YESAYA 64 - BALA LUK DO'

¹ Ngudehké Iko na ngerarak langit idi temurun, pad pegkung-pegkung miak nier Namu dengan megeker ku totdeh,

² mepad kudeng abpa' luk manok luun apui. Amé ngegala' laludMu kuan bunu'Mu, pad amung pupu megegker pa kiungMu.

³ Atun Iko iné nganau' luk inan matot luk na tirawé kai, pad pegkung-pegkung nenier Namu idi megegker ku totdeh.

⁴ Seburur pana' nateh luk pangeh nenier idi neninger ratnan Allah luk mepad kudeng Iko, luk nganau' kekamen luk do' kuan lemulun luk merapet Neneh.

⁵ Iko ngikak lemulun luk mawang niat nganau' luk matu, idi luk ngerawé ratnan luk pianMu kuan ulundeh. Iko museh nekai, iamo' kai na nugka' nganau' sala'; sagan pana' usehMu pelaba rayeh, kai lutep nganau' luk dat rat mon.

⁶ Amung kai mesala' peh; idi kekamen kai luk do' pana' mepad kudeng kibung luk melutak. Kai mepad kudeng don luk tekering luk mepalid ku bui, ngaceku sala' kai.

⁷ Seburur pana' nateh luk lumi Namu dengan sembayang; idi seburur pana' nateh luk mutuh pedengan rat Namu. Iko sigapung rat nekai idi nenecan nekai, ngaceku sala' kai.

⁸ Iamo' Iko ineh Taman kai, O Tuhan. Kai mepad kudeng tana' salit, idi Iko ineh mepad kudeng lun luk nganau' kuden. Iko nemudut nekai.

⁹ Aleg Iko pelaba useh nekai, pad Iko ngerawé sala' kai macing ruked-ruked. Kai ini pupuMu, do' méi' nekai.

¹⁰ Bawang-bawangMu luk meligan mangun ku su luk ali-ali, idi Yerusalim ineh aceh usag luk tican.

¹¹ Ruma' Allah kai, luk meligan idi pelaba do', su luk inan tepun kai nengubur Namu, pangeh iseb. Idi amung pudut luk inan kai mawa inusag peh.

¹² O Tuhan naké Iko ngerawé amung ineh. Miakké Iko ungeng, pad kai na tuman ku dereh kai?