ieh nemaré kuandeh aceh babpat arang amung kinanak tamandeh, maya' kudeng bala Tuhan ineh.

⁵ Kudeng ineh lawéneh Manasé nengalap pulu' babpat baken ratnan tana' Giliad idi Basan luk dipar Abpa' Yarden.

⁶ Ngaceku amung anak decur Manasé pana' nengalap babpat perapu ku anak deléineh. Idi tana' Giliad ineh mangun ku babpat amung anak Manasé luk baken.

⁷ Idi tana' Manasé, ieh ineh rat Aser macing déi' Mikmetat, luk pa busat aco bawang Sikem. Idi lakan ineh macing pa kabing busat aco su luk inan lun Tapua.

⁸ Idi tana' Tapua ineh Manasé kuan. Iamo' bawang Tapua luk iring lakan ineh pupu Epraim kuan.

⁹ Idi lakan ineh musul amé' Arur Kana. Idi bawang-bawang ini luk pa kabing busat aco arur ineh Epraim kuan, sagan tu pana' bawang ineh arang uned amung bawang Manasé. Idi lakan Manasé', ieh ineh pa tinueh busat aco arur ineh, idi kekiped lakan ineh Abpa' Rayeh.

¹⁰ Luk pa kabing busat aco ineh Epraim kuan. Idi pa tinueh busat aco ineh Manasé kuan. Idi Abpa' Rayeh ineh lakan didueh. Idi pa tinueh busat aco ideh macing Aser. Idi pa kabing busat aco ideh macing Iskar.

¹¹ Idi bang bawang Iskar idi Aser, Manasé ngimet Bait Sian idi Ibliam perapu ku bawangdeh, ieh ineh Dor, luk tangeb abpa' rayeh, Endor, Taana, idi Megido.

¹² Iamo' lun Manasé na miak ngusu lemulun rat bang bawang-bawang ineh. Ngaceku ineh lun Kanaani tudo déi'.

¹³ Idi kareb lun Israil mangun meluun tueh, idi ideh nengalap lun Kanaani ineh mangun ku lun dukendeh. Iamo' na ideh nengusu nedeh.

Epraim Idi Manasé Luk Pa Acep Aco Mutuh Tana' Teh

¹⁴ Idi kebala inul Yusup ni Yusak, “Ngudehké iko maré sebuleng babpat mo' kuan kai. Iamo' kai ini mula' burur ngaceku peruan luk biré Tuhan kuan kai macing nekini?”

¹⁵ Idi kebala Yusak nedeh, “Kudeng matu muyuh aceh pupu luk mula' do' muyuh amé' luun pulung, idi ngala déi' su luk inan babpat muyuh luun tana' lun Prisi idi Repaim, kudeng ayuneh pegkung-pegkung Epraim pelaba isuut kuan muyuh.”

¹⁶ Idi kebala inul Yusup, “Na tana' pegkung ineh petap kuan kai. Idi amung lun Kanaani luk tudo luun raked ineh inan keréta belawan, do' luk tudo bang Bait Sian idi bang babpat-babpatdeh, do' luk tudo' déi' Raked Yesril pana'.”

¹⁷ Idi kebala Yusak kuan inul Epraim idi Manasé, “Kali' rungen muyuh aceh pupu luk mula' burur idi muyuh meluun tueh. Muyuh miak ngalap mela ratnan sebuleng babpat.

¹⁸ Idi pegkung ineh muyuh kuan, sagan tu pana' ineh pulung. Temara' ineh idi ngalap kuan muyuh macing iringneh. Ngaceku muyuh miak ngusu lun Kanaani ineh rat su inandeh sagan tu pana' ideh inan keréta belawan, idi metueh teh.”