YUSAK 14 - BALA LUK DO'

Babpat-Babpat Tana' Pa Acep Aco Abpa' Yarden

¹ Idi ini luk ilap lun Israil ku babpat déi' bawang Kanaan luk bibpat-bibpat Eliasar luk imam, idi Yusak Nun, idi amung lun rayeh pupu ku babpat lun Israil,

² dengan nala' udi ngeletep babpatdeh maya' kudeng bala Tuhan ni Musa kuan iwa' setangal inul ineh.

³ Ngaceku Musa pangeh nengeletep tangal teluh babpat ineh déi' dipar Abpa' Yarden, idi na ieh nemaré babpat tana' kuan lun Liwi.

⁴ Inul Yusup ineh mangun ku dueh babpat, ieh ineh Manasé idi Epraim. Ngaceku ineh na ieh nemaré babpat ratnan tana' ineh kuan lun Liwi, iamo' tuda'-tuda' bawang pad ideh tudo bang ineh perapu ku tana' libut ineh kuan aya'deh ineh.

⁵ Maya' kudeng bala Tuhan ni Musa, kudeng ineh teh luk inau' lun Israil.

Bawang Hebron Biré Kuan Kaleb

⁶ Idi lun Yahuda iné' matun Yusak déi' Gilgal. Idi kebala Kaleb Yepuneh lun Kenisi ineh kuandeh, “Iko teh luk nekali' bala Tuhan luk ni Musa demulun Tuhan ineh ratnan ui idi iko déi' Kadis Barnia.

⁷ Idi ulunku kareb idi apat ngepulu' lak, kareb ui icuk Musa lun duken Tuhan ineh rat Kadis Barnia amé' nier bawang Kanaan ineh. Idi ui teh nenguit bala kuanneh mepad kudeng luk sinierku.

⁸ Iamo' amung kinanakku luk iné' maya' negku, ieh ineh nengetalang niat lun mula'. Iamo' ui nemaya' Tuhan Allahku dengan amung niatku.

⁹ Idi Musa nepejani' negku, kebalaneh, ‘Idi na miak na tana' luk pangeh ridu' kukudmu ineh mangun ku babpatmu idi babpat anak-anakmu teh macing ruked-ruked. Ngaceku iko pangeh nelutep maya' bala Tuhan Allahku.’ ”

¹⁰ Idi Kaleb nepebala teh, “Tuhan pangeh nengulun negku maya' kudeng balaNeh. Idi nekini apat ngepulu' limeh lak rat kareb Tuhan nepebala kudeng ineh kuan Musa, kareb lun Israil lawé-lawé déi' su luk ali-ali. Idi nekini ulunku pangeh ualuh ngepulu' limeh lak.

¹¹ Idi aco sini teh tuehku mepad kudeng tuehku kareb aco Musa nengecuk negku, do' bang pebunu', idi amung-amung luk ruenku.

¹² Idi ngaceku ineh do' maré kuanku tana' pegkung luk pangeh bida' Tuhan negku kareb aco sineh. Iko pana' pangeh neninger ratnan lun Enak idi déi' bang tuda'-tuda' bawang luk meraben libung. Kudeng Tuhan ngedengan negku ui miak ngusu nedeh, maya' kudeng bala Tuhan ineh.”

¹³ Idi Yusak nengeperuan ni Kaleb Yepuneh. Idi ieh nemaré bawang Hebron ku babpatneh.

¹⁴ Idi Hebron mangun ku babpat Kaleb Yepuneh lun Kenisi ineh, macing aco sini, ngaceku ieh nelutep maya' bala Tuhan Allah lun Israil.

¹⁵ Idi atun ngadan bawang Hebron ineh Kiriat Arba, ieh ineh ngadan seburur lun rayeh arang amung lun Enak. Idi bang kareb ineh bawang ineh nugka' pebunu'.