YESAYA 9 - BALA LUK DO'

¹ Idi na luk idi dalan mepuit ratnan kareb luk mesusa' ineh. Bawang pupu Sebulon idi Naptali inigu' atun, iamo' muci babpat ineh miak buren, rat Abpa' Rayeh pa busat aco macing bawang luk dipar Abpa' Yarden, idi Galilia pana', su luk inan pupu baken tudo.

Raca' Luk Miak Macing Muci

² Lemulun luk tudo bang dacem pangeh nekali' acang luk rayeh! Ideh tudo bang bawang luk melungung, iamo' nekini acang merasat luundeh.

³ O Tuhan, Iko nemaré nedeh awang luk rayeh. Iko nengawang niatdeh. Ideh mawang niat ku luk inau'Mu, mepad kudeng ideh mawang niat kareb ngeranih, idi kareb mabpat binaweh luk tiban.

⁴ Ngaceku Iko nemutul paga'deh idi rukud luk ku mebal tudungdeh. O Tuhan Iko nengelaya' pupu ineh luk nengedereh idi nemuyok pupuMu, mepad kudeng Iko nengelaya baweh Midian mon.

⁵ Kasut baweh luk ngerieng idi ayungdeh luk melutak ku dara' miak sabpen macing mabud!

⁶ Anak ineh tinganak kuan tau, Anak deléi pangeh biré kuan tau! Idi amung-amung lalud uen ngerareng luun tudungNeh. Ieh miak tetanen “Luk Nan Mawa,” “Lun luk ngimet,” “Allah luk Melalud,” “Taman luk Meruked,” idi “Raca' Awang.”

⁷ Lalud luk Neneh iuk-iuk temubu' idi imetNeh megéi' do' udeng. Ieh miak ngelibal imet Raca' Daud. Luk matu idi mesiri mangun ku lawa laludNeh, rat kareb ini macing kekipedneh. Tuhan luk Melalud miak ngeletep amung ineh.

Tuhan Miak Ngukum Israil

⁸ Tuhan lutep ngukum imet Israil, ieh ineh inul Yakub.

⁹ Amung lun Israil idi amung lun luk tudo bang bawang Samaria miak kali' ineh. Nekini ideh medita' niat idi mesido' niat. Kebaladeh,

¹⁰ “Ruma' ratnan batu bata netabpa, iamo' kai miak ngelibal nedeh ku ruma' batu. Tuked ratnan kayuh gita' pangeh tingal, iamo' kai miak ngelibal ineh ku kayuh tumuh luk do'.”

¹¹ Tuhan nengagau bunu'deh, pad ideh nengerieng nedeh.

¹² Siria luk pa busat aco idi Pilistin luk pa acep aco tenganga' tang pian nelen Israil. Iamo' useh Tuhan na ugka', idi ticu'Neh tutang pian ngukum.

¹³ Pupu Israil nateh nuren. Sagan pana' Tuhan luk Melalud nengukum nedeh, nateh ideh nelumi Neneh.

¹⁴ Bang seaco Tuhan miak ngukum lun rayeh Israil idi pupuneh. Tuhan miak ngaleb uluh idi natek iur Israil.

¹⁵ Lun merar idi lun luk buren mangun ku uluh — idi nabi luk mebalih mangun ku iur.

¹⁶ Lun luk ngimet pupu ini pangeh nengeraruh nedeh pad ideh mepakau niat.

¹⁷ Idi seburur pana' rat arang anak adi' deléi nateh puatin Tuhan, idi na Ieh méi' inan decur tinula' idi anak maté, ngaceku amung pupu ineh dat idi na manu, idi amung luk beléndeh pana' dat. Iamo' useh Tuhan na ugka', idi ticu'Neh tutang pian ngukum.

¹⁸ Dat pupu ineh mulun mepad kudeng apui luk ngeseb kayuh luk metabpa', idi bitarung pana'. Ieh mulun mepad kudeng apui bang pulung kareb merikan, pad rabpun kemikit amé' i dita'.

¹⁹ Ngaceku Tuhan luk Melalud museh, ukumNeh ngeseb mepad kudeng apui aput tana' Israil, pad ngaté pupu ineh, pelé ideh na méi' seburur inan seburur.

²⁰ Aput bawang ideh ngalap idi kuman anun-anun luk miak kenendeh, iamo' na ideh miak mebor, pad ideh kuman anakdeh sebuleng!

²¹ Pupu Manasé idi pupu Epraim pebunu' arangdeh sebuleng, idi ideh pamung munu' Yahuda. Iamo' useh Tuhan na ugka', idi ticu'Neh tutang pian ngukum.