YOEL 1 - BALA LUK DO'

¹ Ini bala Tuhan kuan Yoel, anak Petuil.

Tangi' Ngaceku Amung Tibu Nedat

² Ninger, muyuh lun luk mengered, idi amung lun baken luk déi' Yahuda teh: Inanké susa' nangun kudeng ini nekali' muyuh idi tepun muyuh mon?

³ Do' mada' ratnan ineh kuan anak muyuh, pad ideh mada' anakdeh, macing ku anak inul muyuh pana'.

⁴ Sebuang tibu kinan kato tulang. Idi luk ketecan kinan kato pedier idi kato sekiré.

⁵ Kulat idi nangi', O muyuh lun luk mabuk, idi lun luk ngirup abpa' anggur ngaceku bua' anggur pangeh nabud.

⁶ Kato luk pelaba ula' nengedat lati' tau; kinula'deh na mekiap idi ideh pelaba tueh; lipendeh metadem mepad kudeng lipen balang.

⁷ Ideh pangeh nengedat anggur tau, idi nekuman bua' gita' tau. Idi anitdeh pana' kinandeh, pad amung angatdeh mebuda'.

⁸ O lun muyuh, do' nangi' mepad kudeng decur luk temido tudukneh luk naté'.

⁹ Na luk idi padé idi abpa' anggur luk miak barén bang Ruma' Allah; idi imam-imam nangi' ngaceku na luk miak barén sabpen kuan Tuhan.

¹⁰ Amung lati' na uli'; idi tana' pana' nangi'; ngaceku amung padé nedat, idi bua' anggur idi bua' saitun pana' nekarang.

¹¹ O muyuh lun luk nganau' lati', idi muyuh luk ngasa' kabun anggur, do' muyuh mesusa' niat, ngaceku padé, ikun, idi amung tibu baken pangeh nedat.

¹² Idi amung lawa anggur idi gita'; amung bua' luk baken pangeh nekarang. Idi awang lemulun pangeh nekarang teh.

¹³ O muyuh imam luk ngeseb baré luun bubpun Tuhan, do' muyuh nacung idi nangi' idi mepamung bang Ruma' Allah kedangan-kedangan. Na luk idi padé idi abpa' anggur luk miak barén kuan Allah muyuh.

¹⁴ Do' ngecuk mawa' na kuman, idi nganau' aceh tebubpun sembayang; do' ngamung amung lun rayeh luk nguyut, idi amung pupu Yahuda bang Ruma' Tuhan Allah muyuh, idi nawar Neneh.

¹⁵ Aco Tuhan ineh muneng; idi Ieh nguit até ratnan Luk Melalud. Idi kareb aco ineh pelaba dereh.

¹⁶ Kai kali' amung tibu kai pangeh nedat. Idi na luk idi awang niat bang Ruma' Allah tau.

¹⁷ Padé pana' maté luun tana' luk tekering. Idi na luk miak nugen, idi lepo padé tau pana' merapuk peh.

¹⁸ Idi amung dumba idi sapi' pana' muni ku laudeh! Idi dawa' sapi' megagau, ngaceku na uduh kenendeh. Idi dawa' dumba pana' medereh teh.

¹⁹ Ui nawar Namu, O Tuhan, ngaceku uduh idi kayuh nekarang mepad kudeng luk iseb.

²⁰ Idi amung pung luk meliput pana' nawar Namu, ngaceku amung arur nekeket, idi uduh pana' nekarang mepad kudeng luk iseb.