YUNUS 1 - BALA LUK DO'

Yunus Buro Rat Pa Kiung Tuhan

¹ Kebala Tuhan ni Yunus, anak Amitai:

² “Do' iko amé' Ninewé, bawang luk rayeh ineh, idi mada' neneh; ngaceku Ui pangeh nekali' amung-amung lemulun luk bang bawang ineh pelaba dat.”

³ Iamo' Yunus neburo rat pa kiung Tuhan amé' Tarsis. Idi kareb ieh nacing Yopa, idi inan aceh kapal; luk lélé nalan amé' Spaniol. Idi ieh nemayar tabangneh idi ieh iné' maya' ineh, ngaceku ieh pian buro, pad ieh mado ratnan Tuhan.

⁴ Iamo' Tuhan nemaré aceh barui luun abpa' ineh; idi ribut pelaba rayeh, pad kapal ineh lélé mebila' ku ribut ineh.

⁵ Amung-amung lun luk ngakem bang kapal ineh matot, idi anid-anid bururdeh nengitang nawar allahdeh, idi ideh nenala' amung binaweh luk inuitdeh, pad kapal ineh meran. Iamo' Yunus iné' déi' dalem idi nerudap.

⁶ Idi lun luk ngimet kapal ineh iné' neneh, idi keburi'neh neneh, “Ngudeh iko rudap? Tumui iko idi nawar allahmu mutuh pedengan; kian lek ieh miak méi' netau, pad tau na maté.”

⁷ Idi keburi' lun luk ngakem bang kapal ineh, “Do' tau nala' udi, pad tau kali' idé luk mesala', idi ieh luk nengacing susa' ini kuan tau.” Idi ideh nenganau' kudeng ineh, idi Yunus luk nekaneh.

⁸ Idi kebaladeh neneh, “Do' iko mada' nekai, idé luk nengacing susa' ini! Iné ngudeh iko tungé'? Rat iapeh iko? Iapeh bawangmu, idi lun anun iko?”

⁹ Idi keburi' Yunus, “Ui ini lun Iberani, ui sembayang inan Tuhan Allah déi' Surga, luk nenganau' abpa' idi tana'.”

¹⁰ Idi lun luk ngakem bang kapal ineh pelaba tot, idi keburi'deh neneh, “Pelaba dat luk inau'mu!” (Ideh kali' ieh neburo rat pa kiung Tuhan, ngaceku ieh nemala nedeh.)

¹¹ Idi ribut ineh iuk amé' mula', idi ideh nengitun neneh, “Anun luk ruen kai namu, pad ribut ini ugka'?”

¹² Idi keburi' Yunus, “Do' nala' negku bang abpa', pad ribut ini miak ugka' kuan muyuh. Ui kali' ribut ini mangun ngaceku sala'ku.”

¹³ Iamo' lun luk ngakem bang kapal ineh nutun peribué amé' matun tangeb, iamo' na miak, ngaceku ribut pelaba dat.

¹⁴ Idi ideh nengitang nawar Tuhan, kesembayangdeh, “O Tuhan, kai mutuh Namu, aleg nima' nekai maté, ngaceku kai nala' lemulun ini. Aleg ngukum nekai mepad kudeng lun luk ngaté; ngaceku iko, O Tuhan luk nemada' nekai ratnan luk miak ruen kai.”

¹⁵ Idi ideh nengakem ni Yunus idi nemala' neneh bang abpa', idi petacu ribut ineh nugka'.

¹⁶ Idi lun luk ngakem bang kapal ineh matot inan Tuhan, pad ideh nemaré aceh baré idi nepejani' maya' Neneh.

¹⁷ Idi Tuhan nengecuk aceh lawid luk rayeh nelen ni Yunus; idi kinio Yunus bang batek lawid ineh teluh aco idi teluh dacem.