YESAYA 60 - BALA LUK DO'

Rayeh Yerusalim Luk Muci Aco

¹ O Yerusalim, tumui iko, idi merasat mepad kudeng aco. Rayeh Tuhan merasat luunmu!

² Pupu baken nepapen ku dacem, iamo' acang Tuhan merasat luunmu; uburNeh pana' miak siren luunmu.

³ Pupu baken miak amé' matun acangmu; idi raca'-raca' pian nier acangmu luk pun masat!

⁴ Do' tengook idi nier libut-libut: amung lemulun mepamung amé' namu; anak deléimu macing rat mado; anak decurmu baben mepad kudeng anak.

⁵ Iko miak nier ineh dengan pelaba awang niat; iko megegker ku awang niatmu. Binaweh amung pupu miak iten amé' namu, rat déi' dipar abpa' rayeh pana'.

⁶ Tuda'-tuda' riudan unta macing rat Midian idi Epa. Ideh nguit amas idi umau luk do' buen rat Siba. Lemulun miak mada' bala luk do' ratnan luk ianu' Allah!

⁷ Amung dumba rat Kedar idi Nebayot, miak iten ku baré kereten kuanmu, idi baré luun bubpun pad maya' pian Tuhan. Tuhan nganau' Ruma'Neh meluun buren ratnan luk atun.

⁸ Anunké kapal ini luk temulud mepad kudeng laput, idi kudeng sukur luk muli'?

⁹ Ideh ineh kapal luk macing rat bawang luk mado, luk nguit pupu Allah muli'. Ideh nguit pirak idi amas, pad ngerayeh ngadan Tuhan, Allah Israil luk meligan, luk nenganau' amung bawang ngedita' pupuNeh.

¹⁰ Kebala Tuhan kuan Yerusalim, “Lun pupu baken miak mudut libungmu baruh; raca'-raca'deh mangun ku demulunmu. Dengan usehKu Ui nengukum namu, iamo' nekini Ui ngegala' katu idi éi'Ku namu.

¹¹ Tebaco kedangan amung tanga'mu mukab, pad raca' amung pupu miak nguit binawehdeh amé' namu.

¹² Iamo' pupu luk na mangun ku demulunmu, miak uen ngusag.

¹³ “Kayuh tongor, aru', idi peribu, luk meluun do' ratnan pulung Lebanon, miak iten, pad mudut namu baruh, O Yerusalim, pelé Ruma'Ku do' ayu, idi bawangKu buren.

¹⁴ Anak lemulun luk nengedereh namu amé' ngedita' namu dengan tekeradung pa kiungmu. Amung lemulun luk nengedat namu atun miak sembayang pa kiungmu. Ideh neten namu, ‘Bawang Tuhan,’ ‘Sion, Bawang Allah Israil luk meligan.’

¹⁵ “Atun iko tican idi inan megateh, aceh bawang luk dat ali. Ui nganau' namu buren idi do' ayu, su luk inan awang ruked-ruked.

¹⁶ Amung pupu idi raca' miak ngasa' namu, mepad kudeng aceh tinan ngasa' anakneh. Iko miak kali' Ui ini Tuhan nengulun namu, idi Allah Israil luk melalud muit namu.

¹⁷ “Ui nguit kuanmu amas ku libal tekaling, pirak ku libal belawan, idi tekaling ku libal kayuh. Iko ngalap belawan ku libal batu. Lun luk ngimet nemuyuh na miak ngedereh nemuyuh teh, Ui nganau' nedeh ngimet dengan mesiri idi do'.

¹⁸ Uni pebunu' na pedingeren teh. Bawangmu na uen ngusag baruh teh. Ui matar namu mepad kudeng libung batu. Iko miak ngubur Negku ngaceku Ui ngulun namu.

¹⁹ “Aco na mangun ku acangmu kareb maco, idi bulan na mangun ku acangmu kareb medacem; Ui ini Tuhan luk mangun ku acangmu luk meruked. Acang rayehKu miak merasat luunmu;

²⁰ idi na muyuh temido teh. Ui ini Tuhan mangun ku acangmu luk meruked, luk meluun raben ratnan aco idi bulan.

²¹ Pupumu miak nganau' luk matu, idi ngimet bawang ineh ruked-ruked. Ui nenibu nedeh, Ui nemudut nedeh, pad ngegala' rayehKu kuan luk amung-amung.

²² Tetek ruma'mu luk meluun isuut idi masi' miak amé' rayeh mepad kudeng pupu luk rayeh! Ui nganau' ini dengan mesaget bang kareb luk petulu. Ui ini Tuhan!”