YOEL 2 - BALA LUK DO'

Kato Ineh Mangun Ku Pinginud Aco Tuhan

¹ Do' nateg tawak luun pegkung Sion, ieh ineh pegkung Allah luk meligan. Pad lun pupu Yahuda megegker, ngaceku aco Tuhan malé macing.

² Aco ineh medacem idi inan mesusa' niat, idi medacem ku laput. Kato luk pelaba ula' macing, mepad kudeng acang luun pegkung kareb pekak. Na luk mepad kudeng ini atun, idi muci pana' nateh luk miak mangun kudeng ineh.

³ Ideh kuman amung tibu mepad kudeng meseb ku apui. Pa atundeh tana' ineh mepad kudeng Kabun Eden, iamo' a puetdeh mepad kudeng bada luk na inan uduh mulun. Sebuleng pana' nateh luk neketecan inau'deh.

⁴ Ideh mepad kudeng kuda; idi apundeh mepad kudeng apun kuda luk amé' pebunu'.

⁵ Kareb ideh uput-uput déi' luun pegkung, unideh mepad kudeng uni keréta, idi kudeng uni budud luk tetungen. Ideh do' atur mepad kudeng baweh luk temina' amé' pebunu'.

⁶ Kareb ideh amé' muneng, amung lemulun matot, idi kiungdeh mebudi.

⁷ Ideh munu' mepad kudeng lemulun, idi manad alad mepad kudeng lun pebunu'. Idi ideh nalan tacu-tacu dengan na umai,

⁸ idi na pili teh. Na ideh mesabeng ku abpa' idi ar luk inau'deh.

⁹ Ideh semuet bang bawang luk rayeh; ideh uput maya' luun alad idi semuet maya' tabuk mepad kudeng lun mano.

¹⁰ Tana' idi langit megegker pa atundeh . Aco idi bulan medacem, idi gituen pana' na macang.

¹¹ Tuhan ngecuk bawehNeh dengan rayeh arod luk mepad kudeng uni lalam. Idi amung baweh luk maya' balaNeh pelaba ula' idi metueh. Aco Tuhan ineh pelaba dereh! Idéké luk tuman ratnan ineh?

Tuhan Ngecuk Uren

¹² Kebala Tuhan, “Do' uren nekini, idi lemubed maya' Negku dengan niat luk matu, idi nangi' dengan mawa'

¹³ Nima' niat muyuh luk meberat ngegala' susa' muyuh, aleg narak kuyu' muyuh sebuleng mo'.” Lemubed amé' inan Tuhan Allah muyuh. Ieh do' niat idi panu' ku éi'. Ieh mulai niat idi maya' jani'Neh. Ieh pian maré do' idi na sikal ngukum.

¹⁴ Kian lek, Tuhan Allah tau miak ngisu' terawéNeh, idi ngeperuan netau dengan uli' luk petap ratnan luk tibuen tau. Idi tau miak maré tuda'-tuda' baré kuanNeh ratnan padé idi abpa' anggur.

¹⁵ Nateg tawak déi' luun Pegkung Sion; do' ngecuk mawa' na kuman, idi nganau' aceh tebubpun sembayang.

¹⁶ Do' ngamung amung lun mula' ineh, pad ideh temina' amé' ku tebubpun luk meligan. Do' nguit lun luk mengered idi anak-anak, idi teh anak luk niti'. Meluun teh kuan lun luk aweh baruh, do' necan takepdeh idi amé' tebubpun.

¹⁷ Do' imam-imam luk ngakem kuan Tuhan nangi' idi sembayang bang Ruma' Allah, arang tanga' idi bubpun, kesembayangdeh, “Do' méi' kuan pupuMu, O Tuhan. Aleg nima' lun pupu baken ngedat nekai idi situnga nekai, idi pebala, ‘Iapeh Allah muyuh?’ ”

Tuhan Nganau' Tana' Mebaleng Teh

¹⁸ Idi Tuhan nengegala' éi'Neh kuan bawangNeh idi pupuNeh.

¹⁹ Idi Ieh nengua' sembayangdeh: KebalaNeh, “Nekini Ui maré padé nemuyuh, dengan abpa' anggur idi umau, pad muyuh mebor, idi pad lun pupu baken na situnga nemuyuh peh.

²⁰ Ui miak nala' baweh kato luk arang muyuh, luk nacing rat pa tinueh busat aco. Idi Ui ngusu sebuangdeh amé' déi' su luk ali-ali. Idi ideh luk pa atun miak uen ngusu amé' Abpa' Maté. Idi ideh luk pa puet amé' Abpa' Rayeh. Idi butungdeh miak mebuen. Ui nganau' kudeng ini ngaceku maya' amung luk inay'deh kuan muyuh.

²¹ “O amung lati', aleg matot, do' mawang niat idi geriguen, ngaceku Tuhan nenganau' mula' kuan muyuh.

²² O amung pung, aleg matot, ngaceku inan mula' uduh peh. Idi amung kayuh pana' kebua'; idi bua' gita' idi bua' anggur pana' mula'.

²³ “O lun Sion, do; mawang niat, ngaceku luk inau' Tuhan Allah muyuh kuan muyuh. Ieh pangeh nemaré udan luk petap, do' udan luk atun idi udan luk muci pana'.

²⁴ Su luk inan rumik miak panu' ku padé; idi lubang luk iring su luk inan marek bua' anggur ineh lubpi ku abpa' anggur idi umau.

²⁵ Ui miak ngelibal luk na ilap muyuh bang lak luk inan kato nekuman tibu muyuh. Ui luk nengecuk baweh ineh nengedereh nemuyuh.

²⁶ Nekini muyuh mula' luk kenen idi mebor. Muyuh miak ngubur Tuhan Allah muyuh, luk nenganau' luk pelaba do' kuan muyuh. Idi pupuKu na miak inan situnga baruh peh.

²⁷ Kareb ineh, O Israil, muyuh miak kali' Ui idi arang muyuh, idi Ui ini Tuhan luk Allah muyuh, idi na luk baken. Idi pupuKu na miak inan situnga baruh peh.

Ratnan Maré Roh Allah

²⁸ “Muci Ui miak ngutang RohKu luun amung-amung lemulun: anak muyuh luk deléi idi decur miak mada' bala luk barénKu, idi deléi muyuh luk mengered miak nginupi, idi anak adi' deléi muyuh miak nier luk sirendeh.

²⁹ Idi kareb ineh teh Ui miak ngutang RohKu luun amung demulun pana', do' deléi idi decur.

Tanu' Aco Tuhan

³⁰ “Ui miak maré tanu' bang langit idi bang tana' kareb nateh aco ineh. Idi inan teh dara', apui, idi rabpun.

³¹ Aco miak medacem, idi bulan mesia' kudeng dara', kareb nateh aco Tuhan luk rayeh luk inan matot ineh macing.

³² Iamo' amung lemulun luk mutuh pedengan ratnan Tuhan miak uen ngulun. Mepad kudeng luk bila Tuhan, ‘Inan lemulun luk miak uen ngulun, luun Pegkung Sion idi déi' Yerusalim. Lemulun luk pilin Tuhan miak mulun.’ ”