YESAYA 8 - BALA LUK DO'

Anak Yesaya Mangun Ku Tanu' Kuan Lun Mula'

¹ Kebala Tuhan negku, “Ngalap aceh luk inan ngayud luk rayeh, idi ngayud dengan urup luk mekara: ‘Miket Ngaro, Saget Ngalap.’

² Nakap dueh burur lemulun luk inan merapet, ieh ineh Imam Uria, idi Sekaria Yeberekia luk mangun ku lun nekali'.”

³ Muci ui pamung dengan awanku luk nabi teh. Ieh mali' idi nenganak aceh anak deléi. Kebala Tuhan negku, “Nganau' ngadanneh, “Miket Ngaro, Saget Ngalap.’

⁴ Kareb nateh anak ineh petap rayeh pebala, ‘Ina'’ idi ‘Ama',’ amung binaweh Damsik idi luk uen ngaro rat Samaria miak tebanen raca' Asur.”

Raca' Asur Miak Macing

⁵ Kebala Tuhan negku teh,

⁶ “Ngaceku pupu ini na pian ku Arur Siloa luk melitong, idi ngaceku ideh megegker pa kiung Raca' Resin idi Raca' Peka,

⁷ Ui ini Tuhan miak nguit raca' Asur dengan amung bawehneh, pad ieh ngerieng Yahuda. Ideh macing mepad kudeng Abpa' Pirak luk tubu' belen luk ngereb amung tangeb.

⁸ Ideh ngerieng Yahuda mepad kudeng tubu' belen luk ngereb aput bawang pad tudung.” Allah idi dengan tau! IladNeh tebalad, pad Ieh matar bawang tau.

⁹ O amung pupu, do' muyuh mepamung idi matot! O bawang luk iring tana' do' muyuh ninger. Do' muyuh temina' pebunu' idi matot!

¹⁰ Do' muyuh pegayam ratnan luk ruen muyuh! Iamo' na muyuh miak ngacing luk pian muyuh. Sagan tu pana' muyuh pegayam tu-tu, na ulekneh, ngaceku Allah idi dengan kai.

Tuhan Periteteng Inan Nabi

¹¹ Dengan laludNeh luk rayeh Tuhan neperiteteng negku, pad ui na maya' dalan luk bén lun mula'. KebalaNeh,

¹² “Aleg iko semuet bang gayam lun mula', idi aleg merapang ku luk inandeh matot.

¹³ Do' ngerawé, Ui ini Tuhan luk Melalud idi Meligan. Petulu iko matot Negku.

¹⁴ Ui mepad kudeng batu luk inan metebaceng kuan lun mula', ngaceku ideh matot ku liganKu. Ui mepad kudeng abpung luk ngabpung lemulun rat imet Yahuda idi Israil, idi lun rat Yerusalim pana'.

¹⁵ Mula' lemulun miak metebaceng idi meluka'. Ideh miak mebpeh idi mekareg, idi mekaneh abpung pana'.”

Bebpeng Ratnan Ngitun Nelun Luk Naté

¹⁶ Anak sekola'ku miak nginita bala luk biré Allah negku.

¹⁷ Tuhan nesigapung ratnan pupuNeh, iamo' ui manu idi merapet Neneh.

¹⁸ Ini ui dengan amung anak luk biré Tuhan negku. Tuhan luk Melalud luk inan kerusi luun Pegkung Sion pangeh nenganau' nekai mangun ku bala luk mulun kuan pupu Israil.

¹⁹ Lemulun miak mutuh namu ngitun bala rat nelun luk mangun idi lemulun luk inan ileh Sétan luk dureng-dureng. Kebaladeh, “Petulu lemulun ngitun bala ratnan ada' idi ngitun nelun luk naté pad ngedengan lemulun luk mulun.”

²⁰ Iamo' do' iko ngor baladeh, kebalamu, “Do' ninger luk badén Tuhan nemuyuh! Aleg ninger bala lun luk mangun –– luk beléndeh na ngacing luk do' kuan muyuh.”

Kareb Luk Mesusa'

²¹ Lun mula' miak nalan-nalan bang bawang dengan melau idi mesusa' niat. Ngaceku lau idi usehdeh, ideh miak ngediman raca'deh idi Allahdeh. Ideh tengook idita',

²² idi nutong i tana', iamo' na luk kali'deh baken ratnan susa' idi dacem; idi ideh uen ngusu amé' bang dacem luk katotdeh.