YUSAK 16 - BALA LUK DO'

Babpat Tana' Luk Litep Kuan Epraim Idi Manasé Luk Pa Acep Aco

¹ Idi babpat luk litep kuan inul Yusup, ieh ineh rat Abpa' Yarden muneng ku Yeriko, macing pa busat aco bued abpa' Yeriko, idi lemaba déi' su luk ali-ali, mudik rat Yeriko amé' pegkung macing déi' Baitel.

² Idi rat Baitel macing déi' Lus, idi lemaba bawang Atarot Adar, tana' lun Arki,

³ idi amé pa acep aco lemaba tana' lun Yapleti macing pa lod Bait Horon, idi lemaba Giser, idi kekiped lakan ineh pa Abpa' Rayeh.

⁴ Kudeng ineh teh inul Yusup, ieh ineh Manasé idi Epraim nengalap babpatdeh.

Epraim

⁵ Idi ini lakan tana' inul Epraim maya' tetek ruma'deh: lakan tana' luk pa busat aco, ieh ineh Atarot Adar macing déi' Bait Horon pa dayeh.

⁶ Idi rat déi' lakan ineh macing Abpa' Rayeh. Idi Mikmetat, ieh ineh pa tinueh busat aco. Idi pa busat aco lakan ineh kemilu' macing déi' Tanat Silo, idi lemaba pa busat aco macing Yanua,

⁷ idi musul rat Yanua macing Atarot idi Nara, pad macing Yeriko, idi kekiped lakan ineh Abpa' Yarden.

⁸ Idi rat Tapua lakan tana' ineh amé' pa acep aco macing Arur Kana, idi kekiped lakan ineh Abpa' Rayeh. Idi amung ini babpat inul lun Epraim maya' tetek ruma'deh.

⁹ Idi bal selipa lakan tana'deh inan teh tuda'-tuda' bawang arang lun Epraim bang babpat lun Manasé, do' bawang-bawang, do' barardeh pana'.

¹⁰ Iamo' na ideh nengusu lun Kanaani luk tudo déi' Giser, pad lun Kanaani ineh mudeng arang lun Epraim macing aco sini. Iamo' ideh mangun ku lun duken luk sinaad ngakem kuandeh.