YUSAK 11 - BALA LUK DO'

Yabin Idi Lun Rurumneh Linaya'

¹ Idi bala ratnan lawé ineh nekali' Yabin, raca' Hasor. Idi ieh nengecuk amé' mada' Yubab, raca' Akasap,

² idi raca'-raca' luk luun pegkung-pegkung luk pa tinueh busat aco, idi luk luun Raked Yarden luk pa kabing busat aco Takung Galilia, idi luk luun tana' patar, idi luk tangeb abpa' rayeh muneng ku Dor.

³ Idi ieh nengecuk amé' mada' lun Kanaani luk pa busat aco, idi luk pa acep aco, idi lun Amori, lun Hiti, lun Prisi, lun Yebusi, idi lun luk luun pegkung, idi lun luk liang Pegkung Hermon bang bawang Mispa.

⁴ Idi ideh iné' dengan amung bawehdeh, ieh ineh anak itindeh mepad kudeng kinula' bada luk tangeb abpa' rayeh. Idi ideh inan mula' kuda idi keréta teh.

⁵ Idi amung anak itindeh ineh nepamung. Idi ideh nelupo tangeb Arur Merom, pian pebunu' nelun Israil.

⁶ Idi kebala Tuhan ni Yusak, “Aleg iko matot nedeh, ngaceku pekak nebpa bang kareb luk kudeng ini Ui ngaté amungdeh ineh kuan lun Israil. Do' iko narad urat tumid amung kudadeh, idi ngeseb amung kerétadeh.”

⁷ Idi Yusak dengan amung lun luk pebunu' teh nacing déi' Arur Merom. Idi denak-denak ieh nemunu' nedeh ineh.

⁸ Idi Tuhan nemaré nedeh bang palad lun Israil. Idi ideh nengelaya' idi nengerada' nedeh macing déi' Sidon, idi Misrepot Maim pa busat aco, idi déi' Mispa pana'. Idi ideh nepebunu' nedeh, pad seburur pana' nateh luk mulun.

⁹ Idi Yusak nenganau' kuandeh ineh mepad kudeng luk icuk Tuhan. Idi ieh nenarad urat tumid amung kudadeh, idi nengeseb amung kerétadeh teh.

¹⁰ Yusak nelemubed, idi ieh nengaro bawang Hasor idi nengaté raca'neh. Kareb ineh bawang Hasor ineh meluun rayeh ratnan amung imet raca' luk baken.

¹¹ Idi ideh nengaté amung lun luk tudo bang bawang ineh, pad seburur pana' nateh luk mulun. Idi bawang ineh tinutungdeh teh.

¹² Idi amung bawang raca'-raca' ineh ilap Yusak. Idi amung raca'deh pana' tibanneh. Idi ieh nengaté nedeh maya' kudeng luk bila Musa demulun Tuhan ineh.

¹³ Iamo' baken amung bawang luk luun surud ineh nabud iseb lun Israil. Iamo' Hasor mo' luk iseb Yusak.

¹⁴ Idi amung binaweh bawang ineh idi amung aya'deh inaro lun Israil kuandeh. Iamo' amung lemulun ineh pinatédeh, pad seburur pana' nateh luk mulun.

¹⁵ Idi maya' kudeng luk bila Tuhan ni Musa, demulunNeh, kudeng ineh teh luk inau' Yusak. Sebuleng pana' nateh luk linaba ratnan amung bala Tuhan luk ni Musa.

Yusak Ngalap Amung Bawang Kanaan

¹⁶ Idi Yusak nengelaya' amung bawang ineh, ieh ineh pegkung-pegkung, maput Negeb, idi maput bawang Gosen, idi amung tana', raked, idi Raked Yarden, idi pegkung-pegkung Israil, idi amung tana'deh luk mebeneh,

¹⁷ rat Pegkung Halak luk muneng ku Edom, macing déi' Baal Gad luun raked Lebanon luk pa kabing busat aco Pegkung Hermon. Idi ieh nengaté amung raca'deh.

¹⁸ iamo' tuda'-tuda' io ieh nemunu' nedeh.

¹⁹ Aceh bawang pana' nateh nepedo' nelun Israil, iamo' lun Hiwi mo' luk tudo déi' Gibion luk nepedo' nedeh, idi amung luk baken linaya' bang bunu' ineh.

²⁰ Tuhan pangeh nengetueh niatdeh pad ideh nengerieng nelun Israil bang bunu', pad ideh sebuleng pinaté dengan na inan éi' kuandeh, ieh ineh maya' kudeng luk bila Tuhan ni Musa.

²¹ Idi bang kareb ineh teh Yusak iné' ngaté nelun enak luk tudo nan pegkung déi' Hebron, Debir, Anab, idi amung pegkung Yahuda idi Israil. Yusak nengaté nedeh idi nengusag bawangdeh.

²² Seburur lun enak pana' nateh luk ketecan bang bawang lun Israil. Iamo' inan teh lun Enak ketecan déi gasa, Gat, idi Asdod teh.

²³ Idi amung bawang ineh linaya' Yusak, maya' kudeng luk icuk Tuhan ni Musa. Idi Yusak nemaré tana' ineh kuan lun Israil mangun ku babpatdeh maya' inul pupudeh. Idi ideh nugka pebunu' peh.