YUSAK 10 - BALA LUK DO'

Yusak Ngelaya' Nelun Amori

¹ Idi Adonisadak, raca' Yerusalim, nekali' idi bawang Ai pangeh inaro idi inusag Yusak, idi raca'neh pangeh pinaté, mepad kudeng luk inau' kuan Yeriko idi kuan raca'neh. Idi teh ieh nekali' amung lun Gibion pangeh nepedo' nelun Israil, idi ideh tudo arangdeh.

² Idi lun Yerusalim pelaba tot, ngaceku bawang Gibion ineh bawang luk rayeh ratnan Ai. Idi amung deléi pana' lun mesangit.

³ Ngaceku ineh Adonisadak, raca' Yerusalim ineh, nengecuk Hoham, raca' Hebron, Piram, raca' Yarmut, Yapia, raca' Lakis, idi Debir, raca' Eglon,

⁴ kebalaneh, “Amé' ngedengan negku pelé tau ngaro bawang Gibion, ngaceku pangeh ieh nepedo' ni Yusak idi amung lun Israil.”

⁵ Ngaceku ineh limeh burur raca' Amori nepamung, ieh ineh raca' Yerusalim, raca' Hebron, raca' Yarmut, raca' Lakis, idi raca' Eglon dengan amung bawehdeh. Idi ideh nengelibut Gibion idi nemunu' nedeh.

⁶ Iamo' lun Gibion ineh nemaré kali' ni Yusak déi' su luk inan nelupo déi' Gilgal, kebaladeh, “Aleg iko necan nekai. Do' iko saget ngedengan nekai, idi ngulun nekai. Ngaceku amung raca' lun Amori luk tudo déi' luun surud ineh pangeh neperurum pian munu' nekai.”

⁷ Idi Yusak nenalan dengan bawehneh rat Gilgal.

⁸ Idi kebala Tuhan ni Yusak, “Aleg iko matot nedeh, ngaceku ideh pangeh biréKu namu. Idi seburur pana' nateh metueh rat namu.”

⁹ Idi Yusak nenalan rat Gilgal kedangan-kedangan ineh iné' ngedenak nedeh.

¹⁰ Idi Tuhan nengagau nedeh pa kiung amung lun Israil, pad mula' rat arangdeh pinaté déi' Gibion, idi ideh pirada' seruked dalan uké Bait Haran, idi lun Israil nengaté nedeh pad macing déi' Aseka idi déi' Makeda.

¹¹ Kareb ideh upun matot nelun Israil, maya' dalan luk musul rat Bait Horon amé' Aseka, idi Tuhan nemaré udan batu, pad ideh naté. Idi lun luk naté neketukan udan batu ineh meluun ula' ratnan lun luk pinaté lun Israil ku pelapet.

¹² Idi Yusak nepebala inan Tuhan kareb aco Tuhan nemaré amung lun Amori ineh kuan lun Israil. Ieh nemada' pedingeren amung lun Israil, kebalaneh, “O mateh aco, ugka' iko pa luun bawang Gibion, Idi iko, O bulan, pa luun Ruan Aijalon.”

¹³ Idi mateh aco pana' nugka' idi bulan pana' lutep, pad lun mula' ineh pangeh nengua' kuan bunu'deh. Bakenké dalan ini inayud bang Surat Yasar? Idi mateh aco pana' nugka' uned langit, idi ieh na macep ruked aco ineh.

¹⁴ Idi na luk idi aco kudeng ineh atun idi muci, kareb Tuhan nemaya' bala selemulun kudeng ineh, ngaceku Tuhan pebunu' libal lun Israil.

¹⁵ Idi Yusak nelemubed dengan bawehneh ineh su luk inandeh nelupo déi' Gilgal.

Yusak Ngakem Limeh Burur Raca' Amori

¹⁶ Idi limeh burur raca' ineh neburo idi sigapung bang lubang batu luk déi' Makeda.

¹⁷ Idi lun nemaré kali' ni Yusak, ratnan ideh nesigapung.

¹⁸ Idi kebala Yusak, “Ngelubid batu luk rayeh amé' bang lubang batu ineh. Idi ngecuk nelun ngabang munung ineh.

¹⁹ Iamo' aleg muyuh nganér su ineh. Do' ngerada bunu' muyuh, idi ngerieng nedeh. Aleg maré nedeh semuet bang bawangdeh. Ngaceku Tuhan Allah muyuh pangeh nemaré nedeh kuan muyuh.

²⁰ Yusak idi amung lun Israil nengaté nedeh, idi amung lemulun luk na pinaté ineh neburo idi nesemuet bang libung bawang.

²¹ Idi baweh ineh nelemubed dengan do' iné' su luk inandeh nelupo matun ni Yusak déi' Makeda. Idi seburur pana' nateh mekuu' ngedat seburur pana' rat arang amung lun Israil.

²² Idi kebala Yusak, “Kabin muyuh kakeb lubang batu ineh idi ngeruat raca' luk limeh burur ineh rat bang lubang batu ineh, idi nguit nedeh amé' negku.”

²³ Idi ideh nenganau' kudeng ineh idi nenguit limeh burur raca' ineh rat bang lubang batu ineh, ieh ineh raca' Yerusalim, raca' Hebron, raca' Yarmut, raca' Lakis, idi raca' Eglon.

²⁴ Kareb ideh pangeh nenguit raca'-raca' ineh remuat amé' ni Yusak, idi Yusak nenawar amung lun Israil tebubpun. Idi kebalaneh kuan amung lun rayeh lun pebunu' luk pangeh nenalan maya' neneh, “Amé' muyuh ngerareng kukud muyuh luun batang dier raca'-raca' ini.” Idi ideh nenganau' kudeng ineh.

²⁵ Idi kebala Yusak nedeh, “Aleg muyuh mator idi megegker. Do' muyuh metueh idi mekuu'. Ngaceku kudeng ineh ayu kekamen Tuhan muci kuan amung bunu' muyuh.”

²⁶ Pangeh ineh Yusak nengaté raca' ineh idi nengekito nedeh luun limeh pekatu kayuh. Idi ideh tekito luun kayuh ineh macing malem aco.

²⁷ Idi kareb aco macep Yusak nengecuk ngerurut nedeh ratnan kayuh ineh idi nala' nedeh bang lubang batu su luk inandeh nesigapung ineh. Idi ideh nengerareng tuda'-tuda' batu luk rayeh munung lubang batu ineh, idi macing aco sini pana', idi tieh su ineh.

Yusak Ngalap Tuda'-Tuda' babpat Tana' lun Amori Teh

²⁸ Idi aco sineh teh Yusak nengaro bawang Makeda, idi ieh nengaté raca' idi lun luk bang bawang ineh. Idi seburur pana' nateh luk mulun. Idi ieh nenganau' kuan raca' Makeda ineh mepad kudeng luk inau'neh kuan raca' Yeriko.

²⁹ Idi Yusak petacu nenalan rat Makeda iné' Libna. Idi amung lun Israil teh nemaya' neneh, idi ideh nengerieng nelun Libna.

³⁰ Idi Tuhan nemaré bawang ineh dengan raca'neh kuan lun Israil. Idi ideh nengaté amung lun luk mudeng bang bawang ineh. Idi Yusak nenganau' kuan raca' Libna mepad kudeng tau'neh kuan raca' Yeriko.

³¹ Pangeh ineh Yusak nenalan rat Libna iné' Lakis. Idi amung lun Israil teh nemaya' neneh, idi nengelibut bawang ineh, idi ideh nemunu' nedeh.

³² Idi Tuhan nemaré' Lakis teh kuan lun Israil. Idi Yusak nengelaya' nedeh bang aco luk kedueh. Ieh nemunu' nedeh idi nengaté amung lun luk mudeng bang bawang ineh, mepad kudeng amung luk pangeh inau'neh kuan Libna.

³³ Idi kareb ineh nacing Horam, raca' Giser ineh, pian ngedengan lakis, Iamo' Yusak nengelaya' neneh idi anak itinneh, pad seburur pana' nateh luk mulun.

³⁴ Idi Yusak dengan bawehneh nenalan rat lakis iné' Eglon. Idi ideh nengelibut bawang ineh idi nemunu' nedeh.

³⁵ Idi ideh nengelaya' bawang ineh kareb aco sineh teh. Idi ideh nengaté amung lun luk tudo bang bawang ineh, mepad kudeng amung luk inau' Yusak déi' Lakis.

³⁶ Idi Yusak dengan bawehneh nenalan rat Eglon iné' Hebron, idi ideh nemunu' nedeh.

³⁷ Idi ideh nengaro bawang ineh idi nengaté raca'neh idi amung lun bang bawang ineh, idi amung luk muneng ku bawang ineh teh. Seburur pana' nateh luk mulun, mepad kudeng luk inau' Yusak kuan Eglon.

³⁸ Idi Yusak dengan bawehneh nelemubed iné' Debir, idi ideh nengerieng nedeh.

³⁹ Idi ideh nengaro bawang ineh idi nengaté raca'neh idi amung lun bang bawang ineh, idi luk muneng ku bawang ineh teh. Seburur pana' nateh luk mulun déi' Debir mepad kudeng luk pangeh inau' Yusak kuan Hebron idi Libna dengan raca'deh.

⁴⁰ Idi Yusak nengaro amung bawang ineh, do' luk luun pegkung, idi luk déi' Negeb, idi luk luun raked, idi luk iang pegkung pana'. Idi ieh nengaté raca'deh dengan amung lun luk bang bawang-bawang ineh. Seburur pana' nateh luk mulun, mepad kudeng luk icuk Tuhan Allah lun Israil ineh.

⁴¹ Idi Yusak nengaro amung bawang ineh rat Kadis Barnia macing déi' Gasa, idi teh maput bawang Gosen macing déi' Gibion.

⁴² Idi amung raca' idi amung bawang ineh teh linaya' Yusak bang lawé ineh mo, ngaceku Tuhan Allah lun Israil nepebunu' libal lun Israil.

⁴³ Idi Yusak nelemubed dengan bawehneh iné' su luk inandeh nelupo déi' Gilgal.