YESAYA 65 - BALA LUK DO'

Ukum Allah Kuan Lemulun Luk Sikal Metueh Rat Neneh

¹ Kebala Tuhan, “Ui netemina' ngua' putuh pupuKu, iamo' na ideh nesembayang. Ui netemina' papu' nedeh, iamo' na ideh nenakap Negku. Pupu ineh na nenawar Negku, sagan pana' Ui megéi' temina' ngua' idi pebala, ‘Idi Ui; Ui miak ngedengan nemuyuh.’

² Rat mon Ui megéi' temina' ngikak pupu ini luk nganau' sala' idi maya' piandeh sebuleng dengan metueh niat.

³ Dengan na migu' ideh megéi nganau' Negku museh. Ideh maré baré bang kabun su luk inandeh sembayang inan Allah baken, idi teh ngeseb umau luk do' buen luun bubpun allah ineh.

⁴ Kareb medacem ideh amé' bang lubang batu idi tanem, pad ngitun ada' lun naté. Pupu ini kuman barek, idi ngirup abpa' pang luk biré kuan allah baken.

⁵ Ideh ngecuk lun baken na muneng nedeh, ngaceku ideh meligan idi na miak kamen. Ui megateh inan lemulun luk kudeng ineh — usehKu nedeh mepad kudeng apui luk na maté.

⁶ “Ui pangeh nemutut ukum kuandeh, idi ukumdeh ineh pangeh inayud. Na Ui mekelupan luk inau'deh, iamo' Ui ngua'

⁷ sala'deh, idi sala' tepundeh. Ideh nengeseb umau luk do' buen luun surud su luk inandeh sembayang inan allah baken, idi ideh nengedat Negku. Idi Ui ngukum nedeh maya' kekamendeh.”

⁸ Kebala Tuhan, “Na lemulun ngusag bua' anggur luk do'; iamo' ideh ngalap abpa'neh. Idi Ui pana' na ngusag pupuKu — Ui ngulun lemulun luk maya'' Negku.

⁹ Ui ngeperuan nelun Israil ratnan pupu Yahuda, pad inuldeh miak ngalap tana'Ku luk luun pegkung. PupuKu luk pinili' luk maya' Negku miak tudo su ineh.

¹⁰ Ideh sembayang Negku, idi ideh miak nguyut dumba idi sapi'deh amé' nan laman déi' Raked Saron luk pa acep aco, idi Ruan Susa' luk pa busat aco.

¹¹ Iamo' na ieh kudeng ineh kuan muyuh luk necan Negku, idi luk na ngerawé Sion, pegkungKu luk meligan ineh idi luk sembayang inan allah Nasip idi Kapeh Tau' luk titen Gad idi Meni.

¹² Muyuh miak pitayen, ngaceku muyuh na nengor balaKu, idi na neninger tawarKu. Dengan rungen muyuh nengelaba ukumKu idi nenganau' luk dat.

¹³ Ngaceku ineh kudeng ini bala Tuhan: Lemulun luk sembayang Negku idi maya' balaKu petap akan, iamo' muyuh miak melau idi meparing. Ideh miak mawang niat, iamo' muyuh uen ngigu'.

¹⁴ Ideh menani' mawang niat, iamo' muyuh nangi' ku susa' niat.

¹⁵ PupuKu luk pinili' ngediman nelun ku ngadan muyuh. Ui ini Tuhan ngaté nemuyuh. Iamo' Ui maré aceh ngadan luk mebaruh kuan lemulun luk maya' balaKu.

¹⁶ Idé-idé luk bang bawang ineh luk mutuh peruan, pian uen Allah luk lutep maya' jani' ngeperuan. Susa' luk mon miak buro idi na uen ngerawé peh.”

Pudut Luk Mebaruh

¹⁷ Kebala Tuhan, “Ui mudut tana' idi langit luk mebaruh. Amung luk pangeh mangun mon miak mekelupan.

¹⁸ Do' muyuh mawang niat ku luk pidutenKu. Yerusalim luk mebaruh luk pidutenKu mepanu' ku awang, idi pupuneh mawang niat peh.

¹⁹ Ui pana' mawang niat ngaceku su ineh, idi na lemulun mutuh pedengan.

²⁰ Anak isuut na maté, idi amung lemulun mekadang ulun. Lemulun luk ulun meratu lak tetanen ana adi', idi idé-idé luk ulunneh na macing meratu lak kareb ieh maté tetanen kidiman.

^21-22 Lemulun miak tudo bang ruma' luk pidutendeh ineh — ruma' ineh na miak rawen lun baken. Ideh nibu bua' anggur idi ngirup abpa'neh. Na ieh rupen lun baken. PupuKu mekadang ulun mepad kudeng kayuh. Ideh mawang niat ku amung-amung luk lapendeh.

²³ Amung kekamendeh inan peruan, idi anak-anakdeh na mekaneh susa'. Ui ngeperuan nedeh dengan inuldeh macing ruked-ruked.

²⁴ Kareb nateh ideh mangeh sembayangdeh Negku, Ui ngua' putuhdeh.

²⁵ Bungalé idi anak dumba pad-pad kuman, idi balang kuman uduh mepad kudeng sapi'. Menipeh pana' na megalih. Idi na luk dat idi luk ngurat luun Sion, pegkungKu luk meligan ineh.”