YOEL 3 - BALA LUK DO'

Ukum Kuan Amung Pupu

¹ Kebala Tuhan, “Kareb ineh Ui miak nuneb bawang Yahuda idi Yerusalim.

² Idi Ui miak ngamung amung-amung pupu, idi nguit nedeh amé' Ruan Yosapat. Su ineh Ui miak ngukum nedeh, ngaceku amung luk inau'deh kuan pupuKu sebuleng. Ngaceku ideh nengatad nelun Israil iné' bawang baken, idi nemabpat bawang Israil, ieh ineh tana'Ku.

³ Ideh nenala' udi pad ideh nekali' lun luk miak ngalap lun luk tiban ineh. Ideh nemasui anak deléi idi anak decur mangun ku demulun, pad ideh miak mayar raga decur luk mesawa' idi abpa' anggur teh.

⁴ “Anun luk ruen muyuh kuanKu, O Sur, Sidon, idi amung babpat Pilistin? Muyuh pian ngua' Negkuké? Kudeng muyuh nganau' kudeng ineh, Ui miak ngua' kuan muyuh dengan mesaget!

⁵ Muyuh pangeh nengalap pirak idi amasKu idi nenguit binawehKu luk meraga iné' bang ruma' sembayang muyuh.

⁶ Muyuh pangeh nenguit lemulun rat Yahuda idi Yerusalim mado rat bawangdeh sebuleng, idi nemasui nedeh kuan lun Grika.

⁷ Nekini Ui sikal nguit nedeh lemubed rat bang bawang luk inan muyuh nemasui nedeh. Ui miak nganau' kuan muyuh mepad kudeng luk inau' muyuh kuandeh.

⁸ Ui miak nima' anak deléi idi anak decur muyuh pisuen kuan lun Yahuda. Idi ideh miak masui nedeh kuan lun Sabian luk mado. Ui ini Tuhan pangeh nepebala.

⁹ “Maré kali' kuan amung-amung pupu: ‘Do' temina' pebunu', nawar lun luk mesangit, idi ngamung lun luk amé' pebunu', idi nalan!

¹⁰ Do' nuno belawan radu muyuh ku pelapet, idi nuno beluing muyuh ku uang gaman. Lun luk melaya' pana' na miak na amé' pebunu'.

¹¹ Miket nalan, O amung pupu, idi pamung luun ruan ineh!’ ” O Tuhan, nguit bawehMu luk metueh.

¹² “Do' amung pupu temina', idi amé' Ruan Yosapat. Idi su ineh Ui ini Tuhan miak tudo, idi ngukum amung-amung pupu.

¹³ Do' ngalap aling muyuh idi ngeranih nedeh, ngaceku ideh pelaba dat. Misak nedeh mepad kudeng misak bua' anggur, bang su luk inan marek bua' anggur, pad abpa' anggur ineh lubpi.”

¹⁴ Pelaba ula' ria' lemulun déi' Ruan Luk Inan Ukum. Idi su ineh aco Tuhan malé macing.

¹⁵ Aco' idi bulan medacem, idi gituen pana' na macang.

Peruan Bawang Yahuda

¹⁶ Tuhan ngarod rat Pegkung Sion; idi arodNeh rat Yerusalim mepad kudeng uni lalam; pad tana' idi langit megegker ku uni tangNeh. Iamo' Ieh miak ngelibung pupuNeh.

¹⁷ “Kareb ineh, O Israil, iko miak kali' Ui ini Tuhan Allahmu. Ui tudo déi' Sion, pegkungKu luk meligan. Yerusalim miak mangun ku bawang luk meligan; pupu baken na miak ngalap ineh baruh peh.

¹⁸ “Kareb ineh amung pegkung miak mangun ku kabun anggur; idi anid-anid surud inan sapi'; idi abpa' inan petap kuan amung lun Yahuda. Inan aceh arur rat Ruma' Allah, idi ieh miak ngeba' Raked Kayuh Pirur.

¹⁹ “Bawang Masir miak mangun kudeng su luk ali-ali, idi Edom aceh bawang luk miak tacin; ngaceku ideh nengaro bawang Yahuda, idi nengaté lemulun luk na mesala'.

^20-21 Ui miak ngua' ngunang lemulun luk pinaté; idi na Ui muit lemulun luk mesala'. Iamo' Yahuda idi Yerusalim inan lemulun macing ruked-ruked, idi Tuhan miak tudo luun Pegkung Sion.”