YUNUS 3 - BALA LUK DO'

Yunus Déi Ninewé

¹ Idi sekua' teh Tuhan nepebala ni Yunus,

² “Do' iko amé' Ninewé, bawang luk rayeh ineh idi mada' nedeh ratnan bala luk bilaKu namu.”

³ Idi Yunus iné' Ninewé maya' kudeng luk icuk Tuhan neneh. Idi Ninewé ineh aceh bawang luk pelaba rayeh, idi ieh miak delanin bang teluh aco.

⁴ Kareb Yunus pangeh nenalan, seaco kinioneh bang bawang ineh, ieh nemada' nedeh, keburi'neh, “Apat ngepulu' aco teh rat aco sini bawang Ninewé ini miak uen ngusag!”

⁵ Idi lun Ninewé nemanu inan bala Allah. Idi ideh nengecuk amung-amung lun bang bawang ineh mawa' na kuman. Idi ideh nenacung mangun ku tanu'deh pangeh nuren, do' lun dat idi lun do' pana'.

⁶ Kareb raca' Ninewé nekali' bala ineh, idi ieh nudur ratnan kerusineh, idi nengelengu kuyu'neh, idi ieh nenacung idi netudo luun abuh.

⁷ Idi ieh nemaré kali' kuan amung lun Ninewé: “Ini aceh ukum ratnan raca' idi lun rayeh-rayeh teh: Seburur pana' nateh miak kuman anun-anun; do' lemulun, idi sapi', idi dumba pana', na miak kuman idi ngirup.

⁸ Do' amung lemulun idi aya' pana' nacung. Do' anid burur sembayang inan Allah dengan niat luk matu, idi necan kekamenneh luk dat idi sala' luk pangeh inau'neh.

⁹ Kian lek Allah miak nginuud idi ugka' ratnan usehNeh pad tau na miak maté!”

¹⁰ Allah nenier luk inau'deh, idi nekali' nedeh nenecan kekamendeh luk dat. Idi Ieh nenginuud idi na nengacing susa' luk pangeh bilaNeh atun.