YUSAK 13 - BALA LUK DO'

Tana' Luk Nateh Ilap

¹ Idi Yusak pana' mengered peh. Idi kebala Tuhan neneh, “Iko pangeh mengered, idi mula' teh tana' ketecan luk miak lapen.

² Idi ini tana' luk ketecan: amung tana' lun Pilistin, idi amung tana' Gesuri

³ (rat Asur Sikor, luk bal pa Masir macing lakan Ekron luk pa tinueh busat aco, amung ineh tirawé kuan lun Kanaani, idi raca' lun Pilistin tudo déi' Gasa, Asdod, Askelon, Gat, idi Ekron), idi teh bawang lun Awin,

⁴ rat pa kabing busat aco, amung tana' ineh lun Kanaani kuan, kudeng ineh teh Mira luk babpat lun Sidon, macing déi' Apek idi macing lakan bawang lun Amori;

⁵ idi teh tana' lun Gebali, idi amung Lebanon, pa busat aco, rat Baal Gad luk liang Pegkung Hermon macing iring bawang Hamat.

⁶ Idi Ui miak ngusu amung lun luk tudo luun pegkung rat Lebanon, macing déi' Misrepot Maim, idi teh amung lun Sidoni ratnan babpatdeh pa kiung amung lun Israil. Iko miak mabpat babpat ineh maya' kudeng bala Tuhan namu.

⁷ Idi nekini teh mabpat tana' ineh mangun ku babpat kuan iwa' pupu luk baken, idi sebuang inul Manasé.”

Babpat-Babpat Tana' Pa Busat Aco Abpa' Yarden

⁸ Sebuang inul Manasé dengan lun Rubin idi lun Gad pangeh nengalap babpatdeh luk biré Musa nedeh déi' dipar Abpa' Yarden pa busat aco, maya' kudeng luk pangeh litep Musa, demulun Tuhan kuandeh,

⁹ ieh ineh rat Arur luk iring Raked Arnon, idi bawang luk uned raked ineh, idi amung tana' raked rat Mediba macing déi' Dibon,

¹⁰ idi amung bawang Sihon, raca' lun Amori, luk raca déi' Hesbon macing lakan bawang pupu Amon,

¹¹ idi Giliad idi tana' lun Gesuri idi lun Makati, idi amung Pegkung Hermon, idi amung tana' Basan macing déi' Salka,

¹² idi amung bawang Raca' Og, luk ngimet déi' Astarot idi déi' Edri, (idi ieh pana' teceh ratnan lun Repaim). Musa nengelaya' idi nemasut nedeh ineh.

¹³ Iamo' na lun Israil nengusu lun Gesuri idi lun Makati ratnan babpatdeh. Iamo' ideh tudo arang lun Israil macing aco sini.

¹⁴ Iamo' Musa na nemaré babpat tana' kuan inul Liwi. Idi amung baré luk sabpen kuan Tuhan Allah lun Israil, ieh ineh babpatdeh, maya' kudeng balaNeh ni Musa.

Babpat Tana' Luk Litep Kuan Rubin

¹⁵ Musa nemaré babpat tana' kuan anid-anid tetek ruma' pupu Rubin.

¹⁶ Idi lakan tana'deh rat Arur, luk iring Raked Arnon idi bawang uned raked ineh, idi amung tana' raked luk pelengit Mediba,

¹⁷ idi Hesbon, dengan amung bawangneh luk déi' tana' raked, Dibon, Bamot Baal, idi Bait Baal Mion,

¹⁸ Yahas, Kedemot, idi Mepaat,

¹⁹ Kiriataim, Sibma, idi Seret Sahan, nan surud luk luun raked ineh,

²⁰ Bait Pior, Irang Pegkung Pisga, idi Bait Yesimot,

²¹ idi amung bawang tana' raked, idi amung bawang Sihon, raca' lun Amori, luk ngimet déi' Hesbon luk linaya' Musa, do' Sihon idi amung raca' Midian, ieh ineh Ewi, Reken, Sur, Hur, idi Reba luk pa liang Raca' Sihon. Amungdeh tudo déi' tana' ineh.

²² Idi lun Israil nengaté Bilam Bior, lun luk mileh mangun ineh, idi mula' lun baken teh.

²³ Idi lakan tana' lun Rubin ineh Abpa' Yarden. Idi amung tana' luk i tangebneh, amung ini babpat inul Rubin maya' anid-anid tetek ruma'deh, amung bawang idi barardeh.

Babpat Tana' Luk Litep Kuan Gad

²⁴ Idi Musa pangeh nemaré babpat kuan inul Gad maya' tetek ruma'deh.

²⁵ Idi tana'deh, ieh ineh Yaser, idi amung bawang Giliad idi seupa tana' inul Amon macing Arur luk tutup Raba,

²⁶ idi rat Hesbon macing déi' Ramat Mispa idi Betonim, idi rat Mahanaim macing lakan tana' Lodebar,

²⁷ idi teh luun Raked Yarden, Bait Haram ineh, idi Bait Nimra, Sukot, idi Sapon, tana' luk ketecan ratnan bawang Sihon, raca' Hesbon. Idi lakanneh Abpa' Yarden, macing Takung Galilia pa tinueh busat aco. Idi amung tana' ineh pa busat aco Abpa' Yarden.

²⁸ Idi ini babpat lun Gad maya' tetek ruma'deh, ieh ineh amung bawang idi barardeh.

Babpat Tana' luk Litep Kuan Manasé Luk Pa Busat Aco

²⁹ Idi Musa pangeh nemaré babpat kuan sebuang inul Manasé maya' tetek ruma'deh.

³⁰ Tana'deh rat Mahanaim idi amung bawang Basan, idi amung bawang Og raca' Basan ineh, idi amung bawang Yair luk déi' Basan ineh, anem ngepulu' kinula'deh.

³¹ Idi seupa Giliad, dengan Astarot idi Edri, ieh ineh bawang Raca' Og déi' Basan pangeh biré kuan sebuang inul Makir anak Manasé, maya' tetek ruma'deh.

³² Idi raked-raked Moab luk déi' dipar Abpa' Yarden tutup Yeriko pa busat aco bibpat Musa kuandeh.

³³ Iamo' Musa na nemaré babpat tana' kuan inul Liwi ngaceku Tuhan Allah lun Israil luk ku babpatdeh ineh, maya' kudeng bala Tuhan nedeh.