YUNUS 2 - BALA LUK DO'

Sembayang Yunus Luk Maré Ubur

¹ Idi Yunus nesembayang inan Tuhan Allah, bang batek lawid ineh, kesembayangneh,

² “O Tuhan, bang susa'ku ui nenawar Namu, idi Iko nengua' sembayangku. Rat bang su luk inan até ui nenawar mutuh pedengan, idi Iko neninger tawarku,

³ Iko nenala' negku, uned ribaruh abpa' rayeh, idi ui uned awerneh; idi ributmu luk metueh pa luunku.

⁴ Kebalaku, “Ui pangeh tila' rat pa kiungMu, kudeng apeh ui miak nier ruma'Mu luk meligan ineh teh.

⁵ Idi abpa' nengereb negku, idi nengened negku, idi uduh luk bang abpa' rayeh nebelilid luun uluhku.

⁶ Idi ui nepetarem pad macing puet ribaruh, luk bang tana' luk inan tanga' luk pinasek macing ruked-ruked. Iamo' Iko, O Tuhan Allahku, nengalap negku rat bang ribaruh ineh.

⁷ Kareb niatku lélé meputut, idi ui nengerawé Namu O Tuhan, idi sembayangku nacing Namu, bang Ruma'Mu luk meligan.

⁸ Ideh luk sembayang inan akangdeh luk na ulek, pangeh nenecan Namu,

⁹ Iamo' ui miak menani ngubur Namu; ui miak maré aceh baré Namu, ui miak nganau' luk pangeh pijani'ku. Ulun miak macing ratnan Tuhan!”

¹⁰ Idi Tuhan nepebala inan lawid ineh, idi ieh nenguta' ni Yunus luun tangeb.