YESAYA 66 - BALA LUK DO'

Tuhan Ngukum Amung Pupu

¹ Kebala Tuhan, “Langit ineh kerusiKu, idi tana' ineh tapin kukudKu. Kudeng apehké ayu ruma' luk miak piduten muyuh kuanKu, idi su luk inanKu tudo?

² Ui sebuleng nemudut amung-amung pudut! Ui mawang niat ku lemulun luk mebeneh niat idi luk uren, luk matot Negku idi luk maya' balaKu.

³ “Lun mula' nganau' luk piandeh. Ideh ngaté sapi' ku baré, idi lemulun pana' keretendeh ku baré teh; ideh ngeret anak dumba, idi mutul dier uko'; ideh maré baré akan idi teh dara' barek; ideh maré umau luk do' buen, idi sembayang inan akang. Ideh mawang niat ku sembayang luk pelaba dat.

⁴ Ngaceku ineh Ui ngacing susa' kuandeh — ieh ineh luk inandeh matot — ngaceku seburur pana' nateh luk nengor balaKu, idi luk neninger tawarKu. Dengan rungen ideh nengelaba balaKu idi nenganau' luk dat.”

⁵ O muyuh luk matot inan Tuhan idi luk maya' ukumNeh, do' ninger balaNeh: “Sebuang pupu muyuh megateh nemuyuh idi na sikal perurum nemuyuh, ngaceku muyuh lutep maya' Negku. Ideh situnga nemuyuh, kebaladeh, ‘Kai pian nier nemuyuh mawang niat, nima' Tuhan ngegala' rayehNeh pad ngulun nemuyuh.’ Iamo' ideh ineh luk uen ngigu'!

⁶ Do' muyuh ninger arod luk rayeh ineh bang bawang Yerusalim idi bang Ruma' Allah. Ieh ineh arod Tuhan luk ngukum amung bunu'Neh!

⁷ “BawangKu luk meligan mepad kudeng decur luk denak-denak nenganak aceh anak deléi dengan na mét nenganak.

⁸ Idéké luk kali' ratnan luk kudeng ineh? Miakké aceh pupu uen nenganak bang aceh aco mo'? Sion na medereh mio kareb nateh pupu ineh uen nenganak.

⁹ Petuluké Ui ngedengan pupuKu pad macing ideh malé uen nenganak, iamo' na nima' nedeh uen nenganak?” Tuhan pangeh nepebala.

¹⁰ O muyuh luk mawa inan bawang Yerusalim, do' muyuh mawang niat idi do' ria' ku ieh! O muyuh luk netemido neneh atun, do' muyuh mawang niat ku ieh!

¹¹ Muyuh ngalap babpat ratnan peruanneh, mepad kudeng anak luk niti'.

¹² Kebala Tuhan, “Ui ngeperuan nemuyuh macing ruked-ruked. Binaweh amung pupu miak manud amé' nemuyuh mepad kudeng abpa' luk na mekeket. Muyuh mepad kudeng anak luk uen tinanneh niti', idi luk inanneh mawa.

¹³ Ui miak ngubuk nemuyuh déi' Yerusalim, mepad kudeng aceh tinan ngubuk anakneh.

¹⁴ Kareb muyuh kali' amung ineh mangun, muyuh miak mawang niat, pad muyuh metueh idi do' ulun. Kareb ineh muyuh kali' Ui ini Tuhan ngedengan lemulun luk maya' balaKu, idi ngegala' usehKu kuan amung bunu'Ku.”

¹⁵ Tuhan macing dengan apui bang keréta luk mepad kudeng libuleh, pad ngukum lemulun luk inanNeh megateh.

¹⁶ Dengan apui idi pelapet Ieh ngukum amung lemulun bang tana' ini luk mesala' kaliNeh, pad ideh maté.

¹⁷ Kebala Tuhan, “Kekiped lun mesala' malé macing, ieh ineh lemulun luk ngeligan bururdeh pad sembayang inan allah baken, idi luk kuman barek idi anak labo dengan akan baken luk dat.

¹⁸ Ui kali' terawédeh idi kekamendeh. Ui amé' ngamung lemulun ratnan anid-anid pupu. Kareb ideh mepamung, ideh miak nier laludKu,

¹⁹ pad ideh kali' Ui ini luk ngukum nedeh. “Iamo' Ui miak ngulun sebuangdeh idi ngecuk nedeh amé' mada' amung pupu idi bawang luk mado luk nateh neninger ratnan ngadanKu, idi luk nateh nekali' rayeh idi laludKu: ieh ineh Spaniol, Libia, Lidia dengan lun luk mileh ngelatik ku binor, Tubal idi Grika. Ideh miak mada' ratnan rayehKu kuan pupu ini.

²⁰ Ideh miak nated amung kinanak muyuh ratnan anid pupu mangun ku baré kuanKu. Ideh miak nated nedeh macing inan pegkungKu luk meligan déi' Yerusalim. Ideh miak maya' kuda, idi kuda luk seupa keladai, unta, keréta bunu' idi keréta binaweh, mepad kudeng lun Israil nguit baré akan macing inan Ruma' Allah bang su luk inan luk meligan.

²¹ Ui miak nganau' sebuangdeh mangun ku imam idi lun Liwi.

²² “Mepad kudeng tana' luk mebaruh idi langit luk mebaruh meraben ngaceku laludKu, kudeng ineh teh inul muyuh idi ngadan muyuh lutep peh.

²³ Anid Irau Bulan Baruh, idi anid Aco luk inan Mudeng, lemulun ratnan anid-anid pupu miak amé' sembayang Negku tungé' Yerusalim.” Kudeng ini bala Tuhan.

²⁴ “Idi kareb ideh remuat ideh miak kali' butung lemulun luk sikal metueh rat Negku. Uled luk kuman nedeh na miak maté, idi teh apui luk ngeseb nedeh pana' na miak maté. Amung lemulun megileg nier nedeh.”