YESAYA 61 - BALA LUK DO'

Bala Luk Do' Ratnan Puit

¹ Roh Tuhan Allah idi pa luunKu, ngaceku Ieh pangeh nengumau Negku, Pad Ui mada' Bala luk Do' kuan lun masi', idi ngedo' lemulun luk nginuud idi mebeneh niat, idi mada' puit kuan lemulun luk tiban, idi teh kuan lemulun luk tinutup.

² Ieh nengecuk Negku pad Ui mada', ratnan tarekNeh macing, kareb Tuhan miak ngulun pupuNeh, idi ngelaya' bunu'deh. Ieh nengecuk Negku pad Ui ngubuk lemulun luk temido.

³ Idi maré kuan lemulun luk mesusa' niat déi' Sion, awang idi do' ria' ku libal susa' niat, idi nani ubur ku libal tangi'. Tuhan sebuleng miak ngasa' nedeh; ideh do' ulun mepad kudeng kayuh. Amung lemulun nganau' luk matu. Idi Allah miak buren ngaceku luk inau'Neh.

⁴ Ideh mudut baruh bawang-bawang luk inusag mon.

⁵ O pupuKu, pupu baken mangun ku demulunmu. Ideh miak matar dumba muyuh, idi nganau' lati' idi ngasa' kabun anggur muyuh.

⁶ Iamo' muyuh tetanen imam Tuhan. Muyuh ngalap binaweh ratnan amung-amung pupu dengan mawang niat ku ineh.

⁷ Igu' muyuh pangeh nugka'; muyuh tudo bang bawang muyuh sebuleng. Binaweh muyuh dueh kua' ratnan luk atun. Awang niat muyuh macing ruked-ruked.

⁸ Kebala Tuhan, “Ui mawa ku luk mesiri, idi Ui megateh ku luk ngedereh idi luk dat. Ui lutep ngeperuan pupuKu, pad Ui nganau' jani' luk meruked kuandeh.

⁹ Ideh miak mebala arang amung pupu; idé-idé luk nier nedeh miak kali' ideh ineh aceh pupu luk inan peruan rat Negku.”

¹⁰ Yerusalim mawang niat ku luk inau' Tuhan. Ieh mepad kudeng decur luk inayung ku ayung paweh. Allah nengayung neneh ku ulun idi tueh!

¹¹ Tuhan lutep ngulun pupuNeh, mepad kudeng pimara na miak na mulun idi temubu', idi amung pupu miak ngubur Neneh.