YESAYA 7 - BALA LUK DO'

Bala Kuan Raca' Akas

¹ Kareb Raca' Akas, anak Yotam Usia nengimet bawang Yahuda, ideh nengimun pebunu'. Resin, raca' Siria idi Peka Remalia, raca' Israil nengerieng Yerusalim, iamo' na miak ngelaya' bawang ineh.

² Raca' Yahuda neninger bala ratnan baweh Siria nacing bawang Israil, idi raca' dengan anak itinneh pelaba tot, pad ideh megegker, mepad kudeng kayuh luk meguer ku bui.

³ Kebala Tuhan ni Yesaya, “Nguit anakmu Sier Yasub idi amé' papu Raca' Akas. Medueh miak papu' neneh su luk inan lun ngebaruh kibung paped abang luk dalan abpa' ratnan takung luk pa luun.

⁴ Ngecuk neneh matar do'-do', ungeng, idi na megagau, idi na matot. Useh Raca' Resin idi lun Siria, idi useh Raca' Peka na meluun susa' ratnan rabpun ratnan dueh apak kayuh.

⁵ Siria pangeh pegayam dengan Israil idi raca'neh.

⁶ Ideh pian ngerieng Yahuda, ngatot nelun mula' pad ideh perurum nedeh, idi ngikit anak Tabil mangun ku raca' Yahuda.

⁷ “Iamo' Ui ini Tuhan pebala: Amung ineh na miak mangun.

⁸ Ngaceku bawang Siria na meluun tueh ratnan Damsik. Idi Damsik na meluun tueh ratnan Raca' Resin. Idi Israil pana' na tuman mangun ku bawang macing anem ngepulu' limeh lak.

⁹ Israil na meluun tueh ratnan bawang Samaria. Idi Samaria na meluun tueh ratnan Raca' Peka. “Kudeng anumu na mepicet, iko na tuped meraben.”

Tanu' Immanuél

¹⁰ Tuhan nemaré aceh bala ni Akas teh:

¹¹ “Mutuh Tuhan Allahmu maré aceh tanu' namu. Tanu' ineh miak macing ratnan su luk inan até, kian rat surga luk déi' dita' lek.”

¹² Idi kebala Akas, “Na tu ui mutuh tanu'. Ui na sikal nutun Tuhan.”

¹³ Idi kebala Yesaya neneh, “Ninger iko, O inul Raca' Daud; petap susa' kudeng iko ngerur lemulun, pianké iko ngerur Allah teh?

¹⁴ Tuhan sebuleng miak maré aceh tanu' namu. Inan seburur anak adi' decur luk mali'. Ieh miak nenganak aceh anak deléi idi ieh nganau' ngadanNeh ‘Immanuél.’

¹⁵ Kareb Ieh petap rayeh nala' luk dat idi mili' luk do'. Ieh ngirup rata sapi' idi kuman duru' tebikan.

¹⁶ Kareb nateh anak ineh mileh mili', bawang dueh raca' luk ngatot namu ineh miak tacin.

¹⁷ “Tuhan miak ngacing kuanmu, kuan pupumu idi kuan tetek ruma' raca' aceh kareb luk meluun susa' ratnan luk pangeh mangun atun, ieh ineh muci ratnan imet Israil nepatad ratnan Yahuda. Ieh miak nguit raca' Asur!

¹⁸ “Kareb ineh Tuhan niuk pad lun Masir macing mepad kudeng laled ratnan abpa' luk palung nan Abpa' Nil, idi lun Asur macing rat bawangdeh mepad kudeng tebikan.

¹⁹ Ideh temapi bang ruan luk mula' batu idi bang lubang batu pana', idi ideh ngebpu amung kayuh luk metabpa' idi laman pana'.

²⁰ “Kareb ineh, Tuhan nabpar lun luk mingit rat déi' dipar Abpa' Pirat, ieh ineh raca' Asur. Ieh miak mingit buluh tang muyuh idi ngiki uluh muyuh idi mingit aput burur muyuh.

²¹ “Kareb ineh teh, kudeng seburur lemulun inan sebuleng sapi' idi dueh amék,

²² ideh miak maré mula' rata pad inan petap. Matu, amung lemulun luk ketecan bang bawang miak ngirup rata idi kuman duru' tebikan.

²³ “Kareb ineh, kabun luk do' luk inan meribu lawa anggur, idi luk raga meribu balad pirak, miak mapet ku tabpa' idi uduh.

²⁴ Na lemulun mekuu' amé' su ineh kudeng na ieh nguit binor. Matu, aput bawang mapet ku tabpa' idi uduh.

²⁵ Amung surud su luk inan lati' atun, mapet ku tabpa' idi uduh, pad na lemulun amé' su ineh. Ineh mangun ku laman sapi' idi dumba mo'.”