YUSAK 1 - BALA LUK DO'

Allah Ngecuk Yusak Amé' Ngalap Bawang Kanaan

¹ Kareb pangeh até Musa lun duken Tuhan ineh, idi Tuhan nepebala ni Yusak Nun, lun duken Musa ineh, kebalaNeh,

² “DemulunKu Musa pangeh naté. Nekini do' iko gugkang idi nalan amé' guta Abpa' Yarden ineh dengan amung lun Israil, idi amé' bang bawang luk barénKu nemuyuh.

³ Amung su luk ridu' kukud muyuh ineh pangeh biréKu nemuyuh, maya' kudeng luk bilaKu ni Musa.

⁴ Idi lakan muyuh ineh rat su luk ali-ali luk pa kabing busat aco macing Pegkung Lebanon luk pa tinueh busat aco; rat Abpa' Pirat luk pa busat aco, idi aput tana' lun Hiti, idi suet Abpa' Rayeh luk pa acep aco.

⁵ Seburur pana' nateh luk miak ngelaya' namu, ruked ulunmu. Mepad kudeng Ui idi dengan Musa, kudeng ineh teh Ui miak ngedengan namu. Na ui miak necan namu.

⁶ Do' iko metueh idi mekuu', ngaceku iko miak nguyut pupu ini ngalap tana' ini luk pangeh pijani'Ku kuan tepundeh.

⁷ Do' iko metueh idi mekuu', idi mekél maya' amung ukum luk bida' demulunKu Musa namu. Aleg iko umai ratnan ineh, pelé iko inan peruan iapeh-iapeh su luk ulekmu muci.

⁸ Aleg tu-tu iko kelupan surat Ukum ini, iamo' maca' ineh kareb macang idi medacem, pelé iko mekél maya' amung luk inayud bang ineh. Ngaceku kudeng ineh iko uen ngeperuan.

⁹ Ngerawé bala Kini, “Do' iko metueh idi mekuu'. Idi aleg iko matot, idi merapang Ngaceku Tuhan Allahmu idi denganmu iapeh-iapeh luk ulekmu.’ ”

Ecuk Yusak Nelun Israil

¹⁰ Muci ratnan ineh Yusak nengecuk amung lun rayeh pupu ineh, kebalaneh,

¹¹ “Amé' muyuh arang lepo muyuh ineh idi ngecuk nelun mula' ineh kudeng ini, ‘Temina' nguit balu' muyuh. Kareb mabud teluh aco, idi amung muyuh miak guta Abpa' Yarden ini pad ngalap tana' luk biré Tuhan Allah muyuh ku babpat muyuh.’ ”

¹² Idi kebala Yusak nelun Rabin, nelun Gad, idi nan sebuang inul Manasé,

¹³ “Ngerawé muyuh bala luk biré Musa lun duken Tuhan ineh kuan muyuh, kebalaneh, ‘Tuhan Allah muyuh maré tana' ini inan muyuh ucu'.’

¹⁴ Nima' awan, anak, idi aya' muyuh tudo luun tana' luk biré Musa nemuyuh pa busat aco Abpa' Yarden. Iamo' do' lun pebunu' muyuh guta pa atun kinanak muyuh, pad ngadengan nedeh bang bunu'deh,

¹⁵ pelé Tuhan maré tana' inan kinanak muyuh ucu' mepad kudeng muyuh. Pangeh ineh do' muyuh lemubed amé' nan babpat tana' muyuh luk biré Musa lun duken Tuhan ineh nemuyuh, tungé' pa busat aco Abpa' Yarden.”

¹⁶ Idi ideh nengor bala Yusak ineh, kebaladeh, “Amung luk icukmu nekai ineh pian kai maya', idi iapeh-iapeh pana' iko ngecuk nekai, kai pana' amé' teh.

¹⁷ Mepad kudeng kai pangeh nemaya' bala Musa kudeng ineh teh kai maya' balamu, kudeng Tuhan Allahmu miak ngedengan namu, mepad kudeng Ieh nengedengan ni Musa.

¹⁸ Idé luk na sikal maya' balamu idi luk ngelaba balamu bang anun-anun luk dukenmu nedeh, ieh ineh pitayen. Do' iko metueh idi mekuu' teh.”